ಕ್ರಿಸ್ತ ಮುಹಮ್ಮದ ಬುದ್ಧರು
ಹಬ್ಬಕ್ಕೆ ಬಂದವರು
ಬೆಬ್ಬಳಿಸಿ ನಿಂದಿಹರು
ಗಾಝಾದ ಉರಿಯುವ
ನೆಲದೊಡಲಿನಿಂದ
ಮಕ್ಕಳ ತಾಯಂದಿರ
ಆಕ್ರಂದನ ಒಂದೇ ಸಮ
ಕರುಣೆ ಸತ್ತ ಜಗದೆದುರು
ಭೋರ್ಗರೆದಿದೆ ಅಳಲು
ಮೋಡದೊಡಲ ಮಳೆಯಾಗಿ
ಗುಡುಗು ಮಿಂಚು ಸಿಡಿಲಾಗಿ
ಹೆತ್ತೊಡಲಿಗೆ ಉರಿಗಿಚ್ಚನಿಕ್ಕಿ
ಚಳಿಕಾಯಿಸೊ ಜಗಭಂಡರೇ
ದ್ವೇಷಾಗ್ನಿಯ ಯಾಜ್ಞವಲ್ಕ್ಯರೇ
ಸಾಕು ನಿಮ್ಮ ಅಶ್ವಮೇಧ.
ವಿಶ್ವಮಕ್ಕಳ ದಿನಾಚರಣೆ
ಕ್ರಿಸ್ಮಸ್‌ನ ಹಬ್ಬದಾಚರಣೆ
ಯಾವ ನರಕದ ಸೀಕರಣೆ?
ಯಾ ಉಗಾದಿಯ ಪಾರಣೆ?
ಗಾಝಾದ ಅಳಲು ಕೂಗಿದೆ
ಜಗದ ಜನ ಮನಕೆ ಮೊರೆದಿದೆ
ನಿಮ್ಮ ಮನೆಯ ಒಲೆಗಳಲ್ಲಿ
ನಮ್ಮ ಚಿತೆಯ ಉರಿವಕೊಳ್ಳಿ
ನೀವು ತಿನ್ನುವ ಅನ್ನ
ನಮ್ಮ ದೇಹದ ಬನ್ನ
ನಿಮ್ಮ ನಗುವ ನಾಕಕೆ
ನಮ್ಮ ಹೊಗೆಯ ಸೂತಕ.
