2024ರ ಟಿ20 ವಿಶ್ವಕಪ್ ಗೆಲುವಿನ ನಂತರ ಭಾರತದ ಮುಖ್ಯ ಕೋಚ್ ಹುದ್ದೆಯಿಂದ ರಾಹುಲ್ ದ್ರಾವಿಡ್ ಕೆಳಗಿಳಿದರು. ಅವರ ಸ್ಥಾನಕ್ಕೆ ಗೌತಮ್ ಗಂಭೀರ್ ಅವರನ್ನು ನೇಮಿಸಲಾಯಿತು. ಈ ಮೂಲಕ ಹೊಸ ತಂಡ, ಹೊಸ ಕೋಚ್ ಮತ್ತು ಹೊಸ ವ್ಯವಸ್ಥೆಯನ್ನು ಸೇರಿಸಲಾಯಿತು. ಗಂಭೀರ್ ಆಗಮನವು ವಿರಾಟ್ ಕೊಹ್ಲಿ, ರೋಹಿತ್ ಶರ್ಮಾ ಮತ್ತು ರವೀಂದ್ರ ಜಡೇಜಾ ಅವರ ಹಿರಿಯ ಆಟಗಾರರ ನಿರ್ಗಮನವನ್ನು ಸಹ ಗುರುತಿಸಿತು. ಈ ಸವಾಲನ್ನು ಸ್ವೀಕರಿಸಿದ ಗೌತಮ್ ಗಂಭೀರ್ ಆಟಗಾರರಲ್ಲಿ ‘ತಂಡ ಮೊದಲು’ ಎಂಬ ಮನಸ್ಥಿತಿಯನ್ನು ತುಂಬಿದರು ಮತ್ತು 2026ರ ಆವೃತ್ತಿಯಲ್ಲಿ ಭಾರತ ಟಿ20 ವಿಶ್ವಕಪ್ ಪ್ರಶಸ್ತಿಯನ್ನು ಉಳಿಸಿಕೊಂಡಿತು. ಕ್ರಿಕೆಟ್ ಜಗತ್ತು ಭಾರತ ತಂಡಕ್ಕೆ ಪ್ರಶಂಸೆ ವ್ಯಕ್ತಪಡಿಸುತ್ತಿದ್ದು, ಪಾಕಿಸ್ತಾನದ ದಂತಕಥೆ ಶೋಯೆಬ್ ಅಖ್ತರ್, ಕೊಹ್ಲಿ ಮತ್ತು ರೋಹಿತ್ ಅವರನ್ನು ಬಿಟ್ಟಿದ್ದು ಕೂಡ ಭಾರತದ ವಿಶ್ವಕಪ್ ಗೆಲುವಿನಲ್ಲಿ ಹೇಗೆ ಒಂದು ಪ್ರಮುಖ ಅಂಶವಾಯಿತು ಎಂಬುದನ್ನು ಎತ್ತಿ ತೋರಿಸಿದ್ದಾರೆ.
ಪಾಕಿಸ್ತಾನಿ ಮಾಧ್ಯಮವೊಂದರಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಅಖ್ತರ್, ಭಾರತೀಯ ತಂಡವನ್ನು ಶ್ಲಾಘಿಸಿದರು. ಭಾರತ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಮಾಡಿದ ಹೂಡಿಕೆಗಳನ್ನು ಶ್ಲಾಘಿಸುವುದರಿಂದ ಹಿಡಿದು ಗಂಭೀರ್ ರಚಿಸಿದ ವ್ಯವಸ್ಥೆಯವರೆಗೆ, ರಾವಲ್ಪಿಂಡಿ ಎಕ್ಸ್ಪ್ರೆಸ್ ತನ್ನ ಟೋಪಿಯನ್ನು ತೆಗೆದು ದೇಶದಲ್ಲಿನ ಕ್ರಿಕೆಟ್ ರಚನೆಗೆ ನಮನ ಸಲ್ಲಿಸಿದರು.
‘ಭಾರತದ ಬಗ್ಗೆ ನಾನು ಒಂದೆರಡು ವಿಷಯಗಳನ್ನು ಹೇಳುತ್ತೇನೆ. ಮೊದಲು, ಅವರ ನೀತಿ ಗೆದ್ದಿತು. ನಂತರ ವ್ಯವಸ್ಥೆ ಗೆದ್ದಿತು. ಮುಖ್ಯವಾಗಿ, ಅವರ ನಿರ್ವಹಣೆ ಗೆದ್ದಿತು. ದೊಡ್ಡ ಆಟಗಾರರನ್ನು ಕೈಬಿಟ್ಟರೂ ಸಹ, ಗೌತಮ್ ಗಂಭೀರ್ ಯುವ ಆಟಗಾರರನ್ನು ಬೆಂಬಲಿಸಿದರು. ಸಂಜು ಸ್ಯಾಮ್ಸನ್ ಅವರಂತಹ ಯುವಕರನ್ನು ಬೆಂಬಲಿಸಲು ಗೌತಮ್ ಗಂಭೀರ್ ಅವರ ಬಲವಾದ ನೀತಿಗಳು ಮತ್ತು ದಿಟ್ಟ ನಿರ್ಧಾರಗಳು ತಂಡದ ಯಶಸ್ಸಿನಲ್ಲಿ ಪ್ರಮುಖ ಪಾತ್ರ ವಹಿಸಿವೆ’ ಎಂದು ಟ್ಯಾಪ್ಮ್ಯಾಡ್ನಲ್ಲಿ ನಡೆದ ಚಾಟ್ನಲ್ಲಿ ಅಖ್ತರ್ ಹೇಳಿದರು.
‘ಸಂಜು ಸ್ಯಾಮ್ಸನ್ ಎಷ್ಟು ಚೆನ್ನಾಗಿ ಆಡಿದರೆಂದರೆ, ಅವರು ಎದುರಾಳಿಗಳನ್ನು ಸ್ವತಃ ತಟಸ್ಥಗೊಳಿಸಿದರು. ಅಭಿಷೇಕ್ ಶರ್ಮಾ ತುಂಬಾ ಚಿಕ್ಕವರಾಗಿದ್ದರೂ, ಅವರು ಪ್ರಬುದ್ಧತೆಯಿಂದ ಆಡುತ್ತಾರೆ ಮತ್ತು ಉಜ್ವಲ ಭವಿಷ್ಯವನ್ನು ಹೊಂದಿದ್ದಾರೆ. ಗೌತಮ್ ಗಂಭೀರ್ ಅವರ ನೀತಿಗಳು ಮತ್ತು ತಂಡದ ನಿರ್ವಹಣಾ ನಿರ್ಧಾರಗಳು ಕಾರ್ಯನಿರ್ವಹಿಸಿದವು. ಭಾರತದ ವ್ಯವಸ್ಥೆಯು ಅನೇಕ ಆಟಗಾರರಿಗೆ ಅವಕಾಶಗಳನ್ನು ನೀಡುತ್ತದೆ, ಅಗತ್ಯವಿದ್ದಾಗ ಪ್ರದರ್ಶನ ನೀಡಬಲ್ಲ 15 ಆಟಗಾರರ ಬಲಿಷ್ಠ ಗುಂಪನ್ನು ಆಯ್ಕೆ ಮಾಡುತ್ತದೆ’ ಎಂದು ಅವರು ಹೇಳಿದರು.
2024ರ ವಿಶ್ವಕಪ್ ಗೆದ್ದ ಕೂಡಲೇ ಕೊಹ್ಲಿ ಮತ್ತು ರೋಹಿತ್ ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್ಗೆ ನಿವೃತ್ತಿ ಘೋಷಿಸಿದರು. ಆದರೆ, ಮುಂದಿನ ಸರಣಿಗೆ ಭಾರತ ಹೊಸ ತಂಡವನ್ನು ನಿರ್ಮಿಸುವ ಗುರಿಯನ್ನು ಹೊಂದಿದ್ದರಿಂದಲೇ ಈ ಜೋಡಿಯನ್ನು ‘ಕೈಬಿಡಲಾಗಿದೆ’ ಎಂದು ಹೇಳುವ ಮೂಲಕ ಅಖ್ತರ್ ಹೊಸ ಚರ್ಚೆಯನ್ನು ಹುಟ್ಟುಹಾಕಿದರು.
‘ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿಯಂತಹ ದೊಡ್ಡ ಆಟಗಾರರು ದಂತಕಥೆಗಳಾಗಿದ್ದರೂ ಅವರನ್ನು ಕೈಬಿಡಲಾಯಿತು. ಅವರು 2024ರ ವಿಶ್ವಕಪ್ ವಿಜೇತ ತಂಡದ ಭಾಗವಾಗಿದ್ದರು. ಆದರೂ, ತಂಡದ ಆಡಳಿತ ಮಂಡಳಿ ಹೊಸ ತಂಡವನ್ನು ನಿರ್ಮಿಸಲು ನಿರ್ಧರಿಸಿತು. ಭಾರತ ವಿಶ್ವಕಪ್ ಗೆದ್ದಿದೆ. ಈ ಮೂಲಕ ಹೊಸ ಆಟಗಾರರನ್ನು ಬೆಂಬಲಿಸುವ ನಿರ್ಧಾರ ಸರಿಯಾಗಿದೆ ಎಂದು ಸಾಬೀತುಪಡಿಸಿದೆ. ಭಾರತವು ತನ್ನ ಕ್ರಿಕೆಟ್ ವ್ಯವಸ್ಥೆ, ಮೂಲಸೌಕರ್ಯ ಮತ್ತು ಅಭಿವೃದ್ಧಿಯಲ್ಲಿ ಸಾಕಷ್ಟು ಹಣವನ್ನು ಹೂಡಿಕೆ ಮಾಡುತ್ತಿದೆ, ಇದು ತಂಡದ ಯಶಸ್ಸಿಗೆ ಸಹಾಯ ಮಾಡುತ್ತಿದೆ ಎಂದು ನಾನು ಭಾವಿಸುತ್ತೇನೆ’ ಎಂದು ಅವರು ಹೇಳಿದರು.
‘ಭಾರತೀಯ ಕ್ರಿಕೆಟ್ನಲ್ಲಿ ಹಿರಿಯ ದಂತಕಥೆಗಳಿಗೆ ಗೌರವ ನೀಡುವುದನ್ನು ನೋಡುವುದು ಸುಂದರವಾಗಿದೆ. ಭಾರತದ ಸಂಭ್ರಮಾಚರಣೆಯಲ್ಲಿ ಮಾಜಿ ನಾಯಕರಾದ ರೋಹಿತ್ ಶರ್ಮಾ ಮತ್ತು ಎಂಎಸ್ ಧೋನಿ ಪಾಲ್ಗೊಂಡಿದ್ದರು. ಇದು ತುಂಬಾ ಉತ್ತಮವಾಗಿತ್ತು. ಭಾರತಕ್ಕೆ ಅಭಿನಂದನೆಗಳು. ಅರ್ಹತೆ (ಪ್ರದರ್ಶನ) ಆಧಾರದ ಮೇಲೆ ಆಟಗಾರರನ್ನು ಆಯ್ಕೆ ಮಾಡಿದಾಗ, ನೀವು ಗೆಲ್ಲುತ್ತೀರಿ. ಈ ವಿಶ್ವಕಪ್ ಗೆದ್ದಂತಹ ಯಶಸ್ಸು ಕೂಡ ಅದರ ಪರಿಣಾಮವಾಗಿದೆ’ ಎಂದರು.