ಬೆಂಗಳೂರು: ಬ್ಯಾಂಕ್ಗಳು ಜನರ ನಂಬಿಕೆಯ ಕೋಟೆಗಳೆಂದೇ ಪರಿಗಣಿಸಲಾಗುತ್ತದೆ. ಆದರೆ ಆ ನಂಬಿಕೆಗೆ ಭಾರೀ ಆಘಾತ ಉಂಟುಮಾಡುವ ಘಟನೆ ಒಂದರಲ್ಲಿ, ಮಲ್ಲೇಶ್ವರದ ಕೆನರಾ ಬ್ಯಾಂಕ್ ಶಾಖೆಯ ಸೀನಿಯರ್ ಮ್ಯಾನೇಜರ್ ಗ್ರಾಹಕರ ಹೆಸರಿನಲ್ಲಿ ₹3.11 ಕೋಟಿ ಮೌಲ್ಯದ ಗೋಲ್ಡ್ ಲೋನ್ ಪಡೆದು ಪರಾರಿಯಾಗಿರುವುದು ಬೆಳಕಿಗೆ ಬಂದಿದೆ.
ಪೊಲೀಸ್ ಹಾಗೂ ಬ್ಯಾಂಕ್ ಮೂಲಗಳ ಪ್ರಕಾರ, ಆರೋಪಿ ರಘು ಎಂಬ ಮ್ಯಾನೇಜರ್, 21ಕ್ಕೂ ಹೆಚ್ಚು ಗ್ರಾಹಕರ ಹೆಸರಿನಲ್ಲಿ ಚಿನ್ನ ಅಡವಿಡದೇ ಸಾಲ ಪಡೆದಿದ್ದಾನೆ. ಈ ವಂಚನೆಯಲ್ಲಿ ಹೆಚ್ಚಾಗಿ ವೃದ್ಧರು ಮತ್ತು ಪೆನ್ಶನ್ದಾರರನ್ನೇ ಟಾರ್ಗೆಟ್ ಮಾಡಲಾಗಿದೆ ಎಂಬುದು ತನಿಖೆಯಿಂದ ತಿಳಿದುಬಂದಿದೆ.
ಗ್ರಾಹಕರಿಗೆ OTP, ಸಹಿ ಹಾಗೂ ಚೆಕ್ಗಳನ್ನು ವಿವಿಧ ಕಾರಣ ಹೇಳಿ ಪಡೆದು, ಆ ಮಾಹಿತಿಯನ್ನು ದುರುಪಯೋಗಪಡಿಸಿಕೊಂಡು ಸಾಲ ಮಂಜೂರು ಮಾಡಿರುವ ಆರೋಪವಿದೆ. ಸಾಲದ ಕಂತುಗಳು ಪಾವತಿಯಾಗದೆ ಉಳಿದಾಗ ಮತ್ತು ಬ್ಯಾಂಕ್ ಆಡಿಟ್ ಸಮಯದಲ್ಲಿ ನಕಲಿ ವ್ಯವಹಾರ ಬಯಲಾಗಿದ್ದು, ಈ ಪ್ರಕರಣ ಬಹಿರಂಗವಾಗಿದೆ.
ಒಬ್ಬ ಗ್ರಾಹಕರ ಕುಟುಂಬಸ್ಥರು ಹೇಳುವಂತೆ,
“ನಮ್ಮ ತಾಯಿಯ ಮೊಬೈಲ್ ನಾನೇ ಬಳಸುತ್ತಿದ್ದೆ. ಮ್ಯಾನೇಜರ್ ಕೇಳಿದ್ದರಿಂದ OTP ಕೊಟ್ಟೆ. ಕೆಲವೇ ದಿನಗಳಲ್ಲಿ ₹18 ಲಕ್ಷ ಸಾಲ ತೆಗೆದುಕೊಳ್ಳಲಾಗಿದೆ ಎಂಬುದು ಗೊತ್ತಾಯಿತು. ನಾವು ಯಾವತ್ತೂ ಚಿನ್ನ ಅಡವಿಡಲೇ ಇಲ್ಲ.”
ಕಳ್ಳಾಟ ಬೆಳಕಿಗೆ ಬರುತ್ತಿದ್ದಂತೆ ಆರೋಪಿ ಮ್ಯಾನೇಜರ್ ರಘು ನಾಪತ್ತೆಯಾಗಿದ್ದು, ಆತನ ಪತ್ತೆಗೆ ಪೊಲೀಸರು ಬಲೆ ಬೀಸಿದ್ದಾರೆ. ಬ್ಯಾಂಕ್ ಅಧಿಕಾರಿಗಳು ಗ್ರಾಹಕರ ದಾಖಲೆಗಳನ್ನು ಸಂಗ್ರಹಿಸಿ, ಈ ವಂಚನೆ ಹೇಗೆ ನಡೆದಿದೆ ಎಂಬುದರ ಬಗ್ಗೆ ಆಂತರಿಕ ತನಿಖೆ ನಡೆಸುತ್ತಿದ್ದಾರೆ.
ಈ ಘಟನೆ,
“ಬ್ಯಾಂಕ್ನೊಳಗೇ ಇಂತಹ ವಂಚನೆ ನಡೆದರೆ ಗ್ರಾಹಕರು ಯಾರನ್ನು ನಂಬಬೇಕು?” ಎಂಬ ಗಂಭೀರ ಪ್ರಶ್ನೆಯನ್ನು ಎಬ್ಬಿಸಿದೆ.
ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಮುಂದುವರೆಸಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ಅಕ್ರಮಗಳು ಬಹಿರಂಗವಾಗುವ ಸಾಧ್ಯತೆ ಇದೆ.
