ಬೆಂಗಳೂರು: ಪಿಜಿಗಳಲ್ಲಿ ಲ್ಯಾಪ್‍ಟಾಪ್ ಕಳ್ಳತನ ಮಾಡುತ್ತಿದ್ದ ಬಿ.ಟೆಕ್ ಪದವೀಧರೆಯನ್ನು ಇಲ್ಲಿನ ಎಚ್‍ಎಎಲ್ ಠಾಣೆ ಪೊಲೀಸರು ಬಂಧಿಸಿರುವುದಾಗಿ ವರದಿಯಾಗಿದೆ.
ರಾಜಸ್ಥಾನದ ಮೂಲದ ಜಸು ಅಗರ್ವಾಲ್(29) ಎಂಬಾಕೆಯನ್ನು ಬಂಧಿತ ಆರೋಪಿತೆ ಎಂದು ಗುರುತಿಸಲಾಗಿದ್ದು, ಈಕೆಯಿಂದ 10 ಲಕ್ಷ ರೂ. ಮೌಲ್ಯದ 24 ಲ್ಯಾಪ್‍ಟಾಪ್‍ಗಳನ್ನು ವಶಕ್ಕೆ ಪಡೆದುಕೊಳ್ಳಲಾಗಿದೆ ಎಂದು ನಗರ ಪೊಲೀಸ್ ಆಯುಕ್ತ ಬಿ.ದಯಾನಂದ್ ತಿಳಿಸಿದ್ದಾರೆ.
ಬಿ.ಟೆಕ್ ಪದವೀಧರೆಯಾಗಿರುವ ಜಸು ಅಗರ್ವಾಲ್, ಈ ಹಿಂದೆ ನೋಯ್ಡಾದ ಖಾಸಗಿ ಬ್ಯಾಂಕ್‍ವೊಂದರಲ್ಲಿ ಕೆಲಸ ಮಾಡುತ್ತಿದ್ದಳು. ಕಡಿಮೆ ಸಂಬಳ ಹಿನ್ನೆಲೆ ಕೆಲಸ ತೊರೆದಿದ್ದ ಆಕೆ ಬೆಂಗಳೂರಿಗೆ ಬಂದು ವಿವಿಧ ಕಂಪೆನಿಗಳಲ್ಲಿ ಸಂದರ್ಶನ ಎದುರಿಸಿದ್ದರೂ ಕೆಲಸ ಸಿಕ್ಕಿರಲಿಲ್ಲ.
ಸಾಫ್ಟ್ ವೇರ್ ಕಂಪೆನಿಗಳಿರುವ ಸಮೀಪದ ಬೆಳ್ಳಂದೂರು, ಸಿಲ್ಕ್ ಬೋರ್ಡ್, ಹೆಬ್ಬಾಳ, ವೈಟ್‍ಫೀಲ್ಟ್ ಹಾಗೂ ಮಹದೇವಪುರ ಸುತ್ತಮುತ್ತಲಿನ ಪಿಜಿ ಹಾಗೂ ಹೊಟೇಲ್‍ಗಳಲ್ಲಿ ಜಸು ಅಗರ್ವಾಲ್ ವಾಸ್ತವ್ಯ ಹೂಡಿದ್ದಳು. ಇಲ್ಲಿನ ಪಿಜಿಗಳಲ್ಲಿ ಉಳಿದುಕೊಂಡವರ ಪೈಕಿ ಬಹುತೇಕರು ಸಾಫ್ಟ್‍ವೇರ್ ಇಂಜಿನಿಯರ್ ಆಗಿದ್ದರಿಂದ ಲ್ಯಾಪ್‍ಟಾಪ್ ಬಳಸುತ್ತಿದ್ದರು. ಇದನ್ನ ಗಮನಿಸಿ ಲ್ಯಾಪ್‍ಟಾಪ್ ಕದಿಯಲು ನಿರ್ಧರಿಸಿದ್ದಳು.
ಪಿಜಿಯಲ್ಲಿ ಊಟ ಮಾಡುವ ಸಮಯದಲ್ಲಿ ರೂಮ್‍ಗಳಿಗೆ ತೆರಳಿ ಲ್ಯಾಪ್‍ಟಾಪ್ ಕಳ್ಳತನ ಮಾಡಿ ಪರಾರಿಯಾಗುತ್ತಿದ್ದಳು. ವಿದ್ಯಾವಂತೆಯಾಗಿದ್ದರಿಂದ ಲ್ಯಾಪ್‍ಟಾಪ್‍ನಲ್ಲಿ ಪಾಸ್ ವರ್ಡ್ ಗಳನ್ನು ಬದಲಾಯಿಸಿ ಮಾರತ್ತಹಳ್ಳಿ, ಯಲಹಂಕ ಹಾಗೂ ಆರ್.ಟಿ.ನಗರದಲ್ಲಿರುವ ಲ್ಯಾಪ್‍ಟಾಪ್ ಅಂಗಡಿಗಳಲ್ಲಿ ಮಾರಾಟ ಮಾಡುತ್ತಿದ್ದಳು. ಒಂದು ಲ್ಯಾಪ್ ಟಾಪ್ ಸುಮಾರು 10 ಸಾವಿರ ರೂ.ಗೆ ಮಾರಾಟ ಮಾಡುತ್ತಿದ್ದಳು.
ಇತ್ತೀಚೆಗೆ ಎಚ್‍ಎಎಲ್ ಪೊಲೀಸ್ ಠಾಣಾ ವ್ಯಾಪ್ತಿಯ ಪಿಜಿಯಲ್ಲಿ ಲ್ಯಾಪ್‍ಟಾಪ್, ಚಾರ್ಜರ್ ಮೌಸ್ ಸಮೇತ ಕಳ್ಳತನ ಸಂಬಂಧ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ಆರೋಪಿತೆಯನ್ನು ಹುಣಸಮಾರನಹಳ್ಳಿ ಬಳಿ ಬಂಧಿಸಿ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದ್ದಾರೆ. ಆರೋಪಿತೆ ಬಂಧನದಿಂದ ಕೋರಮಂಗಲ, ಇಂದಿರಾನಗರ ಹಾಗೂ ಎಚ್‍ಎಎಲ್ ಪೊಲೀಸ್ ಠಾಣಾ ವ್ಯಾಪ್ತಿಗಳಲ್ಲಿ ದಾಖಲಾಗಿದ್ದ 4 ಪ್ರಕರಣಗಳನ್ನು ಪತ್ತೆ ಹಚ್ಚಲಾಗಿದೆ ಎಂದು ಬಿ.ದಯಾನಂದ್ ಮಾಹಿತಿ ನೀಡಿದ್ದಾರೆ.
