ಬೆಂಗಳೂರು: ಇದೀಗ ಬೆಂಗಳೂರಿನಲ್ಲಿ ಜನರಿಂದ ದುಪ್ಪಟ್ಟು ದರ ವಸೂಲಿಸುತ್ತಿದ್ದ ಆಟೋ ಚಾಲಕರ ವಿರುದ್ಧ ಸಾರಿಗೆ ಇಲಾಖೆ ಭಾರೀ ಕ್ರಮಕೈಗೊಂಡಿದ್ದು, ನಗರಾದ್ಯಂತ ನಡೆದ ವಿಶೇಷ ತಪಾಸಣೆಯಲ್ಲಿ 150ಕ್ಕೂ ಹೆಚ್ಚು ಆಟೋಗಳನ್ನು ಜಪ್ತಿ ಮಾಡಲಾಗಿದೆ.
ಆರ್‌ಟಿಓ ಅಧಿಕಾರಿಗಳ ಬಿಸಿ ಮುಟ್ಟಿಸಿದ ಕಾರ್ಯಾಚರಣೆ: ಬೆಂಗಳೂರು ನಗರದಲ್ಲಿ ಬೈಕ್ ಟ್ಯಾಕ್ಸಿ ಸೇವೆ ನಿಷೇಧವಾಗಿದ ನಂತರದಿಂದ ಕೆಲ ಆಟೋ ಚಾಲಕರು ಪ್ರಯಾಣಿಕರಿಂದ ದುಪ್ಪಟ್ಟು ದರ ವಸೂಲಿಸುತ್ತಿದ್ದಾರೆ ಎಂಬ ಅಸಂಖ್ಯೆ ದೂರುಗಳು ವ್ಯಕ್ತವಾಗುತ್ತಿವೆ. ಕೆಲ ಅಗ್ರಿಗೇಟರ್ ಆಪ್‌ಗಳೂ ಕೂಡ ದುರ್ಬಳಕೆ ಮಾಡಿಕೊಂಡು ಹೆಚ್ಚಿನ ಹಣ ವಸೂಲಿ ಮಾಡುತ್ತಿರುವ ಆರೋಪಗಳು ಕೇಳಿ ಬಂದ ಹಿನ್ನೆಲೆ, ಸಾರಿಗೆ ಇಲಾಖೆ ತಕ್ಷಣವೇ ಸ್ಪಂದಿಸಿ ಕಾರ್ಯಾಚರಣೆ ಕೈಗೊಂಡಿದೆ.
ಪ್ರತಿ ಆರ್‌ಟಿಓ ಕಚೇರಿಗೆ ಎರಡು ತಂಡಗಳಂತೆ 10ಕ್ಕೂ ಹೆಚ್ಚು ತಂಡಗಳನ್ನು ರಚಿಸಿ ನಗರಾದ್ಯಂತ ರೇಡ್ ನಡೆಸಲಾಗಿದೆ. ಈ ವೇಳೆ, ವಿಮಾ ದಾಖಲೆ ಇಲ್ಲದೆ ಓಡುತ್ತಿದ್ದ, ಪರವಾನಗಿ ಇಲ್ಲದ ಆಟೋಗಳು ಮತ್ತು ದುಪ್ಪಟ್ಟು ದರ ವಸೂಲಿಸುತ್ತಿದ್ದ ಆಟೋಗಳನ್ನು ಹಿಡಿದುಕೊಂಡು ಕ್ರಮ ಕೈಗೊಳ್ಳಲಾಗಿದೆ.
ಆತಿರೇಕ ದರಕ್ಕೆ ಸಾರ್ವಜನಿಕ ಆಕ್ರೋಶ: ಅತೀ ಕಡಿಮೆ ದೂರದ ಪ್ರಯಾಣಕ್ಕೂ ₹100ಕ್ಕೂ ಹೆಚ್ಚು ಹಣ ಕೇಳಲಾಗುತ್ತಿದ್ದು, ಇದು ಮಧ್ಯಮ ವರ್ಗದ ಜನರಿಗೆ ಬಲವಾದ ಹೊರೆ ಆಗುತ್ತಿದೆ. “ಆಪ್‌ನಲ್ಲಿ ₹50 ತೋರಿಸ್ತದೆ, ಡ್ರೈವರ್ ನೇರವಾಗಿ ಕೇಳಿದ್ರೆ ₹100 ಕೇಳ್ತಾರೆ. ಹೀಗೆ ನಾವು ಹೇಗೆ ಓಡಾಡೋದು?” ಎಂಬುದು ಒಂದು ಮಹಿಳಾ ಪ್ರಯಾಣಿಕರ ಆಕ್ರೋಶ.
ಅಕ್ರಮ ಬಿಲ್ ವಸೂಲಿ ಮಾಡುತ್ತಿದ್ದ ಆಪ್‌ಗಳಿಗೂ ಎಚ್ಚರಿಕೆ: ಸುಪ್ರೀಮ್ ಕೋರ್ಟ್ ಆದೇಶದಂತೆ, ಅಗ್ರಿಗೇಟರ್‌ಗಳು ಕೇವಲ 5% ಸೇವಾ ಶುಲ್ಕ ಮತ್ತು ಜಿಎಸ್ಟಿ ಮಾತ್ರ ವಿಧಿಸಬೇಕು. ಆದರೆ ಕೆಲ ಕಂಪನಿಗಳು ‘ಟ್ರಾಫಿಕ್ ಕಂಜೆಷನ್ ಚಾರ್ಜ್’ ಹೆಸರಿನಲ್ಲಿ ಹೆಚ್ಚುವರಿ ಹಣ ವಸೂಲಿ ಮಾಡುತ್ತಿದ್ದವು. ಈ ಬಗ್ಗೆ ಕೂಡ ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಒಂದೇ ದಿನದ ಕಾರ್ಯಾಚರಣೆ ಸಾಕಾಗದು: ಸಾರ್ವಜನಿಕರಿಂದ ದುಪ್ಪಟ್ಟು ದರ ವಸೂಲಿಸುತ್ತಿರುವ ಆಟೋ ಚಾಲಕರಿಗೆ ಈ ದಾಳಿಯು ಎಚ್ಚರಿಕೆ ನೀಡಿದರೂ, ಕೇವಲ ಒಂದು ದಿನದ ಕಾರ್ಯಾಚರಣೆ ಸಾಕಾಗದು. ಇಂತಹ ನಿಯಮಿತ ತಪಾಸಣೆಗಳು ಮಾತ್ರ ಜನರ ಅಸಮಾಧಾನ ನಿವಾರಣೆಗೆ ಸಹಾಯವಾಗುತ್ತವೆ ಎಂದು ಸಾರಿಗೆ ಇಲಾಖೆ ಮೂಲಗಳು ಅಭಿಪ್ರಾಯಪಟ್ಟಿವೆ.
ಆಟೋ ಚಾಲಕರ ಅತಿರೇಕ ದರ, ಅಕ್ರಮ ಆಪ್ ಚಾರ್ಜ್, ಸರಕಾರದ ನಿಯಮ ಉಲ್ಲಂಘನೆ, ಆರ್‌ಟಿಓ ದಾಳಿ, ಸಾರ್ವಜನಿಕ ಆಕ್ರೋಶ – ಈ ಎಲ್ಲ ವಿಚಾರಗಳ ಮಧ್ಯೆ ಸಾರ್ವಜನಿಕರ ಹಿತದೃಷ್ಟಿಯಿಂದ ನೈತಿಕ ಹಾಗೂ ಕಾನೂನುಬದ್ಧವಾಗಿ ನಿರ್ವಹಣೆ ಮಾಡುವ ಹೊಣೆಗಾರಿಕೆ ಸಾರಿಗೆ ಇಲಾಖೆ ಮೇಲೆ ಬಂದಿದೆ.