ಬೆಳಗಾವಿ, ಅ. 4: ಬೆಳಗಾವಿ ಜಿಲ್ಲೆಯ ಗೋಕಾಕ್ ತಾಲೂಕಿನ ಕಪರಟ್ಟಿ ಗ್ರಾಮದಲ್ಲಿ ನಡುಗುವಂತ ಘಟನೆ ನಡೆದಿದೆ. ಇಬ್ಬರು ಸಹೋದರರು ಒಂದೇ ದಿನ ಸಾವನ್ನಪ್ಪಿದ್ದಾರೆ — ಒಬ್ಬ ಅನಾರೋಗ್ಯದಿಂದ, ಮತ್ತೊಬ್ಬ ತಮ್ಮ ಸಾವಿನ ಸುದ್ದಿ ಕೇಳಿ ಹೃದಯಾಘಾತದಿಂದ ಪ್ರಾಣ ಕಳೆದುಕೊಂಡಿದ್ದಾರೆ.
ಮೃತರಾದವರು ಬಸವರಾಜ್ ಮತ್ತು ಸತೀಶ್ ಸಹೋದರರು. ಕುಟುಂಬ ಮೂಲಗಳ ಪ್ರಕಾರ, ಕಿರಿಯ ಸಹೋದರ ಸತೀಶ್ ಅನಾರೋಗ್ಯದಿಂದ ಬಳಲುತ್ತಿದ್ದು, ಶುಕ್ರವಾರ ಮಧ್ಯಾಹ್ನ ನಿಧನರಾದರು. ಈ ದುಃಖದ ಸುದ್ದಿ ತಿಳಿದ ತಕ್ಷಣ, ಅಣ್ಣ ಬಸವರಾಜ್ ಆಘಾತಗೊಂಡು ಹೃದಯಾಘಾತಕ್ಕೊಳಗಾದರು. ಅವರನ್ನು ತಕ್ಷಣ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ, ಮಾರ್ಗ ಮಧ್ಯೆ ಉಸಿರು ನಿಂತಿತು.
ಒಂದೇ ದಿನ ಇಬ್ಬರು ಮಕ್ಕಳನ್ನ ಕಳೆದುಕೊಂಡ ತಾಯಿ-ತಂದೆಗೀಗ ಭಾರೀ ಶೋಕ ಬಡಿದಂತಾಗಿದೆ. ಗ್ರಾಮದಲ್ಲಿ ಆಘಾತದ ವಾತಾವರಣ ನಿರ್ಮಾಣವಾಗಿದೆ. ಸಹೋದರರ ಸಂಬಂಧ ಅತ್ಯಂತ ಆತ್ಮೀಯವಾಗಿದ್ದು, ಅಣ್ಣ ತನ್ನ ತಮ್ಮನಿಲ್ಲದೆ ಬದುಕಲಾರನೆಂಬಂತ ಪ್ರೀತಿ ಎಲ್ಲರ ಮನಸ್ಸನ್ನು ಮುಟ್ಟಿದೆ.
ಗ್ರಾಮಸ್ಥರು ಹೇಳುವಂತೆ, “ತಮ್ಮ ಸತೀಶ್ ಸತ್ತ ಸುದ್ದಿ ಕೇಳಿ ಅಣ್ಣ ಬಸವರಾಜ್ ಬಿದ್ದೇ ಬಿಟ್ಟ. ಇಬ್ಬರೂ ಜೀವಂತ ಪ್ರೀತಿಯ ಸಂಕೇತ,” ಎಂದು ಹೇಳಿದರು.
ಈ ದುಃಖದ ಘಟನೆಯಿಂದ ಕಪರಟ್ಟಿ ಗ್ರಾಮದಲ್ಲಿ ಶೋಕದ ಮೋಡ ಆವರಿಸಿದ್ದು, ನೂರಾರು ಮಂದಿ ಸಹೋದರರ ಅಂತ್ಯಕ್ರಿಯೆಯಲ್ಲಿ ಭಾಗವಹಿಸಿ ಸಾವಿನಲ್ಲೂ ಒಂದಾದ ಸಹೋದರರಿಗೆ ಕಣ್ಣೀರಿನ ನಮನ ಸಲ್ಲಿಸಿದರು.
