ಬೆಂಗಳೂರು: ಆಗಸ್ಟ್ 5 ರಂದು ಸಾರಿಗೆ ನೌಕರರ ಮುಷ್ಕರ ನಡೆಯಲಿದೆ ಎಂಬ ಆತಂಕದ ಮಧ್ಯೆ, ರಾಜ್ಯ ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿ ಅವರು ಭರವಸೆ ನೀಡಿದ್ದು, “ಹೆಚ್ಚುವರಿ ವಾಹನಗಳ ವ್ಯವಸ್ಥೆ, ಹೈಕೋರ್ಟ್ ತಡೆ ಆದೇಶ ಮತ್ತು ಸರ್ಕಾರದ ಚಟುವಟಿಕೆಗಳಿಂದ ರಾಜ್ಯಾದ್ಯಂತ ಬಸ್ ಸೇವೆ ಎಂದಿನಂತೆಯೇ ನಡೆಯಲಿದೆ” ಎಂದು ತಿಳಿಸಿದ್ದಾರೆ.
ಜಾಯಿಂಟ್ ಆಕ್ಷನ್ ಕಮಿಟಿಯ ಎರಡು ವಿಭಾಗಗಳಾದ ಅನಂತ ಸುಬ್ರಾಯ್ ನೇತೃತ್ವದ ಸಮಿತಿಯು 38 ತಿಂಗಳ ಬಾಕಿ ವೇತನ ನೀಡಬೇಕೆಂದು ಒತ್ತಾಯಿಸುತ್ತಿದ್ದರೆ, ಮತ್ತೊಂದು ವಿಭಾಗ ಶ್ರೀನಿವಾಸಮೂರ್ತಿ ನೇತೃತ್ವದ ಒನ್ ಮ್ಯಾನ್ ಕಮಿಟಿಯ ಶಿಫಾರಸ್ಸಿನಂತೆ 14 ತಿಂಗಳ ವೇತನ ಪಾವತಿ ಮಾಡಬೇಕೆಂದು ಸಲಹೆ ನೀಡಿದೆ. ಈ ಶಿಫಾರಸ್ಸಿಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು 718 ಕೋಟಿ ರೂಪಾಯಿ ಬಿಡುಗಡೆ ಮಾಡುವುದಾಗಿ ಒಪ್ಪಿಗೆಯೂ ನೀಡಿದ್ದಾರೆ.
“ಪರಸ್ಪರ ಸಂವಾದಕ್ಕೆ ಸರ್ಕಾರ ಸದಾ ಸಿದ್ಧವಾಗಿದೆ. ಆದರೆ ಕೆಲವು ಸಂಘಟನೆಗಳು ಹಠ ಹಿಡಿದು ಮುಂದುವರಿದರೆ, ಸಾರ್ವಜನಿಕರಿಗೆ ತೊಂದರೆ ಆಗಲಿದೆ. ಹೀಗಾಗಿ ಸರ್ಕಾರ ಈ ವೇಳೆ 30 ಸಾವಿರಕ್ಕೂ ಹೆಚ್ಚು ವಾಹನಗಳನ್ನು ತುರ್ತು ಪರಿಸ್ಥಿತಿಗೆ ಸಜ್ಜುಗೊಳಿಸಿದೆ. ಕಾನ್ಟ್ರಾಕ್ಟ್ ಕ್ಯಾರೇಜ್, ಖಾಸಗಿ ಬಸ್ಸುಗಳು, ಎವಿ, ಕ್ಯಾಬ್‌ಗಳು ಸೇರಿದಂತೆ ಎಲ್ಲರನ್ನೂ ಸೇರಿಸಲಾಗಿದೆ,” ಎಂದು ರಾಮಲಿಂಗಾ ರೆಡ್ಡಿ ತಿಳಿಸಿದ್ದಾರೆ.
ಹೈಕೋರ್ಟ್ ಈಗಾಗಲೇ ಮುಷ್ಕರದ ಮೇಲೆ ತಡೆ ಆದೇಶ ನೀಡಿರುವ ಹಿನ್ನೆಲೆಯಲ್ಲಿ, “ರಾಷ್ಟ್ರೀಯ ಹಿತದೃಷ್ಟಿಯಿಂದ ನೌಕರರು ಸಹ ರಾಜಕೀಯಕ್ಕಿಂತ ಸಾರ್ವಜನಿಕ ಸೇವೆಗೆ ಬದ್ಧರಾಗಬೇಕು. ನಾವು ಮತ್ತೆ ಸಭೆ ಕರೆದಿದ್ದೇವೆ. ಶಾಸಕಾಂಗ ಅಧಿವೇಶನ ಮುಗಿದ ನಂತರ ಮತ್ತೆ ಮಾತುಕತೆಗೆ ಆಹ್ವಾನ ನೀಡಲಾಗುತ್ತದೆ,” ಎಂದರು.
ಆಗಸ್ಟ್ 5 ರಂದು ಯಾವುದೇ ರೀತಿಯ ಬಸ್ ಸೇವೆ ವ್ಯತ್ಯಯವಿಲ್ಲ ಎಂದು ಸ್ಪಷ್ಟಪಡಿಸಿದ ಅವರು, “ಬಾಲಕ-ಬಾಲಕಿಯರಿಗೂ, ಕಾರ್ಮಿಕರಿಗೂ, ಸಾಮಾನ್ಯ ಜನತೆಗೆ ಯಾವುದೇ ತೊಂದರೆ ಆಗದಂತೆ ಏರ್ಪಾಟು ಮಾಡಲಾಗಿದೆ. ರೈಲುಗಳ ಸಂಖ್ಯೆಯೂ ಹೆಚ್ಚಿಸಲು ಕೋರಲಾಗಿದೆ. IT ಉದ್ಯೋಗಿಗಳಿಗೆ ವರ್ಕ್ ಫ್ರಮ್ ಹೋಮ್ ಸೂಚಿಸಲಾಗಿದೆ,” ಎಂದಿದ್ದಾರೆ.
“ಮುಷ್ಕರ ವಿರೋಧಿಸುತ್ತಿಲ್ಲ; ಸಂವಾದಕ್ಕೆ ಬನ್ನಿ, ಜನತೆಯ ತೊಂದರೆ ತಪ್ಪಿಸೋಣ” ಎಂಬುದು ಸಾರಿಗೆ ಸಚಿವ ರಾಮಲಿಂಗಾ ರೆಡ್ಡಿಯ ಅವರ ನೈಜ ಕರೆ.
