ಬೆಂಗಳೂರು: ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಭಾನುವಾರ ರಾತ್ರಿ ತಮ್ಮ ಕಾವೇರಿ ನಿವಾಸದಲ್ಲಿ ಆಯೋಜಿಸಿದ್ದ ಡಿನ್ನರ್ ಮೀಟಿಂಗ್ ರಾಜ್ಯ ರಾಜಕೀಯ ವಲಯದಲ್ಲಿ ಭಾರಿ ಕುತೂಹಲ ಹುಟ್ಟಿಸಿದ್ದರೂ, ನಿರೀಕ್ಷಿತ ಸಂಪುಟ ಪುನರ್ರಚನೆ ಕುರಿತ ಚರ್ಚೆ ಈ ಕೂಟದಲ್ಲಿ ನಡೆದಿಲ್ಲ ಎಂದು ಮೂಲಗಳು ತಿಳಿಸಿವೆ. ಈ ಸಭೆಯಲ್ಲಿ ಮುಖ್ಯವಾಗಿ ಬಿಹಾರ ವಿಧಾನಸಭೆ ಚುನಾವಣೆಯ ತಂತ್ರಗಾರಿಕೆ, ಅಭಿವೃದ್ಧಿ ನಿಧಿಗಳ ಸಮರ್ಪಕ ಬಳಕೆ, ಮತ್ತು ಪ್ರತ್ಯೇಕ ಸಚಿವಾಲಯಗಳ ಪ್ರಗತಿ ವರದಿ ಕುರಿತಾಗಿ ಚರ್ಚೆ ನಡೆದಿರುವುದು ಗೊತ್ತಾಗಿದೆ.
ಸಭೆಯಲ್ಲಿ ಉಪಮುಖ್ಯಮಂತ್ರಿಗಳು ಡಿ.ಕೆ. ಶಿವಕುಮಾರ್, ಡಾ. ಜಿ. ಪರಮೇಶ್ವರ್, ಹಿರಿಯ ಸಚಿವ ಕೆ.ಜೆ. ಜಾರ್ಜ್ ಸೇರಿ ಬಹುತೇಕ ಸಚಿವರು ಭಾಗವಹಿಸಿದ್ದರು. ಕೆಲವು ಹಿರಿಯ ನಾಯಕರು ಬೇಗ ಸಭೆಯಿಂದ ತೆರಳಿದರೆ, ಕೆಲವರು ವಿದೇಶ ಪ್ರಯಾಣ ಅಥವಾ ಖಾಸಗಿ ಕಾರ್ಯಕ್ರಮದ ಕಾರಣದಿಂದ ಗೈರಾಗಿದ್ದರು.
“ನವೆಂಬರ್ ಕ್ರಾಂತಿ ಅಲ್ಲ, ಭ್ರಾಂತಿ ಮಾತ್ರ” — ರಾಮಲಿಂಗಾ ರೆಡ್ಡಿ ಸ್ಪಷ್ಟನೆ
ಸಂಪುಟ ಬದಲಾವಣೆ ಕುರಿತು ಉಂಟಾದ ರಾಜಕೀಯ ವದಂತಿಗೆ ತೆರೆ ಎಳೆದ ಸಚಿವ ರಾಮಲಿಂಗಾ ರೆಡ್ಡಿ
“ಯಾವ ಕ್ರಾಂತಿನೂ ಇಲ್ಲ, ಭ್ರಾಂತಿ ಅಷ್ಟೇ. ಸಭೆಯಲ್ಲಿ ಬಿಬಿಎಂಪಿ ಮತ್ತು ಜಿಲ್ಲಾ ಪಂಚಾಯಿತಿ ಚುನಾವಣೆಗಳ ಕುರಿತು ಮಾತ್ರ ಚರ್ಚೆ ನಡೆಯಿತು. ಸಂಪುಟ ಪುನರ್ರಚನೆ ಅಥವಾ ನಾಯಕತ್ವ ಬದಲಾವಣೆ ವಿಚಾರವೇ ಬಾರದಿತ್ತು,” ಎಂದು ಹೇಳಿದರು.
ಸಚಿವ ಸಂತೋಷ್ ಲಾಡ್ ಸಹ ಈ ಕೂಟವನ್ನು “ಕ್ಯಾಷುವಲ್ ಡಿನ್ನರ್ ಮೀಟಿಂಗ್” ಎಂದಿದ್ದಾರೆ.
“ಸಿಎಂ ಪ್ರತಿ ಸಚಿವರೊಂದಿಗೆ ವೈಯಕ್ತಿಕವಾಗಿ ಇಲಾಖೆಯ ವಿಚಾರದಲ್ಲಿ ಮಾತುಕತೆ ನಡೆಸಿದರು. ಯಾವುದೇ ಅಧಿಕೃತ ಸಂಪುಟ ಚರ್ಚೆ ನಡೆದಿಲ್ಲ,” ಎಂದು ಸ್ಪಷ್ಟಪಡಿಸಿದರು.
ಇದೇ ವೇಳೆ ಸಚಿವ ಚೆಲುವರಾಯಸ್ವಾಮಿ ಫಿಲಿಪೈನ್ಸ್ ಸರ್ಕಾರಿ ಕಾರ್ಯಕ್ರಮಕ್ಕೆ ತೆರಳುವ ಮುನ್ನ ಅನುಮತಿ ಪಡೆದಿರುವುದಾಗಿ ತಿಳಿಸಿ,
“ನಿಜವಾಗಿ ಹೇಳ್ತೀನಿ, ಯಾವುದೇ ರಾಜಕೀಯ ಚರ್ಚೆ ಆಗಲಿಲ್ಲ. ಸರಳವಾದ ಡಿನ್ನರ್ ಮೀಟಿಂಗ್ ಮಾತ್ರ,” ಎಂದರು.
ಬಿಹಾರ ಚುನಾವಣೆ ಮುಗಿಯುವವರೆಗೂ ಸಂಪುಟ ಬದಲಾವಣೆ ಸಾಧ್ಯತೆ ಕಡಿಮೆ
ರಾಜಕೀಯ ವೀಕ್ಷಕರ ಪ್ರಕಾರ, ಬಿಹಾರ ಚುನಾವಣೆಯು ನವೆಂಬರ್ 14 ರಂದು ಮುಗಿಯುವವರೆಗೂ ಕರ್ನಾಟಕದಲ್ಲಿ ಯಾವುದೇ ದೊಡ್ಡ ರಾಜಕೀಯ ಅಥವಾ ಆಡಳಿತಾತ್ಮಕ ಬದಲಾವಣೆ ಸಾಧ್ಯವಿಲ್ಲ.
ಬಿಹಾರದಲ್ಲಿ ಕಾಂಗ್ರೆಸ್ ಮೈತ್ರಿ ಗೆಲುವು ಸಾಧಿಸಿದರೆ, ಅದರ ಸರ್ಕಾರ ರಚನೆಗೆ ಕೇಂದ್ರ ನಾಯಕರ ಗಮನ ಸೆಳೆಯಬಹುದು. ಆದರೆ ಸೋಲಿನ ಸಂದರ್ಭದಲ್ಲೂ ಹೈಕಮಾಂಡ್ ಸಂಪುಟ ಬದಲಾವಣೆಯ ಚರ್ಚೆಯನ್ನು ಮುಂದೂಡುವ ಸಾಧ್ಯತೆ ಇದೆ.
ಡಿಸೆಂಬರ್ ಮಧ್ಯಭಾಗದಲ್ಲಿ ಬೆಳಗಾವಿ ಅಧಿವೇಶನ ಆರಂಭವಾಗುವ ಸಾಧ್ಯತೆ ಇರುವುದರಿಂದ, ಹೊಸ ಸಚಿವರು ಕಾರ್ಯನಿರ್ವಹಣೆಗೆ ತಯಾರಾಗಲು ಸಮಯ ಸಿಗುವುದಿಲ್ಲ ಎಂಬ ಅಂದಾಜು ಕೂಡ ಇದೆ.
ರಾಜಕೀಯ ವಲಯದಲ್ಲಿ “ನವೆಂಬರ್ ಕ್ರಾಂತಿ” ಬಗ್ಗೆ ಹರಿದಾಡುತ್ತಿದ್ದ ಗಾಳಿಸುದ್ದಿಗಳ ನಡುವೆಯೇ, ಸಿಎಂ ಸಿದ್ದರಾಮಯ್ಯರ ಡಿನ್ನರ್ ಮೀಟಿಂಗ್ ಒಂದು ಸಾಮಾನ್ಯ ಪರಾಮರ್ಶಾ ಸಭೆಯಷ್ಟೇ ಆಗಿತ್ತು.
ರಾಜ್ಯ ಕಾಂಗ್ರೆಸ್ ಸರ್ಕಾರದಲ್ಲಿ ತಕ್ಷಣದ ಸಂಪುಟ ಶಸ್ತ್ರಚಿಕಿತ್ಸೆ ಅಥವಾ ನಾಯಕತ್ವ ಬದಲಾವಣೆ ಸಾಧ್ಯತೆ ಇಲ್ಲ ಎಂದು ಸ್ಪಷ್ಟವಾಗಿದೆ. ಕಾಂಗ್ರೆಸ್ ಹೈಕಮಾಂಡ್ ಕನಿಷ್ಠ ಡಿಸೆಂಬರ್ ಮಧ್ಯದವರೆಗೂ ಸ್ಥಿತಿಗತಿ ಹಾಗೆ ಮುಂದುವರಿಸಬಹುದು ಎಂಬ ಸೂಚನೆ ದೊರೆತಿದೆ.