ನಾಗಾಲ್ಯಾಂಡ್ನಿಂದ ಬೇರ್ಪಡಲು ಬಯಸುವ ಆರು ಜಿಲ್ಲೆಗಳನ್ನು ಪ್ರತಿನಿಧಿಸುವ ಪೂರ್ವ ನಾಗಾಲ್ಯಾಂಡ್ ಪೀಪಲ್ಸ್ ಆರ್ಗನೈಸೇಶನ್ (Eastern Nagaland People’s Organization-ENPO) ನಾಯಕರು ಡಿಸೆಂಬರ್ 3 ರಂದು ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ ಗೃಹ ಸಚಿವ ಅಮಿತ್ ಶಾ (Amit Shah) ಅವರನ್ನು ಭೇಟಿಯಾಗಿ ರಾಜ್ಯತ್ವದ ಬೇಡಿಕೆ (Demand for statehood)ಯನ್ನು ಚರ್ಚಿಸಲಿದ್ದಾರೆ. ನಾಗಾಲ್ಯಾಂಡ್ (Nagaland)ನ 16 ಜಿಲ್ಲೆಗಳ ಪೈಕಿ ಆರು ಜಿಲ್ಲೆಗಳಿಗೆ ರಾಜ್ಯ ಸ್ಥಾನಮಾನದ ಬಗ್ಗೆ ಚರ್ಚಿಸಲು ಕೇಂದ್ರ ಗೃಹಸಚಿವರು ತಂಡವನ್ನು ಆಹ್ವಾನಿಸಿದ್ದಾರೆ ಎಂದು ಇಎನ್ಪಿಒ ವಕ್ತಾರರು ಹೇಳಿದ್ದಾರೆ. ಸಂಜೆ 4 ಗಂಟೆಗೆ ನಿಗದಿಯಾಗಿರುವ ಸಭೆಗೆ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಂದ ಆಹ್ವಾನ ಪತ್ರವನ್ನು ಸ್ವೀಕರಿಸಲಾಗಿದೆ ಎಂದು ENPOನ ಕಾರ್ಯದರ್ಶಿ ಡಬ್ಲ್ಯು.ಮನ್ವಾಂಗ್ ಕೊನ್ಯಾಕ್ ಅವರು ಸುದ್ದಿ ಸಂಸ್ಥೆ ANI ಗೆ ತಿಳಿಸಿದ್ದಾರೆ. ಈ ಜಿಲ್ಲೆಗಳಲ್ಲಿ ಪ್ರಾಬಲ್ಯ ಹೊಂದಿರುವ ಆರು ಪ್ರಮುಖ ಬುಡಕಟ್ಟು ಜನಾಂಗದವರನ್ನು ದಶಕಗಳಿಂದ ನಿರ್ಲಕ್ಷ್ಯ ಮಾಡಲಾಗಿದೆ. ಹೀಗಾಗಿ ರಾಜ್ಯದಿಂದ ಭೇರ್ಪಡಲು ‘ಗಡಿನಾಡು ನಾಗಾಲ್ಯಾಂಡ್’ (Frontier Nagaland) ಅನ್ನು ರಚಿಸಬೇಕೆಂದು ಒತ್ತಾಯಿಸುತ್ತಿದ್ದಾರೆ.
CBLT, KBCA, KBBB, PBCA, USBLA, TBBA ಮತ್ತು YBBA ನಾಗಾಲ್ಯಾಂಡ್‌ನ ಏಳು ಬುಡಕಟ್ಟು ಸಂಸ್ಥೆಗಳ ಒಂದು ಛತ್ರಿ ಸಂಸ್ಥೆಯಾಗಿ ಇಎನ್ಪಿಒ ಕಾರ್ಯನಿರ್ವಹಿಸುತ್ತಿದೆ. “ಆರ್ ತ್ಸಪಿಕಿಯು ಸಾಂಗ್ತಮ್ ನೇತೃತ್ವದ ಇಎನ್ಪಿಒ ಗುಂಪಿನ 11 ಸದಸ್ಯರನ್ನೊಳಗೊಂಡ ನಿಯೋಗ ಕೇಂದ್ರ ಗೃಹ ಸಚಿವರನ್ನು ಭೇಟಿ ಮಾಡಲಿದೆ. ನಾವು ಪ್ರತ್ಯೇಕ ರಾಜ್ಯತ್ವ ‘ಗಡಿನಾಡು ನಾಗಾಲ್ಯಾಂಡ್’ಗೆ ಒತ್ತಾಯಿಸುತ್ತಿದ್ದೇವೆ ಮತ್ತು ಈ ವಿಷಯವನ್ನು ಸಭೆಯಲ್ಲಿ ಚರ್ಚಿಸಲಾಗುವುದು” ಮನ್ವಾಂಗ್ ಕೊನ್ಯಾಕ್ ಹೇಳಿದ್ದಾರೆ.
ಇದನ್ನೂ ಓದಿ: SpiceJet flight ಜೆದ್ದಾದಿಂದ ಹೊರಟ ಸ್ಪೈಸ್‌ಜೆಟ್ ವಿಮಾನ ಕೊಚ್ಚಿಯಲ್ಲಿ ತುರ್ತು ಭೂಸ್ಪರ್ಶ
ಇದಲ್ಲದೆ, ಡಿಸೆಂಬರ್ 3 ರಂದು ಸಂಜೆ 4 ಗಂಟೆಗೆ ಆಯಾ ಸಂಘಗಳ ಅಡಿಯಲ್ಲಿ ಎಲ್ಲಾ ಚರ್ಚ್‌ಗಳನ್ನು ಒಳಗೊಂಡ ವಿಶೇಷ ಪ್ರಾರ್ಥನಾ ಕಾರ್ಯಕ್ರಮವನ್ನು ನಡೆಸಲು ಆಧ್ಯಾತ್ಮಿಕ ಮುಖಂಡರಿಗೆ ಇಎನ್ಪಿಒ ಮನವಿ ಮಾಡಿದೆ. ಪೂರ್ವ ನಾಗಾಲ್ಯಾಂಡ್‌ನ ಎಲ್ಲಾ ಪ್ರಾಮಾಣಿಕ ಸದಸ್ಯರು ಸಂಜೆ 4 ಗಂಟೆಗೆ 5 ನಿಮಿಷಗಳ ಕಾಲ ವಿಶೇಷ ಪ್ರಾರ್ಥನೆ ಸಲ್ಲಿಸುವಂತೆ ಮನವಿ ಮಾಡಿದೆ. ಅಷ್ಟೇ ಅಲ್ಲದೆ, ಪ್ರತ್ಯೇಕ ರಾಜ್ಯತ್ವದ ಬೇಡಿಕೆ ಈಡೇರುವವರೆಗೂ ಯಾವುದೇ ಚುನಾವಣಾ ಪ್ರಕ್ರಿಯೆಯಲ್ಲಿ ಭಾಗವಹಿಸದಂತೆ ಪೂರ್ವ ನಾಗಾಲ್ಯಾಂಡ್‌ನ ಜನಸಾಮಾನ್ಯರಿಗೆ ಇಎನ್ಪಿಒ ತನ್ನ ಮನವಿಯನ್ನು ಪುನರುಚ್ಚರಿಸಿದೆ.
ಮತ್ತಷ್ಟು ದೇಶದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ
