ಭಾರತ ಮತ್ತು ಪಾಕಿಸ್ತಾನ ನಡುವಣ ಹೈ ವೋಲ್ಟೇಜ್ ಪಂದ್ಯ ಅಹ್ಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಅಕ್ಟೋಬರ್‌ 14ರಂದು ನಡೆಯಲಿದೆ. ಅಂದಹಾಗೆ ಈ ಬಹುನಿರೀಕ್ಷಿತ ಪಂದ್ಯದಲ್ಲಿ ಭಾರತ ತಂಡ ಸಂಪೂರ್ಣ ಕೇಸರಿ ಬಣ್ಣದ ಸಮವಸ್ತ್ರ ತೊಟ್ಟು ಆಡಲಿದೆ ಎಂಬ ಸುದ್ದಿ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಸದ್ದು ಮಾಡಿದೆ.
2019ರ ಸಾಲಿನ ಐಸಿಸಿ ಏಕದಿನ ಕ್ರಿಕೆಟ್‌ ವಿಶ್ವಕಪ್ ಟೂರ್ನಿಯಲ್ಲೂ ಟೀಮ್ ಇಂಡಿಯಾ ಕೇಸರಿ ಮತ್ತು ನೀಲಿ ಮಿಶ್ರಿತ ಸಮವಸ್ತ್ರ ತೊಟ್ಟು ಇಂಗ್ಲೆಂಡ್‌ ವಿರುದ್ಧ ಪಂದ್ಯ ಆಡಿತ್ತು. ಅದೇ ಮಾದರಿ ಈ ಬಾರಿ ಪಾಕಿಸ್ತಾನ ಎದುರು ಸಂಪೂರ್ಣ ಕೇಸರಿ ಬಣ್ಣದ ಸಮವಸ್ತ್ರದಲ್ಲಿ ಆಡಲಿದೆ ಎಂದು ದುದ್ದಿ ಹಬ್ಬಿದೆ.
ಆದರೆ, ಭಾರತೀಯ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ಈ ಬಗ್ಗೆ ಯಾವುದೇ ಅಧಿಕೃತ ಮಾಹಿತಿ ನೀಡಿಲ್ಲ. ಇದನ್ನು ಬಿಸಿಸಿಐ ಖಜಾಂಚಿ ಆಶಿಶ್‌ ಶೆಲಾರ್‌ ಖಾತ್ರಿ ಪಡಿಸಿದ್ದಾರೆ ಕೂಡ. ಮೂಲಗಳು ನೀಡಿರುವ ಮಾಹಿತಿ ಪ್ರಕಾರ ಪಾಕಿಸ್ತಾನ ಎದುರು ಭಾರತ ತಂಡ ತನ್ನ ನೀಲಿ ಬಣ್ಣದ ಜರ್ಸಿ ಧರಿಸಿಯೇ ಆಡಲಿದೆ.
“ಪಾಕಿಸ್ತಾನ ವಿರುದ್ಧದ ಪಂದ್ಯದಲ್ಲಿ ಟೀಮ್ ಇಂಡಿಯಾ ಸಂಪೂರ್ಣ ಕೇಸರಿ ಬಣ್ಣದ ಸಮವಸ್ತ್ರ ತೊಟ್ಟು ಆಡಲಿದೆ ಎಂದು ಮಾಧ್ಯಮಗಳಲ್ಲಿ ಆಗಿರುವಂತಹ ವರದಿಯನ್ನು ನಾವು ಸಾರಾಸಗಟಾಗಿ ತಳ್ಳಿಹಾಕುತ್ತೇವೆ. ಇದು ಯಾವುದೇ ಆಧಾರ ಇಲ್ಲದ ವರದಿಗಳಾಗಿವೆ. ಕೆಲವರ ಕಲ್ಪನೆಯ ಕಥೆ ಇದಾಗಿದೆ. ಟೀಮ್ ಇಂಡಿಯಾ ತನ್ನ ನೀಲಿ ಬಣ್ಣದ ಸಮವಸ್ತ್ರ ತೊಟ್ಟೇ ಐಸಿಸಿ ಒಡಿಐ ವಿಶ್ವಕಪ್ 2023 ಟೂರ್ನಿಯಲ್ಲಿ ಆಡಲಿದೆ,” ಎಂದು ಬಿಸಿಸಿಐ ಆಶಿಶ್‌ ಶೆಲಾರ್‌ ಹೇಳಿರುವುದಾಗಿ ಹಿಂದೂಸ್ತಾನ್‌ ಟೈಮ್ಸ್ ವರದಿ ಮಾಡಿದೆ.
ಅಂದಹಾಗೆ ಟೀಮ್ ಇಂಡಿಯಾ ಅಭ್ಯಾಸ ವೇಳೆ ಬಳಸುತ್ತಿರುವ ಜರ್ಸಿ ಕೇಸರಿ ಮತ್ತು ಕಪ್ಪು ಬಣ್ಣದ್ದಾಗಿದೆ. ಹೀಗಾಗಿ ಹಲವರು ಸಂಪೂರ್ಣ ಕೇಸರಿ ಬಣ್ಣದ ಜರ್ಸಿ ತೊಟ್ಟು ಪಾಕಿಸ್ತಾನ ಎದುರು ಆಡಲಿದೆ ಎಂಬ ಗಾಳಿ ಸುದ್ದಿ ಹರಡಿದ್ದಾರೆ. ಆದರೆ, ಈ ಜರ್ಸಿ ಅಭ್ಯಾಸಕ್ಕೆ ಮಾತ್ರ ಸೀಮಿತವಾಗಿದೆ.
The post IND vs PAK: ಪಾಕ್‌ ಎದುರು ಟೀಂ ಇಂಡಿಯಾ ಆರೆಂಜ್ ಜರ್ಸಿ ತೊಟ್ಟು ಕಣಕ್ಕಿಳಿಯುತ್ತಾರಾ?!: ಇಲ್ಲಿದೆ appeared first on Ain Live News.
