ಬೆಂಗಳೂರು:
ಜನರ ಸಮಸ್ಯೆಗಳನ್ನು ಆಲಿಸಲು ಹಮ್ಮಿಕೊಂಡಿದ್ದ ‘ಬೆಂಗಳೂರು ನಡಿಗೆ’ ಕಾರ್ಯಕ್ರಮ ಭಾನುವಾರ ಜೆ.ಪಿ. ಪಾರ್ಕ್‌ನಲ್ಲಿ ರಾಜಕೀಯ ರಂಗಭೂಮಿಯಂತಾಗಿ ಮಾರ್ಪಟ್ಟಿತು.
ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ಸಾರ್ವಜನಿಕ ಸಂವಾದ ಕಾರ್ಯಕ್ರಮದಲ್ಲಿ ರಾಜರಾಜೇಶ್ವರಿ ನಗರ ಶಾಸಕ ಮುನಿರತ್ನ ಅವರೊಂದಿಗೆ ನಡೆದ ವಾಗ್ವಾದ ಭಾರೀ ಹೈಡ್ರಾಮಾಕ್ಕೆ ಕಾರಣವಾಯಿತು.
ಸಂಪೂರ್ಣ ಗೊಂದಲಕ್ಕೆ ಕಾರಣವಾದದ್ದು ಶಿವಕುಮಾರ್ ಅವರ ಒಂದು ಮಾತು —
“ಏ ಕರಿ ಟೋಪಿ ಎಂಎಲ್ಎ, ಬನ್ನಿ ಈ ಕಡೆ!”
ಆ ಮಾತಿನಿಂದಲೇ ‘ಕರಿ ಟೋಪಿ ಕದನ’ಕ್ಕೆ ತಲೆದೋರಿತು.
ಆರ್ಎಸ್ಎಸ್ ಶಿಬಿರ ಮುಗಿಸಿ ಆ ಸಂಸ್ಥೆಯ ಕರಿ ಟೋಪಿ ಧರಿಸಿ ಬಂದಿದ್ದ ಬಿಜೆಪಿ ಶಾಸಕ ಮುನಿರತ್ನ, ವೇದಿಕೆಗೆ ಆಹ್ವಾನ ನೀಡದಿದ್ದರೂ ಪ್ರೇಕ್ಷಕರ ನಡುವೆ ಕುಳಿತಿದ್ದರು. ಶಿವಕುಮಾರ್ ಅವರ ಕರೆಗೆ ಅಸಮಾಧಾನಗೊಂಡ ಮುನಿರತ್ನ ಮೈಕ್ ಹಿಡಿದು “ಈದು ಸಾರ್ವಜನಿಕರ ಕಾರ್ಯಕ್ರಮನಾ ಅಥವಾ ಕಾಂಗ್ರೆಸ್ ಸಭೆಯಾ?” ಎಂದು ಆಕ್ರೋಶಗೊಂಡರು.
“ಇಲ್ಲಿ ಒಬ್ಬ ಎಂಪಿ ಅಥವಾ ಎಂಎಲ್ಎ ಫೋಟೋ ಇಲ್ಲ! ಸಾರ್ವಜನಿಕರ ಸಭೆ ಅಂದ್ರು, ಆದರೆ ಕಾಂಗ್ರೆಸ್ ನಾಯಕರ ಫೋಟೋ ಮಾತ್ರ ಇದೆ!”
ಎಂದು ಮುನಿರತ್ನ ವೇದಿಕೆಯಲ್ಲಿ ಗರಂ ಆಗಿ ಮಾತನಾಡಿದರು.
ಅದಾದ ನಂತರ ಕಾಂಗ್ರೆಸ್ ಮತ್ತು ಬಿಜೆಪಿ ಕಾರ್ಯಕರ್ತರ ನಡುವೆ ಘೋಷಣೆಗಳು ಎದ್ದವು —
“ಧಿಕ್ಕಾರ ಧಿಕ್ಕಾರ ಮುನಿರತ್ನ !” ಎಂದು ಬಿಜೆಪಿಗರು ಕೂಗಿದರೆ, ಕಾಂಗ್ರೆಸ್ ಬೆಂಬಲಿಗರು “ಮುನಿರತ್ನ ವೇದಿಕೆಯಿಂದ ಇಳಿಯಲಿ!” ಎಂದು ಆಕ್ರೋಶ ಹೊರಹಾಕಿದರು.
ಗಲಾಟೆಯಲ್ಲಿ ಮುನಿರತ್ನರ ಆರ್ಎಸ್ಎಸ್ ಟೋಪಿ ಕಿತ್ತಿದ್ದಾರೆ ಎನ್ನುವ ಆರೋಪ ಕೂಡ ಕೇಳಿಬಂದಿತು.
“ನನ್ನ ಆರ್ಎಸ್ಎಸ್ ಟೋಪಿಯನ್ನು ಕಿತ್ತಿದ್ದಾರೆ, ಇದು ನನಗೆ ಮಾಡಿದ ಅವಮಾನ ಅಲ್ಲ, ಜನರಿಗೆ ಮಾಡಿದ ಅವಮಾನ!”
ಎಂದು ಕಣ್ಣೀರಿಟ್ಟ ಮುನಿರತ್ನ ಆರೋಪಿಸಿದರು.
ಅವರು ಇನ್ನೂ ಮುಂದೆ ಹೋಗಿ,
“ನನ್ನ ಮೇಲೆ ಹಲ್ಲೆ ಮಾಡಲು ಚನ್ನಪಟ್ಟಣ, ಕನಕಪುರ, ರಾಮನಗರದಿಂದ ರೌಡಿಗಳನ್ನು ಕರೆಸಿದ್ದಾರೆ,”
ಎಂದು ಗಂಭೀರ ಆರೋಪ ಮಾಡಿದರು.
ಪೊಲೀಸರು ಮಧ್ಯಪ್ರವೇಶಿಸಿ ಶಾಸಕರನ್ನು ವೇದಿಕೆಯಿಂದ ಕೆಳಗೆ ಕರೆತರಲು ಪ್ರಯತ್ನಿಸಿದರೂ, ಮುನಿರತ್ನ “ಇದು ಸಾರ್ವಜನಿಕ ಉದ್ಯಾನ, ನಾನು ಇಲ್ಲಿಂದ ಕದಲೋದಿಲ್ಲ” ಎಂದು ಪಟ್ಟು ಹಿಡಿದು ಕೆಲವು ನಿಮಿಷ ಮೌನ ಪ್ರತಿಭಟನೆ ನಡೆಸಿದರು.
ಡಿ.ಕೆ. ಶಿವಕುಮಾರ್ ಹಾಗೂ ಮುನಿರತ್ನರ ನಡುವಿನ ಹಳೆಯ ರಾಜಕೀಯ ವೈಷಮ್ಯ ಮತ್ತೆ ಹೊರಹೊಮ್ಮಿದ ಈ ಘಟನೆ ಈಗ ರಾಜಕೀಯ ವಲಯದಲ್ಲಿ ಭಾರೀ ಚರ್ಚೆಗೆ ಕಾರಣವಾಗಿದೆ.
ಮೂಲತಃ ನಾಗರಿಕರ ಸಮಸ್ಯೆ ಆಲಿಸಲು ರೂಪಿಸಲಾದ ‘ಬೆಂಗಳೂರು ನಡಿಗೆ’ ಅಭಿಯಾನ ಈ ಘಟನೆಯಿಂದ ಸಂಪೂರ್ಣ ರಾಜಕೀಯ ನಾಟಕವಾಗಿ ಮಾರ್ಪಟ್ಟಿದೆ.
ರಾಜಕೀಯ ವಿಶ್ಲೇಷಕರು ಹೇಳುವಂತೆ, ಈ ‘ಕರಿ ಟೋಪಿ ವಿವಾದ’ ರಾಜರಾಜೇಶ್ವರಿ ನಗರದಲ್ಲಿನ ಕಾಂಗ್ರೆಸ್–ಬಿಜೆಪಿ ಪೈಪೋಟಿಗೆ ಹೊಸ ತಿರುವು ನೀಡಿದೆ.
ಒಂದೇ ಪ್ರಶ್ನೆ ಇದೀಗ ನಗರದ ನಾಗರಿಕರ ಮನದಲ್ಲಿ ಮೂಡಿದೆ —
ಜೆ.ಪಿ. ಪಾರ್ಕ್ ಜನರ ಮಾತು ಕೇಳಲು ವೇದಿಕೆಯಾ, ಅಥವಾ ರಾಜಕೀಯ ನಾಯಕರ ಅಹಂಕಾರದ ಅಖಾಡವಾ?