ಬೆಂಗಳೂರು: ರಾಜಧಾನಿ ಮತ್ತೊಮ್ಮೆ ಅಪರಿಚಿತ ಮುಖವಾಡಧಾರಿಗಳ ಹಲ್ಲೆಯಿಂದ ನಡುಗಿದೆ. ಬೆಳ್ಳಂಬೆಳಗಿನ ಸಮಯದಲ್ಲಿ ನಡೆದ ಈ ಘಟನೆಯಲ್ಲಿ ಸಶಸ್ತ್ರ ದುಷ್ಕರ್ಮಿಗಳು ದಾಳಿ ನಡೆಸಿ 35ಕ್ಕೂ ಹೆಚ್ಚು ವಾಹನಗಳನ್ನು ಧ್ವಂಸಗೊಳಿಸಿದ್ದಾರೆ.
ಮಾಹಿತಿಯ ಪ್ರಕಾರ, ಬೈದರಹಳ್ಳಿ ವಾಲ್ಮೀಕಿ ನಗರದಲ್ಲಿ ಸುಮಾರು ಐದುರಿಂದ ಆರು ಮಂದಿಯ ಮಾಸ್ಕ್ ಧರಿಸಿದ ಗ್ಯಾಂಗ್, ಮದ್ಯದ ನಶೆಯಲ್ಲಿ ಕತ್ತಿ, ಕಬ್ಬಿಣದ ರಾಡ್ ಹಿಡಿದು ವಾಹನಗಳ ಮೇಲೆ ಹಲ್ಲೆ ನಡೆಸಿದೆ. ಕಾರುಗಳ ಗಾಜು ಒಡೆದು, ಬೈಕ್‌ಗಳನ್ನು ಧ್ವಂಸಮಾಡಿದ ಆರೋಪ ಕೇಳಿಬಂದಿದೆ.
Also Read: Masked Gang Goes on Rampage in Bengaluru, 35 Vehicles Vandalized in Late-Night Attack
“ನಾವು ತಡೆಯಲು ಹೋಗುತ್ತಿದ್ದಂತೆ ದುಷ್ಕರ್ಮಿಗಳು ಮಚ್ಚು ತೋರಿಸಿ ಬೆದರಿಸಿದರು. ಮನೆ ಮುಂದೆ ನಿಲ್ಲಿಸಿದ್ದ ಕಾರುಗಳನ್ನು ಒಡೆದು, ಬಳಿಕ ಪರಾರಿಯಾದರು,” ಎಂದು ಸ್ಥಳೀಯ ನಿವಾಸಿ ಒಬ್ಬರು ಭೀತಿಯಿಂದ ಹೇಳಿದರು.
ಮುದ್ದಯ್ಯನಪಾಳ್ಯದಲ್ಲೂ ದಾಳಿ
ಅದೇ ಗ್ಯಾಂಗ್ ಅನ್ನಪೂರ್ಣೇಶ್ವರಿ ನಗರ ಮುದ್ದಯ್ಯನಪಾಳ್ಯ ಪ್ರದೇಶದಲ್ಲೂ ಕೃತ್ಯ ಮರುಕಳಿಸಿದ್ದು, 10 ಕಾರುಗಳನ್ನು ಒಡೆದು ಹಾಕಿದೆ. ಅಲ್ಲಿ ಸ್ಥಳೀಯ ಆಟೋ ಚಾಲಕನು ಪ್ರತಿರೋಧಿಸಲು ಹೋಗಿದ್ದಾಗ ದುಷ್ಕರ್ಮಿಗಳಿಂದ ಹಲ್ಲೆಗೊಳಗಾದ ಘಟನೆ ನಡೆದಿದೆ.
ಸಿಸಿಟಿವಿಯಲ್ಲಿ ಸೆರೆಯಾದ ಹಿಂಸಾಚಾರ
ಘಟನೆ ನಡೆದ ಸ್ಥಳಗಳಲ್ಲಿ ಅಳವಡಿಸಿದ್ದ ಸಿಸಿಟಿವಿ ಕ್ಯಾಮೆರಾಗಳಲ್ಲಿ ದುಷ್ಕರ್ಮಿಗಳ ಕೃತ್ಯಗಳು ಸ್ಪಷ್ಟವಾಗಿ ದಾಖಲಾಗಿದೆ. ಈ ದೃಶ್ಯಾವಳಿ ಪೊಲೀಸರು ತನಿಖೆ ಮುಂದುವರಿಸಲು ಪ್ರಮುಖ ಸಾಕ್ಷಿಯಾಗಿದೆ.
ಪೊಲೀಸರ ಕ್ರಮ
ಇಲ್ಲಿಯವರೆಗೆ 10 ಎಫ್‌ಐಆರ್‌ಗಳು ದಾಖಲಾಗಿದ್ದು, ದುಷ್ಕರ್ಮಿಗಳನ್ನು ಪತ್ತೆ ಹಚ್ಚಲು ಪೊಲೀಸರು ಬಲೆ ಬೀಸಿದ್ದಾರೆ. ಸ್ಥಳೀಯರು ಪೊಲೀಸರು ರಾತ್ರಿ ಪಟ್ರೋಲಿಂಗ್ ಬಲಪಡಿಸಬೇಕು ಎಂದು ಒತ್ತಾಯಿಸಿದ್ದಾರೆ.