ಬೆಂಗಳೂರು: ನಾಗರಿಕರು ಇದೀಗ ವಾರ್ಡ್ ಮಟ್ಟದ ಗಡಿಗಳನ್ನು ಜಿಯೋ ಗ್ರಾಫಿಕ್ ಇನ್‌ಫರ್ಮೇಷನ್ ಸಿಸ್ಟಮ್ (GIS) ಆಪ್ ಮೂಲಕ ವೀಕ್ಷಿಸಬಹುದು ಎಂದು ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA) ವಿಶೇಷ ಆಯುಕ್ತ (ಆಡಳಿತ, ಕಂದಾಯ ಮತ್ತು ಐಟಿ) ಮುನೀಶ್ ಮೌದ್ಗಿಲ್ ಘೋಷಿಸಿದ್ದಾರೆ.
ಈ ಆಪ್ ಬಳಕೆ ವಿಧಾನವನ್ನು ತೋರಿಸುವ ವೀಡಿಯೊ ಬಿಡುಗಡೆ ಮಾಡಲಾಗಿದ್ದು, ನಾಗರಿಕರು ಸುಲಭವಾಗಿ ವಾರ್ಡ್ ಮಟ್ಟದ ಮಾಹಿತಿ ಮತ್ತು ಗಡಿಗಳನ್ನು ವೀಕ್ಷಿಸುವುದು, ನಕ್ಷೆಗಳಲ್ಲಿ ಸಂಚರಿಸುವುದು ಹೇಗೆ ಸಾಧ್ಯ ಎನ್ನುವುದನ್ನು ತೋರಿಸಲಾಗಿದೆ. ಇದರಿಂದ ಪಾರದರ್ಶಕತೆ, ಉತ್ತಮ ಆಡಳಿತ ಮತ್ತು ನಗರ ಯೋಜನಾ ಮಾಹಿತಿಗಳಿಗೆ ಸುಲಭ ಪ್ರವೇಶ ದೊರೆಯಲಿದೆ.
ಶೀಘ್ರದಲ್ಲೇ ಸುಧಾರಿತ ಆವೃತ್ತಿ
ಮುನೀಶ್ ಮೌದ್ಗಿಲ್ ಅವರ ಹೇಳಿಕೆಯಂತೆ, ಶೀಘ್ರದಲ್ಲೇ ಇನ್ನಷ್ಟು ಸುಧಾರಿತ ಮತ್ತು ಬಳಕೆದಾರ ಸ್ನೇಹಿ ಆವೃತ್ತಿ ಜಿಬಿಎ ದಿಶಾಂಕ್ ಆಪ್ ಮೂಲಕ ಲಭ್ಯವಾಗಲಿದೆ. ಇದರಲ್ಲಿ ಹೆಚ್ಚಿನ ನಕ್ಷಾ ವೈಶಿಷ್ಟ್ಯಗಳು, ಗಡಿ ಮಾಹಿತಿ ಹಾಗೂ ನಗರ ಯೋಜನಾ ಡೇಟಾಗಳನ್ನು ಸಾರ್ವಜನಿಕರಿಗೆ ತಲುಪಿಸಲಾಗುವುದು.
“ಹೊಸ ಆವೃತ್ತಿಯ ಮೂಲಕ ನಾಗರಿಕರು ತಮ್ಮ ವಾರ್ಡ್ ಗಡಿಗಳನ್ನು ಸುಲಭವಾಗಿ ವೀಕ್ಷಿಸಿ, ನಗರ ಯೋಜನಾ ಮಾಹಿತಿಯನ್ನು ಸರಳವಾಗಿ ಬಳಸಿಕೊಳ್ಳಲು ಸಾಧ್ಯವಾಗಲಿದೆ,” ಎಂದು ಮೌದ್ಗಿಲ್ ಹೇಳಿದರು.
