ಬೆಂಗಳೂರು: ಬೆಂಗಳೂರು ನಗರವನ್ನು ದೇಶದ “ವಾಟರ್ ಸ್ಟಾರ್ಟ್‌ಅಪ್ ಕ್ಯಾಪಿಟಲ್” ಆಗಿ ರೂಪಿಸುವ ಗುರಿಯನ್ನು ಹೊಂದಿರುವ ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿ (BWSSB) ಇದೀಗ ವಾಟರ್ ಟೆಕ್ ಸ್ಟಾರ್ಟ್‌ಅಪ್‌ಗಳಿಗೆ ತಮ್ಮ ನವೀನ ತಂತ್ರಜ್ಞಾನದ **ಪ್ರೂಫ್ ಆಫ್ ಕಾನ್‌ಸೆಪ್ಟ್‌ (PoC)**ವನ್ನು ಸರ್ಕಾರಿ ಎಸ್‌ಟಿಪಿಗಳಲ್ಲಿ ಪ್ರದರ್ಶಿಸಲು ಮುಕ್ತ ಅವಕಾಶ ನೀಡುವುದಾಗಿ ಜಲಮಂಡಳಿ ಅಧ್ಯಕ್ಷ ಡಾ. ರಾಮ್ ಪ್ರಸಾತ್ ಮನೋಹರ್ ಹೇಳಿದರು.
ನಗರದ ಕಾಡುಬೀಸನಹಳ್ಳಿ ತ್ಯಾಜ್ಯ ನೀರು ಸಂಸ್ಕರಣಾ ಘಟಕದಲ್ಲಿ, ಮೊದಲ ಹಂತವಾಗಿ ಒಂದು ವಾಟರ್ ಸ್ಟಾರ್ಟ್‌ಅಪ್ ಕಂಪನಿ ಸ್ಥಾಪಿಸಿದ ಯಂತ್ರೋಪಕರಣಗಳಿಗೆ ಶುಕ್ರವಾರ ಚಾಲನೆ ನೀಡಿದ ಬಳಿಕ ಅವರು ಮಾತನಾಡಿದರು.
ವಾಟರ್ ಸ್ಟಾರ್ಟ್‌ಅಪ್‌ಗಳಿಗೆ ಜಲಮಂಡಳಿಯಿಂದ ಮೊದಲ ಬಾರಿಗೆ PoC ಅವಕಾಶ
“ಬೆಂಗಳೂರುವನ್ನು ವಾಟರ್ ಸ್ಟಾರ್ಟ್‌ಅಪ್ ಕ್ಯಾಪಿಟಲ್ ಮಾಡುವ ದಿಕ್ಕಿನಲ್ಲಿ ನಾವು ಚಿಂತನೆ ಮಾಡುತ್ತಿದ್ದೇವೆ. ಮೊದಲ ಹಂತವಾಗಿ ಒಂದು ಸ್ಟಾರ್ಟ್‌ಅಪ್‌ಗೆ ಅವಕಾಶ ನೀಡಿದ್ದೇವೆ. ಇದನ್ನು ಮುಂದುವರಿಸಿ, ನೀರಿನ ನಿರ್ವಹಣೆ, ಮರುಬಳಕೆ, ಸಂರಕ್ಷಣೆ ಹಾಗೂ ತಂತ್ರಜ್ಞಾನ ಆಧಾರಿತ ಪರಿಹಾರಗಳ ಮೇಲೆ ಕೆಲಸ ಮಾಡುತ್ತಿರುವ ಸ್ಟಾರ್ಟ್‌ಅಪ್ ಕಂಪನಿಗಳು ತಮ್ಮ PoC ಯೋಜನೆಗಳನ್ನು ಜಲಮಂಡಳಿಯ ಘಟಕಗಳಲ್ಲಿ ಪೈಲೆಟ್ ರೂಪದಲ್ಲಿ ಜಾರಿಗೊಳಿಸಲು ಪೂರ್ಣ ಅವಕಾಶ ನೀಡಲು ಸಿದ್ಧರಿದ್ದೇವೆ,” ಎಂದು ಅವರು ಹೇಳಿದರು.
ದೇಶದಲ್ಲೇ ಪ್ರಪ್ರಥಮ ಐತಿಹಾಸಿಕ ಹೆಜ್ಜೆ
ಈ ಯೋಜನೆ ದೇಶದಲ್ಲೇ ಮೊದಲ ಬಾರಿಗೆ ಒಂದು ಸರ್ಕಾರಿ ಜಲಮಂಡಳಿಯು ಖಾಸಗಿ ಸ್ಟಾರ್ಟ್‌ಅಪ್ ಸಂಸ್ಥೆಗೆ ನೈಜ ಕಾರ್ಯಾಚರಣೆಯ ಮಧ್ಯೆ ನೀರು ಮರುಬಳಕೆ ತಂತ್ರಜ್ಞಾನ ಪ್ರದರ್ಶಿಸಲು ಅವಕಾಶ ನೀಡಿರುವ ಐತಿಹಾಸಿಕ ಹೆಜ್ಜೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಯೋಜನೆಯಡಿ, ಎಸ್‌ಟಿಪಿಯಿಂದ ಸಂಸ್ಕರಿಸಿದ ನೀರನ್ನು ಮತ್ತಷ್ಟು ಅಭಿವೃದ್ಧಿಯುತ 11 ಹಂತದ ಶುದ್ದೀಕರಣ ವ್ಯವಸ್ಥೆ ಮೂಲಕ ಶುದ್ಧೀಕರಿಸಲಾಗುತ್ತದೆ. ಘಟಕವು ಪ್ರತಿದಿನ 70,000 ಲೀಟರ್ಗಳಷ್ಟು ಉನ್ನತ ಗುಣಮಟ್ಟದ (ಕುಡಿಯುವ ಮಟ್ಟಕ್ಕೆ ಸಮೀಪ) ನೀರನ್ನು ಉತ್ಪಾದಿಸಲಿದೆ.
ಬಳಕೆದಾರರು
• ಹೊರವರ್ತುಲ ರಸ್ತೆಯ (ORR) ಸುತ್ತಮುತ್ತಲಿನ ಕೈಗಾರಿಕೆಗಳು ಮತ್ತು ವಾಣಿಜ್ಯ ಸಂಸ್ಥೆಗಳು — ವಿಶೇಷವಾಗಿ ಕೂಲಿಂಗ್ ಟವರ್‌ಗಳಿಗಾಗಿ ಈ ನೀರನ್ನು ಪಡೆಯಲಿವೆ.
ಪರಿಸರ ಲಾಭ
• ನಗರದ ಸಿಹಿನೀರಿನ ಬಳಕೆ ಒತ್ತಡ ಕಡಿಮೆ
• ತ್ಯಾಜ್ಯ ನೀರು ಕೆರೆಗಳಿಗೆ ಸೇರುವ ಸಮಸ್ಯೆಗೆ ತಡೆ
• ನಗರಕ್ಕೆ ಸಂರಕ್ಷಿತ ‘ಸರ್ಕ್ಯುಲರ್ ವಾಟರ್’ ಮಾದರಿ
ಹೂಡಿಕೆ ಮಾದರಿ ಮತ್ತು ಜಲಮಂಡಳಿಯ ಪಾತ್ರ
ಯೋಜನೆಯಲ್ಲಿ ಜಲಮಂಡಳಿಯಿಂದ ಯಾವುದೇ ಬಂಡವಾಳ ಹೂಡಿಕೆ ಇರುವುದಿಲ್ಲ.
• ಸ್ಟಾರ್ಟ್‌ಅಪ್ ಕಂಪನಿಯೇ ತನ್ನ ಸ್ವಂತ ವೆಚ್ಚದಲ್ಲಿ ಎಲ್ಲಾ ಯಂತ್ರೋಪಕರಣಗಳನ್ನು ಅಳವಡಿಸುತ್ತದೆ.
• ಜಲಮಂಡಳಿಯು ಕಚ್ಚಾ ವಸ್ತುವಾಗಿ ಸಂಸ್ಕರಿಸಿದ ತ್ಯಾಜ್ಯ ನೀರನ್ನು ಒದಗಿಸುತ್ತದೆ.
• ಶುದ್ಧೀಕರಿಸಿದ ನೀರನ್ನು ಮಾರಾಟ ಮಾಡಲು ಮಾರುಕಟ್ಟೆ ಸಂಪರ್ಕ ಕಲ್ಪಿಸಲು ಸಹಾಯ ಮಾಡುತ್ತದೆ.