ಬೆಂಗಳೂರು, ಫೆ.25: ಸಾರಕ್ಕಿ ಕೆರೆ ಅತಿಕ್ರಮಣ ಪ್ರಕರಣದಲ್ಲಿ ಕರ್ನಾಟಕ ಉಚ್ಚ ನ್ಯಾಯಾಲಯ ನೀಡಿದ ಆದೇಶದ ಅನಂತರ ಮಹತ್ವದ ಬೆಳವಣಿಗೆಯಾಗಿ ರಾಜ್ಯದ ಮುಖ್ಯ ಕಾರ್ಯದರ್ಶಿ ಡಾ. ಶಾಲಿನಿ ರಜನೀಶ್ ಅವರು ಹೈಕೋರ್ಟ್ ನಿರ್ದೇಶನದಂತೆ ವಿಶೇಷ ಸಮಿತಿಯನ್ನು ರಚಿಸಿದ್ದಾರೆ.
ಪಿಐಎಲ್ ಸಂಖ್ಯೆ 3703/2023ರಲ್ಲಿ ಸಾರಕ್ಕಿ ಕೆರೆ ಪ್ರದೇಶ ಸುಧಾರಣಾ ಟ್ರಸ್ಟ್ ಸಲ್ಲಿಸಿದ್ದ ಅರ್ಜಿಯನ್ನು ವಿಚಾರಿಸಿದ ಹೈಕೋರ್ಟ್, ಕೆರೆಯ 30 ಮೀಟರ್ ಬಫರ್ ವಲಯದಲ್ಲಿ ನಡೆದಿರುವ ಅನಧಿಕೃತ ಕಟ್ಟಡ ನಿರ್ಮಾಣಗಳ ಕುರಿತು ಕಾನೂನುಬದ್ಧ ಕ್ರಮ ಕೈಗೊಳ್ಳಲು ಸರ್ಕಾರಕ್ಕೆ ಸೂಚಿಸಿತ್ತು.
ಹೈಕೋರ್ಟ್ ನಿರ್ದೇಶನದಂತೆ ರಚಿಸಲಾದ ಸಮಿತಿಯಲ್ಲಿ:
- ಅಧ್ಯಕ್ಷರು: ಮುಖ್ಯ ಆಯುಕ್ತರು, ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (GBA)
- ಸದಸ್ಯರು: ಜಿಲ್ಲಾಧಿಕಾರಿ, ಬೆಂಗಳೂರು ನಗರ
- ಸದಸ್ಯರು: ಮುಖ್ಯ ಕಾರ್ಯನಿರ್ವಹಣಾಧಿಕಾರಿ, ಕರ್ನಾಟಕ ಕರೆ ಸಂರಕ್ಷಣೆ ಮತ್ತು ಅಭಿವೃದ್ಧಿ ಪ್ರಾಧಿಕಾರ
ಸಮಿತಿಗೆ ಸಂಬಂಧಿತ ಎಲ್ಲಾ ಅಂಶಗಳನ್ನು ಪರಿಶೀಲಿಸಿ ಸರ್ಕಾರದ ಮುಖ್ಯ ಕಾರ್ಯದರ್ಶಿಗೆ ಎರಡು ತಿಂಗಳೊಳಗೆ ವರದಿ ಸಲ್ಲಿಸಲು ಸೂಚಿಸಲಾಗಿದೆ.
ಸಮಿತಿ ಕೆಳಗಿನ ವಿಷಯಗಳ ಕುರಿತು ಪರಿಶೀಲನೆ ನಡೆಸಲಿದೆ:
- 30 ಮೀಟರ್ ಬಫರ್ ವಲಯ ಉಲ್ಲಂಘನೆಗಳ ಗುರುತಿಕೆ
- ರಾಜಕಾಲುವೆ ಮತ್ತು ಕೆರೆಯ ಮೂಲ ಸ್ವರೂಪಕ್ಕೆ ಹಾನಿಯಾದ ಅಂಶಗಳು
- ಅನಧಿಕೃತ ಕಟ್ಟಡಗಳ ವಿರುದ್ಧ ಕಾನೂನು ಕ್ರಮ
- ಕೆರೆಯ ಸಂರಕ್ಷಣೆ ಮತ್ತು ಪುನರ್ ಸ್ಥಾಪನೆಗೆ ಕೈಗೊಂಡ ಕ್ರಮಗಳು
- ಮಾಸ್ಟರ್ ಪ್ಲಾನ್ ಹಾಗೂ ರಾಜಸ್ವ ದಾಖಲೆಗಳಿಗೆ ಅನುಗುಣತ
ಹೈಕೋರ್ಟ್ ತನ್ನ ಆದೇಶದಲ್ಲಿ, ಅತಿಕ್ರಮಣ ತೆರವುಗೆ ನೋಟಿಸ್ ಪಡೆಯುವ ವ್ಯಕ್ತಿಗಳ ಕಾನೂನು ಹಕ್ಕುಗಳನ್ನು ಸಂರಕ್ಷಿಸಿದೆ. ಅವರು ಕಾನೂನುಬದ್ಧವಾಗಿ ತಮ್ಮ ವಾದ ಮಂಡಿಸಬಹುದಾಗಿದೆ ಎಂದು ಸ್ಪಷ್ಟಪಡಿಸಿದೆ.
ಜೆಪಿ ನಗರ 6ನೇ ಮತ್ತು 7ನೇ ಹಂತಗಳ ಮಧ್ಯದಲ್ಲಿರುವ ಸಾರಕ್ಕಿ ಕೆರೆ ದಕ್ಷಿಣ ಬೆಂಗಳೂರಿನ ಪ್ರಮುಖ ಜಲಾಶಯವಾಗಿದ್ದು, ಭೂಗರ್ಭ ಜಲಮಟ್ಟ ಮತ್ತು ಪ್ರವಾಹ ನಿಯಂತ್ರಣಕ್ಕೆ ಮಹತ್ವದ್ದಾಗಿದೆ. ಹೈಕೋರ್ಟ್ ಆದೇಶದ ಅನಂತರ ಸಮಿತಿ ರಚನೆಯಾಗಿರುವುದು ಕೆರೆ ಸಂರಕ್ಷಣೆಯ ದಿಕ್ಕಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ.
ಇದೀಗ ಸಮಿತಿಯ ಸ್ಥಳ ಪರಿಶೀಲನೆ ಹಾಗೂ ಕ್ರಮಗಳ ಮೇಲೆಯೇ ಮುಂದಿನ ಬೆಳವಣಿಗೆಗಳು ಅವಲಂಬಿತವಾಗಿವೆ.
