ಬೆಂಗಳೂರು: ಹಿರಿಯ ಕನ್ನಡ ಸಾಹಿತಿ, ಪದ್ಮಭೂಷಣ ಪ್ರಶಸ್ತಿ ಪುರಸ್ಕೃತ ಡಾ. ಎಸ್.ಎಲ್. ಭೈರಪ್ಪ (94) ಇಂದು ಬೆಂಗಳೂರಿನಲ್ಲಿ ವಯೋಸಹಜ ಅಸ್ವಸ್ಥತೆಯಿಂದ ವಿಧಿವಶರಾದರು. ರಾಜರಾಜೇಶ್ವರಿ ನಗರದಲ್ಲಿರುವ ಖಾಸಗಿ ಆಸ್ಪತ್ರೆಯಲ್ಲಿ ಅವರು ಚಿಕಿತ್ಸೆ ಪಡೆಯುತ್ತಿದ್ದರು.
ಭೈರಪ್ಪ ಅವರು ಕನ್ನಡ ಸಾಹಿತ್ಯ ಲೋಕದಲ್ಲಿ ಮಹತ್ತರ ಕೃತಿಗಳ ಸೃಷ್ಟಿಕರ್ತ, ತತ್ವಜ್ಞಾನಿ ಮತ್ತು ನಿರ್ಭೀತಿಯ ಚಿಂತಕರಾಗಿ ಹೆಸರು ಮಾಡಿದ್ದರು. ಅವರ ಪ್ರಸಿದ್ಧ ಕಾದಂಬರಿಗಳು ವಂಶವೃಕ್ಷ, ಗೃಹಭಂಗ, ದಾಟು, ಪರ್ವ, ಸಾರ್ಥ, ತಂತು, ಹಾಗೂ ಆವರಣ ಇಂದಿಗೂ ಓದುಗರ ಮನದಲ್ಲಿ ಅಚ್ಚಳಿಯದೆ ಉಳಿದಿವೆ.
ಅವರ ಹಲವಾರು ಕೃತಿಗಳು ಚಿತ್ರ-ಟಿವಿ ಧಾರಾವಾಹಿಗಳಾಗಿ ಮೂಡಿಬಂದು ಜನಪ್ರಿಯತೆ ಪಡೆದಿವೆ. ವಂಶವೃಕ್ಷ ಹಾಗೂ ತಬ್ಬಲಿಯು ನೀನಾದೆ ಮಗನೇ ಚಿತ್ರರೂಪದಲ್ಲಿ ರಾಷ್ಟ್ರೀಯ ಪ್ರಶಸ್ತಿಗಳನ್ನು ಪಡೆದವು.
ಸಾಮಾಜಿಕ ವಾಸ್ತವ್ಯ, ಇತಿಹಾಸ, ತತ್ವಚಿಂತನೆ, ಮಾನವ ಸಂಬಂಧಗಳು ಮತ್ತು ಧಾರ್ಮಿಕ-ಸಾಂಸ್ಕೃತಿಕ ಪ್ರಶ್ನೆಗಳು ಅವರ ಬರಹಗಳಲ್ಲಿ ಪ್ರತಿಫಲಿಸಿವೆ. ಪರ್ವ ಮೂಲಕ ಅವರು ಮಹಾಭಾರತವನ್ನು ಆಧುನಿಕ ದೃಷ್ಟಿಕೋನದಲ್ಲಿ ಮರುಕಥನ ಮಾಡಿ ಕನ್ನಡ ಸಾಹಿತ್ಯಕ್ಕೆ ನೂತನ ದಿಕ್ಕನ್ನು ನೀಡಿದರು.
Also Read: Renowned Kannada Novelist S.L. Bhyrappa Passes Away at 94, Leaves Behind Timeless Literary Legacy
1931ರಲ್ಲಿ ಹಾಸನ ಜಿಲ್ಲೆಯ ಸಂತೆಶಿವರದಲ್ಲಿ ಜನಿಸಿದ ಭೈರಪ್ಪ, ಆರು ದಶಕಗಳಿಗಿಂತ ಹೆಚ್ಚು ಕಾಲ ಕನ್ನಡ ಸಾಹಿತ್ಯಕ್ಕೆ ಅಪಾರ ಕೊಡುಗೆ ನೀಡಿದ್ದಾರೆ. ದಾಟು ಕಾದಂಬರಿಗಾಗಿ 1975ರಲ್ಲಿ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ಲಭಿಸಿತು. ರಾಜ್ಯ ಹಾಗೂ ರಾಷ್ಟ್ರ ಮಟ್ಟದ ಅನೇಕ ಪ್ರಶಸ್ತಿಗಳನ್ನು ಅವರು ತಮ್ಮ ಹೆಸರಿಗೆ ದಾಖಲಿಸಿಕೊಂಡಿದ್ದರು.
ಅವರ ನಿಧನದಿಂದ ಕನ್ನಡ ಹಾಗೂ ಭಾರತೀಯ ಸಾಹಿತ್ಯ ಲೋಕವು ಅಪಾರ ಶೂನ್ಯವನ್ನು ಅನುಭವಿಸಿದೆ.