ಬೆಂಗಳೂರು: ಸ್ವಚ್ಛ ಭಾರತ ಹಾಗೂ ಸ್ವಚ್ಛ ಬೆಂಗಳೂರು ಅಭಿಯಾನಕ್ಕೆ ವೇಗ ತುಂಬುವ ಉದ್ದೇಶದಿಂದ ಇಂದು ಬೆಳಿಗ್ಗೆ ಬೆಂಗಳೂರಿನ ಕೇಂದ್ರ ನಗರ ಪಾಲಿಕೆ ವ್ಯಾಪ್ತಿಯ ಆರು ವಿಧಾನಸಭಾ ಕ್ಷೇತ್ರಗಳಲ್ಲಿ ಭಾರೀ ಸಾಮೂಹಿಕ ಸ್ವಚ್ಛತಾ ಅಭಿಯಾನ ನಡೆಸಲಾಯಿತು.
ಬೆಳಗ್ಗೆ 6 ಗಂಟೆಯಿಂದ ಪ್ರಾರಂಭವಾದ ಈ ಸ್ಪೆಷಲ್ ಕ್ಲೀನ್–ಅಪ್ ಡ್ರೈವ್‌ನಲ್ಲಿ 538 ಪೌರಕಾರ್ಮಿಕರು ಪಾಲ್ಗೊಂಡು 17.3 ಕಿಲೋಮೀಟರ್ ರಸ್ತೆಗಳಲ್ಲಿ ಸ್ವಚ್ಛತಾ ಕಾರ್ಯ ನಿರ್ವಹಿಸಿದರು. ಇದಕ್ಕೆ ಬೆಂಬಲವಾಗಿ 48 ಟ್ರಾಕ್ಟರ್‌ಗಳು, 7 ಜೆ.ಸಿ.ಬಿ. ಯಂತ್ರಗಳು ಬಳಸಲಾಗಿದ್ದು, 52 ಲೋಡ್ ತ್ಯಾಜ್ಯ, 19 ಬ್ಲ್ಯಾಕ್ ಸ್ಪಾಟ್‌ಗಳು, 14 ಪಾದಚಾರಿ ಒತ್ತುವರಿ ಸ್ಥಳಗಳನ್ನು ತೆರವುಗೊಳಿಸಲಾಯಿತು.
ಬೆಳಗ್ಗೆ 7 ಗಂಟೆಗೆ ಸ್ವಚ್ಛತಾ ಕಾರ್ಯವನ್ನು ಪರಿಶೀಲಿಸಲು ಸ್ಥಳಗಳಿಗೆ ಭೇಟಿ ನೀಡಿದ ಬೆಂಗಳೂರು ಕೇಂದ್ರ ನಗರ ಪಾಲಿಕೆ ಆಯುಕ್ತ ರಾಜೇಂದ್ರ ಚೋಳನ್, “ಆರೋಗ್ಯಯುತ ನಗರಕ್ಕಾಗಿ ಸಾಮೂಹಿಕ ಸ್ವಚ್ಛತಾ ಕಾರ್ಯಗಳು ಅತ್ಯಂತ ಅಗತ್ಯ. ಅಧಿಕಾರಿಗಳು ನಿರಂತರ ಜಾಗ್ರತೆ ವಹಿಸಿ ಕಾರ್ಯೋನ್ಮುಖವಾಗಿರಬೇಕು,” ಎಂದು ಸೂಚಿಸಿದರು.
ಇಂದಿರಾನಗರ ಡಬಲ್ ರಸ್ತೆ, 100 ಅಡಿ ರಸ್ತೆ ಹಾಗೂ ಶಿವಾಜಿನಗರದ ಸೆಂಟ್ ಜಾನ್ ರಸ್ತೆಯಲ್ಲಿ ಪರಿಶೀಲನೆ ನಡೆಸಿದ ಅವರು, ರಸ್ತೆ ಹಾಗೂ ಪಾದಚಾರಿ ಮಾರ್ಗಗಳಲ್ಲಿ ಕಂಡುಬಂದ ಅನಗತ್ಯ ವಸ್ತುಗಳು, ವಾರಸುದಾರರಿಲ್ಲದ ವಾಹನಗಳು, ಬಳಕೆಯಾಗದ ಪೆಟ್ಟಿ ಅಂಗಡಿಗಳು, ತಳ್ಳುಗಾಡಿಗಳು ಇತ್ಯಾದಿಗಳನ್ನು ತಕ್ಷಣ ತೆರವುಗೊಳಿಸಲು ಆದೇಶ ನೀಡಿದರು.
ಇಂದಿರಾನಗರದಲ್ಲಿರುವ ಒಂದು ಖಾಲಿ ಜಾಗದಲ್ಲಿ ಅಕ್ರಮವಾಗಿ ತ್ಯಾಜ್ಯ ಸುರಿದು ಅಶುಚಿತ್ವ ಉಂಟಾಗಿದ್ದ ಹಿನ್ನೆಲೆಯಲ್ಲಿ, ಅದನ್ನು ಕೂಡಲೇ ಸ್ವಚ್ಛಗೊಳಿಸಿ ಜಾಗದ ಮಾಲೀಕರಿಗೆ ದಂಡ ವಿಧಿಸುವಂತೆ ಸೂಚಿಸಿದರು.
ಪೌರಕಾರ್ಮಿಕರೊಂದಿಗೆ ಮಾತನಾಡಿ ಅವರ ಕುಶಲೋಪರಿ ವಿಚಾರಿಸಿದ ಆಯುಕ್ತ ಚೋಳನ್, ಅವರ ಸಮಸ್ಯೆಗಳನ್ನು ಆಲಿಸಿ, ಪರಿಹಾರಕ್ಕಾಗಿ ಸಂಬಂಧಿತ ಅಧಿಕಾರಿಗಳಿಗೆ ಸೂಚನೆ ನೀಡಿದರು.
ಸ್ವಚ್ಛತಾ ಕಾರ್ಯದ ವಿಸ್ತೃತ ಅಂಕಿಅಂಶಗಳ ಪಟ್ಟಿ ನಗರ ಪಾಲಿಕೆಯ ವತಿಯಿಂದ ಲಗತ್ತಿಸಲಾಗಿದೆ.
