ಬೆಂಗಳೂರು: ‘ವಾರ್ಡ್ ಒನ್’ ಅಭಿಯಾನದ ಮೂರನೇ ಹಂತದ ಭಾಗವಾಗಿ ಬೆಂಗಳೂರು ದಕ್ಷಿಣ ನಗರ ಪಾಲಿಕೆಯ 5 ವಿಭಾಗಗಳ 9 ವಾರ್ಡ್‌ಗಳ 18 ಪ್ರಮುಖ ರಸ್ತೆಗಳಲ್ಲಿ ವಿಶೇಷ ಸ್ವಚ್ಛತಾ ಅಭಿಯಾನ ನಡೆಸಲಾಗುವುದು ಎಂದು ಪಾಲಿಕೆ ಆಯುಕ್ತ ಕೆ.ಎನ್. ರಮೇಶ್ ಗುರುವಾರ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಈ ಅಭಿಯಾನಕ್ಕಾಗಿ 14 ಜೆಸಿಬಿ, 4 ಟಿಪ್ಪರ್ ಮತ್ತು 54 ಟ್ರ್ಯಾಕ್ಟರ್‌ಗಳ ಜೊತೆಗೆ ಮಾರ್ಷಲ್‌ಗಳು, ಪೌರಕಾರ್ಮಿಕರು ಮತ್ತು ಕಿರಿಯ ಆರೋಗ್ಯ ನಿರೀಕ್ಷಕರು ಸೇರಿ 191 ಕಾರ್ಮಿಕರನ್ನು ನಿಯೋಜಿಸಲಾಗಿದೆ. ಅಂಜನಾಪುರ ಮತ್ತು ಬೇಗೂರು ವಿಭಾಗಕ್ಕೆ (ವಾರ್ಡ್ 36, 37 ಮತ್ತು 38) 3 ಜೆಸಿಬಿ, 20 ಟ್ರ್ಯಾಕ್ಟರ್ ಹಾಗೂ 80 ಕಾರ್ಮಿಕರನ್ನು ನೀಡಲಾಗಿದೆ.
ಅಂಜನಾಪುರ ಮತ್ತು ಬೇಗೂರು ವಿಭಾಗದಲ್ಲಿ ಬೇಗೂರು ವಾರ್ಡ್‌ನ ಹೊಗೆಬಂಡಿ ಮುಖ್ಯ ರಸ್ತೆ, ಯಲಹಳ್ಳಿಯ ಬೇಗೂರು–ಹುಳಿಮಾವು ಮುಖ್ಯ ರಸ್ತೆ ಹಾಗೂ ದೊಡ್ಡಕಮ್ಮನಹಳ್ಳಿಯ ಬನ್ನೇರುಘಟ್ಟ ಮುಖ್ಯ ರಸ್ತೆ ಮತ್ತು ದೊಡ್ಡಕಮ್ಮನಹಳ್ಳಿ ಮುಖ್ಯ ರಸ್ತೆಗಳಲ್ಲಿ ಅಭಿಯಾನ ನಡೆಯಲಿದೆ. ಜಯನಗರ ವಿಭಾಗದಲ್ಲಿ ಸಾರಕ್ಕಿ (ವಾರ್ಡ್ 16) ಬನ್ನೇರುಘಟ್ಟ ಮುಖ್ಯ ರಸ್ತೆ ಮತ್ತು ತಿಲಕನಗರ (ವಾರ್ಡ್ 8) ಈಸ್ಟ್ ಎಂಡ್ ಮುಖ್ಯ ರಸ್ತೆಯನ್ನು ಒಳಗೊಳ್ಳಲಾಗಿದೆ.
ಬಿಟಿಎಂ ಲೇಔಟ್ ವಿಭಾಗದಲ್ಲಿ (ವಾರ್ಡ್ 17 ಮತ್ತು 18 – ಎನ್.ಎಸ್. ಪಾಳ್ಯ ಮತ್ತು ವಿಶ್ವಮಾನವ ಕುವೆಂಪು) ಲೇಕ್ ರೋಡ್, ಹೊರ ವರ್ತುಲ ರಸ್ತೆ, 29ನೇ ಮುಖ್ಯ ರಸ್ತೆ, ಬನ್ನೇರುಘಟ್ಟ ಮುಖ್ಯ ರಸ್ತೆ, 16ನೇ ಮುಖ್ಯ ರಸ್ತೆ, 7ನೇ ಮುಖ್ಯ ರಸ್ತೆ ಮತ್ತು 7ನೇ ಅಡ್ಡರಸ್ತೆ ಆಯ್ಕೆಯಾಗಿವೆ. ಪದ್ಮನಾಭನಗರ ವಿಭಾಗದಲ್ಲಿ (ವಾರ್ಡ್ 1) 18ನೇ ಮುಖ್ಯ ರಸ್ತೆ, 6ನೇ ಅಡ್ಡರಸ್ತೆ, ತಿಮ್ಮಯ್ಯ ರಸ್ತೆ ಮತ್ತು 11ನೇ ಅಡ್ಡರಸ್ತೆ ಹಾಗೂ 14ನೇ ಅಡ್ಡರಸ್ತೆಗಳಲ್ಲಿ, ಎಚ್‌ಎಸ್‌ಆರ್ ವಿಭಾಗದಲ್ಲಿ (ವಾರ್ಡ್ 31 – ಕಸವನಹಳ್ಳಿ) ಸರ್ಜಾಪುರ ಮುಖ್ಯ ರಸ್ತೆಯಲ್ಲಿ ಸ್ವಚ್ಛತಾ ಕಾರ್ಯ ನಡೆಯಲಿದೆ.
ಸ್ವಚ್ಛಗೊಳಿಸಿದ ರಸ್ತೆಗಳಲ್ಲಿ ಮತ್ತೆ ಕಸದ ಬ್ಲಾಕ್ ಸ್ಪಾಟ್‌ಗಳು ನಿರ್ಮಾಣವಾಗದಂತೆ ಮಾರ್ಷಲ್‌ಗಳ ಮೂಲಕ ನಿರಂತರ ನಿಗಾ ವಹಿಸಲಾಗುವುದು ಎಂದು ಆಯುಕ್ತರು ತಿಳಿಸಿದ್ದಾರೆ.
