ಹೆಸರಘಟ್ಟದಲ್ಲಿ H5N1 ಪಕ್ಷಿ ಜ್ವರ ದೃಢ; ಕಟ್ಟುನಿಟ್ಟಿನ ನಿಯಂತ್ರಣ ಕ್ರಮಗಳು ಜಾರಿ

ಬೆಂಗಳೂರು, ಏ.17: ಕರ್ನಾಟಕ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಪ್ರಕಟಿಸಿರುವ ಮಾಹಿತಿಯ ಪ್ರಕಾರ, ಹೆಸರಘಟ್ಟದ ಮಠ್ಕೂರು ಗ್ರಾಮದ ಕೋಳಿ ಸಾಕಾಣಿಕೆ ತರಬೇತಿ ಕೇಂದ್ರದಲ್ಲಿ H5N1 ಏವಿಯನ್ ಇನ್‌ಫ್ಲುವೆನ್ಸಾ (ಪಕ್ಷಿ ಜ್ವರ) ಪ್ರಕರಣ ದೃಢಪಟ್ಟಿದೆ. ಈ ಕುರಿತು ಭೋಪಾಲ್‌ನ ರಾಷ್ಟ್ರೀಯ ಉನ್ನತ ಭದ್ರತಾ ಪಶು ರೋಗ ಸಂಸ್ಥೆ (NIHSAD) ಏಪ್ರಿಲ್ 14, 2026ರಂದು ನೀಡಿದ ವರದಿಯ ಆಧಾರದ ಮೇಲೆ ದೃಢೀಕರಣ ನಡೆದಿದೆ.

ಪ್ರೋಟೋಕಾಲ್ ಅನುಸಾರ ಅಗತ್ಯವಿರುವ ಎಲ್ಲಾ ನಿಯಂತ್ರಣ ಕ್ರಮಗಳನ್ನು ತಕ್ಷಣ ಜಾರಿಗೆ ತರಲಾಗಿದೆ. ರಾಜ್ಯ ಮತ್ತು ಜಿಲ್ಲಾ ತ್ವರಿತ ಪ್ರತಿಕ್ರಿಯಾ ತಂಡ (RRT) ಹಾಗೂ ಪ್ರಾಥಮಿಕ ಆರೋಗ್ಯ ಕೇಂದ್ರ (PHC) ಸಿಬ್ಬಂದಿಗಳು ಏಪ್ರಿಲ್ 16ರಂದು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.

ಮಠ್ಕೂರು ಗ್ರಾಮವನ್ನು 0–3 ಕಿಮೀ ವ್ಯಾಪ್ತಿಯಲ್ಲಿ “ಸಂಕ್ರಮಿತ ವಲಯ” ಎಂದು ಘೋಷಿಸಲಾಗಿದ್ದು, ಅದರ ಸುತ್ತಲಿನ 3–10 ಕಿಮೀ ವ್ಯಾಪ್ತಿಯ ಪ್ರದೇಶಗಳು — ಹೆಸರಘಟ್ಟ PHC ಮತ್ತು ಸೋನ್ನೆನಹಳ್ಳಿ ಸೇರಿದಂತೆ — “ನಿಗಾ ವಲಯ” ಎಂದು ಘೋಷಿಸಲಾಗಿದೆ.

ಪಶು ವೈದ್ಯಕೀಯ ಇಲಾಖೆಯು ಏಪ್ರಿಲ್ 15ರಂದು 7,444 ಕೋಳಿಗಳು, 14,788 ಮೊಟ್ಟೆಗಳು ಹಾಗೂ 2,250 ಕೆ.ಜಿ. ಆಹಾರವನ್ನು ನಾಶಪಡಿಸಿ ವೈಜ್ಞಾನಿಕವಾಗಿ ವಿಲೇವಾರಿ ಮಾಡಿದೆ. ಶವ ಸಮಾಧಿ ಪ್ರದೇಶವನ್ನು ಒಂದು ವರ್ಷ ಕಾಲ ನಿಷೇಧಿತ ಪ್ರದೇಶವಾಗಿ ಘೋಷಿಸಲಾಗಿದೆ. ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದ 10 ಸಿಬ್ಬಂದಿಯನ್ನು ಕ್ವಾರಂಟೈನ್ ಮಾಡಿ, ಅವರಿಗೆ ಓಸೆಲ್ಟಾಮಿವಿರ್ ಔಷಧಿ ನೀಡುತ್ತಾ ವೈದ್ಯಕೀಯ ಮೇಲ್ವಿಚಾರಣೆ ನಡೆಸಲಾಗುತ್ತಿದೆ.

0–3 ಕಿಮೀ ವ್ಯಾಪ್ತಿಯಲ್ಲಿ 2 ಗ್ರಾಮಗಳು (ಜನಸಂಖ್ಯೆ 3,422) ಹಾಗೂ 3–10 ಕಿಮೀ ವ್ಯಾಪ್ತಿಯಲ್ಲಿ 17 ಗ್ರಾಮಗಳು (ಜನಸಂಖ್ಯೆ 22,395) ಒಳಗೊಂಡಿವೆ. ಈ ಪ್ರದೇಶಗಳಲ್ಲಿ ಆರೋಗ್ಯ ಸಿಬ್ಬಂದಿ ಹಾಗೂ ಆಶಾ ಕಾರ್ಯಕರ್ತರು ಮನೆಮನೆಗೆ ಭೇಟಿ ನೀಡಿ ಪ್ರತಿದಿನ ಜ್ವರ ಪರಿಶೀಲನೆ ನಡೆಸಲಿದ್ದಾರೆ.

ಖಾಸಗಿ ಆಸ್ಪತ್ರೆಗಳಿಗೂ ಎಚ್ಚರಿಕೆ ನೀಡಲಾಗಿದ್ದು, ILI (Influenza Like Illness) ಹಾಗೂ SARI (Severe Acute Respiratory Infection) ಪ್ರಕರಣಗಳನ್ನು IHIP ಪೋರ್ಟಲ್‌ನಲ್ಲಿ ಕಡ್ಡಾಯವಾಗಿ ವರದಿ ಮಾಡಲು ಸೂಚಿಸಲಾಗಿದೆ.

PPE ಕಿಟ್‌ಗಳು, ತ್ರಿಪದರ ಮಾಸ್ಕ್‌ಗಳು, ಓಸೆಲ್ಟಾಮಿವಿರ್ ಔಷಧಿ, VTM ಮತ್ತು ಗಂಟಲು ಸ್ವಾಬ್‌ಗಳ ಸಮರ್ಪಕ ಸಂಗ್ರಹ ಲಭ್ಯವಿದೆ ಎಂದು ಇಲಾಖೆ ತಿಳಿಸಿದೆ.

ಸಾರ್ವಜನಿಕರಿಗೆ ಆತಂಕಪಡದಂತೆ ಮನವಿ ಮಾಡಿರುವ ಇಲಾಖೆ, ಅಸ್ವಸ್ಥ ಅಥವಾ ಸತ್ತ ಪಕ್ಷಿಗಳ ಸಂಪರ್ಕ ತಪ್ಪಿಸಿಕೊಳ್ಳಲು ಹಾಗೂ ಅಂತಹ ಪ್ರಕರಣಗಳನ್ನು ತಕ್ಷಣ ಪಶುವೈದ್ಯಕೀಯ ಅಥವಾ ಆರೋಗ್ಯ ಇಲಾಖೆಗೆ ತಿಳಿಸಲು ಸೂಚಿಸಿದೆ. ಸರಿಯಾಗಿ ಬೇಯಿಸಿದ ಕೋಳಿ ಮಾಂಸ ಮತ್ತು ಮೊಟ್ಟೆಗಳ ಸೇವನೆ ಸುರಕ್ಷಿತವಾಗಿದೆ ಎಂದು ಸ್ಪಷ್ಟಪಡಿಸಲಾಗಿದೆ.