ಶ್ರಮಿಕ್ ನಿವಾಸ್ ನೀತಿ ಬಿಡುಗಡೆ ಸಂದರ್ಭದಲ್ಲಿ ನೀತಿ ಕೈಪಿಡಿಗಳನ್ನು ಪ್ರದರ್ಶಿಸಿದ ದೃಶ್ಯ. ಫೋಟೊ: ಸಚಿವ ಎಂ.ಬಿ. ಪಾಟೀಲ ಅವರ ಮಾಧ್ಯಮ ತಂಡ
ಬೆಂಗಳೂರು: ತಯಾರಿಕಾ ವಲಯದಲ್ಲಿ ಶ್ರಮದಿಂದ ಕೆಲಸ ಮಾಡುವ ಉದ್ಯೋಗಿಗಳಿಗೆ ಅವರು ಕೆಲಸ ಮಾಡುವ ಕೈಗಾರಿಕೆಗಳ ಹತ್ತಿರವೇ ಗುಣಮಟ್ಟದ ವಸತಿ ಸೌಕರ್ಯ ಕಲ್ಪಿಸುವ ಉದ್ದೇಶದಿಂದ ರಾಜ್ಯ ಸರ್ಕಾರ ‘ಶ್ರಮಿಕ್ ನಿವಾಸ್’ ನೀತಿಯನ್ನು ಜಾರಿಗೆ ತಂದಿದೆ ಎಂದು ಬೃಹತ್ ಮತ್ತು ಮಧ್ಯಮ ಕೈಗಾರಿಕಾ ಸಚಿವ ಎಂ.ಬಿ. ಪಾಟೀಲ ಶನಿವಾರ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಗುರುವಾರ (ನ.12) ಈ ನೀತಿಯನ್ನು ಅನಾವರಣಗೊಳಿಸಿದ್ದಾರೆ. ಶ್ರಮದ ಕೆಲಸ ಮಾಡುವ ಉದ್ಯೋಗಿಗಳಿಗೆ ನೆಮ್ಮದಿ ನೀಡುವ ಸೂರು ಕಲ್ಪಿಸುವುದು ಸರ್ಕಾರದ ಉದ್ದೇಶ; ಇದರಿಂದ ಅವರು ದಿನನಿತ್ಯ ಬೇರೆ ಊರುಗಳಿಂದ ಸಂಚರಿಸುವ ತೊಂದರೆ ತಪ್ಪಿ, ಉತ್ಪಾದಕತೆ ಹೆಚ್ಚುತ್ತದೆ ಎಂದು ಪಾಟೀಲ ಹೇಳಿದರು. ಹೆಚ್ಚಿನ ಸಂಖ್ಯೆಯಲ್ಲಿ ಉದ್ಯೋಗಿಗಳಿರುವ ಕೈಗಾರಿಕೆಗಳ ಸನಿಹದಲ್ಲೇ ಡಾರ್ಮಿಟರಿ, ಒಂದು ರೂಮಿನ ಮನೆ ಮತ್ತು ಎರಡು ರೂಮಿನ ಮನೆಗಳನ್ನು ಕಟ್ಟಿ, ಕೈಗೆಟುಕುವ ಬಾಡಿಗೆ ದರದಲ್ಲಿ ಅಥವಾ ಉಚಿತವಾಗಿ ವಾಸಕ್ಕೆ ಕೊಡಲಾಗುವುದು ಎಂದರು.
ಈ ಮನೆಗಳಿಗೆ ಕೈಗಾರಿಕೆಗಳಿಗೆ ಇರುವ ದರದಲ್ಲೇ ನೀರು ಮತ್ತು ವಿದ್ಯುತ್ ಪೂರೈಸಲಾಗುವುದು. ಉದ್ಯೋಗಿಗಳು ವಾಸ ಮಾಡಲು ಶುರು ಮಾಡಿದ ದಿನದಿಂದ ಪರಿಗಣಿಸಿ, ಸಬ್ಸಿಡಿ ಹಣವನ್ನು 3 ವರ್ಷಗಳಲ್ಲಿ 3 ಸಮಾನ ಕಂತುಗಳಲ್ಲಿ ನೀಡಲಾಗುವುದು ಎಂದು ಅವರು ಹೇಳಿದರು.
“ರಾಜ್ಯದ ಕೈಗಾರಿಕಾ ಪ್ರದೇಶಗಳು ಬೃಹತ್ ಹೂಡಿಕೆಗೆ ಅನುಕೂಲವಾಗುವಂಥ ಮತ್ತು ಆಕರ್ಷಣೀಯ ಸೌಕರ್ಯಗಳನ್ನು ಹೊಂದಿರಬೇಕು ಎನ್ನುವುದು ನಮ್ಮ ಬಯಕೆ” ಎಂದ ಪಾಟೀಲ, ಶ್ರಮಿಕ್ ನಿವಾಸ್ ಯೋಜನೆಯಡಿ ಮೊದಲ ಹಂತದಲ್ಲಿ 30 ಸಾವಿರ ಮನೆಗಳನ್ನು ನಿರ್ಮಿಸಲಾಗುವುದು ಎಂದರು. 100 ಉದ್ಯೋಗಿಗಳಿಗೆ ವಸತಿ ಕೊಟ್ಟರೆ ₹1 ಕೋಟಿ, 1,000 ಉದ್ಯೋಗಿಗಳಿಗೆ ವಸತಿ ಕಲ್ಪಿಸಿದರೆ ₹10 ಕೋಟಿ ಮತ್ತು 2,500 ಕೆಲಸಗಾರರಿಗೆ ವಸತಿ ಒದಗಿಸಿದರೆ ಗರಿಷ್ಠ ₹25 ಕೋಟಿ ಸಬ್ಸಿಡಿ ನೀಡಲಾಗುವುದು; ಬೃಹತ್ ಕೈಗಾರಿಕೆಗಳು ಇದನ್ನು ಸದುಪಯೋಗ ಪಡಿಸಿಕೊಳ್ಳಬೇಕು ಎಂದು ಅವರು ಮನವಿ ಮಾಡಿದರು.
ಈ ಯೋಜನೆಯಡಿ ಗರಿಷ್ಠ 10 ಚ.ಮೀ. ವಿಸ್ತೀರ್ಣದ ಡಾರ್ಮಿಟರಿ, ಗರಿಷ್ಠ 30 ಚ.ಮೀ. ವಿಸ್ತೀರ್ಣದ ಸಿಂಗಲ್ ಬೆಡ್ ರೂಮ್ ಮತ್ತು ಗರಿಷ್ಠ 60 ಚ.ಮೀ. ವಿಸ್ತೀರ್ಣದ ಡಬಲ್ ಬೆಡ್ ರೂಮ್ ಮನೆಗಳನ್ನು ಕಟ್ಟಲು ಅವಕಾಶವಿದೆ. ಉದ್ಯಮಿಗಳು ಕೆಐಎಡಿಬಿ ಮೂಲಕ ತಮಗೆ ಮಂಜೂರಾಗಿರುವ ನಿವೇಶನದ ಒಳಗೇ ಇವನ್ನು ಕಟ್ಟುವುದು ಕಡ್ಡಾಯ ಎಂದು ಅವರು ಮಾಹಿತಿ ನೀಡಿದರು.
ವರ್ಷಕ್ಕೆ ಗರಿಷ್ಠ 10 ಸಾವಿರ ಕೆಲಸಗಾರರಿಗೆ ವಸತಿ ಒದಗಿಸುವುದು ಗುರಿಯಾಗಿದ್ದು, ಇನ್ನೂ ಹೆಚ್ಚಿನ ಕೆಲಸಗಾರರ ಕೋರಿಕೆಗಳನ್ನು ಮುಂದಿನ ವರ್ಷ ಪರಿಗಣಿಸಲಾಗುವುದು ಎಂದು ಪಾಟೀಲ ಹೇಳಿದರು. ಕಂಪನಿಗಳ ಕಾಯಂ ಉದ್ಯೋಗಿಗಳು ಮಾತ್ರ ಅರ್ಹರಾಗಿದ್ದು, ಕೆಲಸಗಾರರ ಅವಲಂಬಿತರನ್ನು ಇದರಡಿ ಪರಿಗಣಿಸಲಾಗುವುದಿಲ್ಲ. ಒಂದು ಕಂಪನಿಗೆ ಗರಿಷ್ಠ ₹25 ಕೋಟಿವರೆಗೆ ಸಬ್ಸಿಡಿ ಕೊಡಲಾಗುವುದು ಎಂದರು.
“ಕೆಲಸಗಾರರು ಕೈಗಾರಿಕೆಗಳ ಅವಿಭಾಜ್ಯ ಅಂಗ. ಪರಿಶ್ರಮದಿಂದ ಕೂಡಿದ ಕೆಲಸ ಮಾಡುವವರು ನೆಮ್ಮದಿಯಿಂದ ಇರಬೇಕು ಎನ್ನುವುದು ನಮ್ಮ ಸದಾಶಯ. ವಸತಿ ಸೌಕರ್ಯದಿಂದ ಕೆಲಸಗಾರರ ಅನಗತ್ಯ ಓಡಾಟ ತಪ್ಪಿ, ಕೈಗಾರಿಕೆಗಳ ಉತ್ಪಾದಕತೆಯೂ ಹೆಚ್ಚುತ್ತದೆ. ಇದರಿಂದ ರಾಜ್ಯದ ಆರ್ಥಿಕತೆಗೆ ಲಾಭವಾಗಲಿದೆ. ಹೀಗಾಗಿಯೇ ನಾವು ಶ್ರಮಿಕ್ ನಿವಾಸ್ ಯೋಜನೆಯನ್ನು ಜಾರಿಗೆ ತಂದಿದ್ದೇವೆ” ಎಂದು ಪಾಟೀಲ ಹೇಳಿದರು.
