ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರದ CEO ಆಯ್ಕೆ ಪ್ರಕ್ರಿಯೆ ಅಂತಿಮ ಹಂತಕ್ಕೆ; ಅಯೋಧ್ಯೆಯಲ್ಲಿ 16 ಅಭ್ಯರ್ಥಿಗಳ ಸಂದರ್ಶನ
ಅಯೋಧ್ಯೆ/ನವದೆಹಲಿ, ಆಗಸ್ಟ್ 12: ಶ್ರೀ ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಆಯ್ಕೆ ಪ್ರಕ್ರಿಯೆ ಅಂತಿಮ ಹಂತ ತಲುಪಿದ್ದು, ಬಹುಹಂತದ ಆಯ್ಕೆ ಪ್ರಕ್ರಿಯೆಯ ಬಳಿಕ 16 ಅಭ್ಯರ್ಥಿಗಳಿಗೆ ಅಯೋಧ್ಯೆಯಲ್ಲಿ ಮುಖಾಮುಖಿ ಸಂದರ್ಶನ ನಡೆಸಲಾಗಿದೆ. ಒಟ್ಟು 5,585 ಅರ್ಜಿಗಳೊಂದಿಗೆ ಈ ಆಯ್ಕೆ ಪ್ರಕ್ರಿಯೆ ಆರಂಭವಾಗಿತ್ತು.
ಶೋಧನಾ ಸಮಿತಿಯ ಪ್ರಕಾರ, ಅಂತಿಮ ಸುತ್ತಿನ ಸಂದರ್ಶನಗಳನ್ನು ಆಗಸ್ಟ್ 11 ಮತ್ತು 12ರಂದು ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರದ ಆವರಣದಲ್ಲಿ ನಡೆಸಲಾಯಿತು. ಸಮಿತಿ ಈಗ ಅಂತಿಮ ಅಭ್ಯರ್ಥಿಗಳ ಮೌಲ್ಯಮಾಪನ ನಡೆಸಿ ಮೂರು ಹೆಸರುಗಳ ಪಟ್ಟಿಯನ್ನು ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರಕ್ಕೆ ಸಲ್ಲಿಸಲಿದೆ. ನಂತರ ಟ್ರಸ್ಟ್ ಅಂತಿಮ ಘೋಷಣೆ ಮಾಡಲಿದೆ.
ಶೋಧನಾ ಸಮಿತಿಯಲ್ಲಿ ನಿವೃತ್ತ ನ್ಯಾಯಮೂರ್ತಿ ಪ್ರಮೋದ್ ಕೊಹ್ಲಿ, ನಿವೃತ್ತ ಲೆಫ್ಟಿನೆಂಟ್ ಜನರಲ್ ವಿ.ಕೆ. ಚತುರ್ವೇದಿ, PVSM, AVSM, SM ಮತ್ತು ಅಣು ವಿಜ್ಞಾನಿ ಡಾ. ಸುರೇಶ್ ಹಾವರೆ ಇದ್ದಾರೆ. ಸಮಿತಿಯ ಸದಸ್ಯರು ರಕ್ಷಣಾ, ನ್ಯಾಯಾಂಗ ಮತ್ತು ಆಡಳಿತ ಕ್ಷೇತ್ರಗಳಲ್ಲಿ ಅನುಭವ ಹೊಂದಿದ್ದಾರೆ ಎಂದು ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ಆರಂಭದಲ್ಲಿ ಬಂದ 5,585 ಅರ್ಜಿಗಳ ಪೈಕಿ 3,877 ಅರ್ಜಿಗಳೊಂದಿಗೆ ವಿವರವಾದ ಬಯೋಡೇಟಾ ಸಲ್ಲಿಸಲಾಗಿತ್ತು. CV ಸಲ್ಲಿಸಿದ ಅಭ್ಯರ್ಥಿಗಳಿಂದ ನಿರ್ವಹಣಾ ಸಾಮರ್ಥ್ಯ, ದೊಡ್ಡ ಪ್ರಮಾಣದ ಕಾರ್ಯಕ್ರಮಗಳು ಮತ್ತು ಸಿಬ್ಬಂದಿಯನ್ನು ನಿರ್ವಹಿಸಿದ ಅನುಭವ, ವೈಯಕ್ತಿಕ ಸಾಧನೆ, ಭಾಷಾ ಪ್ರಾವೀಣ್ಯತೆ, ದೃಷ್ಟಿಕೋನ ಮತ್ತು ಕಾರ್ಯತಂತ್ರದ ಯೋಜನೆಗಳ ಕುರಿತು ಸಮಗ್ರ ಮಾಹಿತಿ ಕೇಳಲಾಗಿತ್ತು.
ಮುಂದಿನ ಹಂತದಲ್ಲಿ 1,580 ಅಭ್ಯರ್ಥಿಗಳ ಅರ್ಜಿಗಳನ್ನು ಸಮಗ್ರವಾಗಿ ಮೌಲ್ಯಮಾಪನ ಮಾಡಲಾಯಿತು. ಅವರಲ್ಲಿ ಸುಮಾರು 111 ಅಭ್ಯರ್ಥಿಗಳನ್ನು ಹಲವು ದಿನಗಳ ಕಾಲ ನಡೆದ ಆನ್‌ಲೈನ್ ಸಂವಾದಕ್ಕೆ ಆಹ್ವಾನಿಸಲಾಯಿತು. ಈ ವೇಳೆ ಸಂವಹನ ಕೌಶಲ್ಯ, ವೃತ್ತಿಪರ ಅನುಭವ, ದೃಷ್ಟಿಕೋನ, ವ್ಯಕ್ತಿತ್ವ, ನಾಯಕತ್ವ ಗುಣಗಳು ಮತ್ತು ತಾಂತ್ರಿಕ ಪರಿಣತಿಯನ್ನು ಮೌಲ್ಯಮಾಪನ ಮಾಡಲಾಯಿತು.
ಆನ್‌ಲೈನ್ ಮೌಲ್ಯಮಾಪನದ ಬಳಿಕ 16 ಅಭ್ಯರ್ಥಿಗಳನ್ನು ಅಯೋಧ್ಯೆಯಲ್ಲಿ ಮುಖಾಮುಖಿ ಸಂವಾದಕ್ಕೆ ಆಯ್ಕೆ ಮಾಡಲಾಯಿತು. ಇವರು ರಕ್ಷಣಾ, ಆಡಳಿತ, ಕಾರ್ಪೊರೇಟ್ ಮತ್ತು ಕೈಗಾರಿಕಾ ವಲಯ, ಶಿಕ್ಷಣ ಹಾಗೂ ಮಾಹಿತಿ ತಂತ್ರಜ್ಞಾನ ಕ್ಷೇತ್ರಗಳನ್ನು ಪ್ರತಿನಿಧಿಸುತ್ತಿದ್ದಾರೆ. 50ರಿಂದ 70 ವರ್ಷ ವಯಸ್ಸಿನ ಈ ಅಭ್ಯರ್ಥಿಗಳಲ್ಲಿ ಸೇನಾ ನಿವೃತ್ತರು, ನಿವೃತ್ತ IAS ಮತ್ತು IPS ಅಧಿಕಾರಿಗಳು ಹಾಗೂ ವಿವಿಧ ಸರ್ಕಾರಿ ಮತ್ತು ಸರ್ಕಾರೇತರ ಸೇವೆಗಳ ವೃತ್ತಿಪರರು ಸೇರಿದ್ದಾರೆ.
ಅಂತಿಮ ಹಂತದಲ್ಲಿ ನಿರ್ವಹಣಾ ಕೌಶಲ್ಯ, ವ್ಯಕ್ತಿತ್ವ, ದೃಷ್ಟಿಕೋನ, ಕಾರ್ಯತಂತ್ರದ ಯೋಜನೆಗಳು, ತಂತ್ರಜ್ಞಾನ ಪರಿಣತಿ ಮತ್ತು ನಾಯಕತ್ವ ಸಾಮರ್ಥ್ಯದ ಆಧಾರದ ಮೇಲೆ ಅಭ್ಯರ್ಥಿಗಳನ್ನು ಮೌಲ್ಯಮಾಪನ ಮಾಡಲಾಗಿದೆ. ಅಂತಿಮ ಸುತ್ತಿಗೆ ಆಹ್ವಾನಿಸಲಾದ ಎಲ್ಲ 16 ಅಭ್ಯರ್ಥಿಗಳು ತಮ್ಮ ತಮ್ಮ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿರುವ ಅನುಭವಿ ವೃತ್ತಿಪರರು ಎಂದು ಶೋಧನಾ ಸಮಿತಿ ತಿಳಿಸಿದೆ.
CEO ಆಯ್ಕೆ ಪ್ರಕ್ರಿಯೆಯ ಶೋಧನಾ ಸಮಿತಿಯ ಪರವಾಗಿ ಕಾರ್ಯದರ್ಶಿ ಸಮೀರ್ ಪಾಂಡಾ ನೀಡಿರುವ ಹೇಳಿಕೆಯಲ್ಲಿ, ಸಂಪೂರ್ಣ ಪ್ರಕ್ರಿಯೆಯು ಅರ್ಹತೆ ಆಧಾರಿತ ಆಯ್ಕೆ, ಸಾಂಸ್ಥಿಕ ಶ್ರೇಷ್ಠತೆ ಮತ್ತು ಪಾರದರ್ಶಕತೆಯ ಬದ್ಧತೆಯನ್ನು ಪ್ರತಿಬಿಂಬಿಸುತ್ತದೆ ಎಂದು ತಿಳಿಸಲಾಗಿದೆ.
