ಕಡತ ಚಿತ್ರ: ಬಸವೇಶ್ವರರ ಪ್ರತಿಮೆ. ಚಿತ್ರ: ಸಂಗ್ರಹ
ಬೆಂಗಳೂರು: ತಮ್ಮ ಬಸವಮಂಟಪ ಕೃತಿಯಲ್ಲಿ ಬಸವಣ್ಣನವರ ಇತಿಹಾಸವನ್ನು ತಿರುಚಿದ ಆರೋಪ ಎದುರಿಸುತ್ತಿರುವ ಲೇಖಕ ರವಿ ಹಂಜ್ ಅವರು ನೆರೆಯ ರಾಜ್ಯದಲ್ಲಿ ಪತ್ತೆಯಾಗಿದ್ದು, ತನಿಖಾ ಅಧಿಕಾರಿಗಳ ಮುಂದೆ ಹಾಜರಾಗುವಂತೆ ಅವರಿಗೆ ಔಪಚಾರಿಕ ನೋಟಿಸ್ ನೀಡಲಾಗಿದೆ, ಅವರ ವಿರುದ್ಧ ದಾಖಲಾದ ಎಫ್ಐಆರ್ ಬಗ್ಗೆ ಅಮೆರಿಕ ದೂತಾವಾಸಕ್ಕೂ ಅಧಿಕೃತವಾಗಿ ಮಾಹಿತಿ ನೀಡಲಾಗಿದೆ ಎಂದು ಗೃಹ, ಐಟಿ-ಬಿಟಿ ಸಚಿವ ಪ್ರಿಯಾಂಕ್ ಖರ್ಗೆ ಅವರು ಶನಿವಾರ X ಪೋಸ್ಟ್ನಲ್ಲಿ ತಿಳಿಸಿದ್ದಾರೆ.
ಹಂಜ್ ಅವರು ಮೊದಲು ತಾವು ಭಾರತ ತೊರೆದು ಅಮೆರಿಕಕ್ಕೆ ತೆರಳಿದ್ದಾರೆ ಎಂಬ ಭಾವನೆ ಮೂಡಿಸಲು ಯತ್ನಿಸಿದ್ದರು, ಆದರೆ ಗೃಹ ಇಲಾಖೆಯ ಪರಿಶೀಲನೆಯಲ್ಲಿ ಅವರು ನೆರೆಯ ರಾಜ್ಯದಲ್ಲಿರುವುದು ದೃಢಪಟ್ಟಿದೆ ಎಂದು ಖರ್ಗೆ ಹೇಳಿದ್ದಾರೆ. ಪೋಸ್ಟ್ನಲ್ಲಿ ರಾಜ್ಯದ ಹೆಸರನ್ನು ಉಲ್ಲೇಖಿಸಿಲ್ಲ.
ಹಂಜ್ ಅಮೆರಿಕ ಪ್ರಜೆಯಾಗಿರುವುದರಿಂದ, ಅವರ ವಿರುದ್ಧ ದಾಖಲಾದ ಎಫ್ಐಆರ್ ಹಾಗೂ ತನಿಖೆಯ ಭಾಗವಾಗಿ ಅವರನ್ನು ವಿಚಾರಣೆಗೆ ಒಳಪಡಿಸುವ ಅಗತ್ಯದ ಬಗ್ಗೆ ಅಮೆರಿಕ ದೂತಾವಾಸಕ್ಕೆ ಔಪಚಾರಿಕವಾಗಿ ತಿಳಿಸಲಾಗಿದೆ ಎಂದು ಖರ್ಗೆ ಹೇಳಿದ್ದಾರೆ. ವಿದೇಶಿ ಪೌರತ್ವ ಯಾರನ್ನೂ ಭಾರತೀಯ ಕಾನೂನಿಗಿಂತ ಮೇಲಿರಿಸುವುದಿಲ್ಲ, ತನಿಖೆ ಅಥವಾ ಹೊಣೆಗಾರಿಕೆಯಿಂದ ವಿನಾಯಿತಿಯನ್ನೂ ನೀಡುವುದಿಲ್ಲ ಎಂದ ಅವರು, ಬಸವಣ್ಣನವರ ಪರಂಪರೆ ಕರ್ನಾಟಕದ ಇತಿಹಾಸ, ಅಸ್ಮಿತೆ ಮತ್ತು ಸಾಮಾಜಿಕ ಸಂಸ್ಕಾರದ ಅವಿಭಾಜ್ಯ ಅಂಗ ಎಂದು ಬಣ್ಣಿಸಿದ್ದಾರೆ.
ಹಂಜ್ ಅವರಿಗೆ ಯಾವಾಗ ಹಾಜರಾಗುವಂತೆ ಸೂಚಿಸಲಾಗಿದೆ ಅಥವಾ ಅವರು ನೋಟಿಸ್ಗೆ ಪ್ರತಿಕ್ರಿಯಿಸಿದ್ದಾರೆಯೇ ಎಂಬುದನ್ನು ಪೋಸ್ಟ್ನಲ್ಲಿ ತಿಳಿಸಿಲ್ಲ.
ಸಂಬಂಧಿತ ಸುದ್ದಿ: ಬಸವಮಂಟಪ ಕೃತಿ: ಸಂಪುಟದಲ್ಲಿ ಚರ್ಚಿಸಿ ಲೇಖಕ ರವಿ ಹಂಜ್ ವಿರುದ್ಧ ಎಫ್ಐಆರ್ ದಾಖಲು, ಕಠಿಣ ಕಾನೂನು ಕ್ರಮದ ಎಚ್ಚರಿಕೆ ನೀಡಿದ ಸಿಎಂ ಶಿವಕುಮಾರ್

