ಬೆಂಗಳೂರು: ಮುಚ್ಚಿದ ರಾಜಕಾಲುವೆಗಳಲ್ಲಿನ ಹೂಳು ತೆಗೆಯಲು ದೂರನಿಯಂತ್ರಿತ ರೊಬೊಟಿಕ್ ಯಂತ್ರವನ್ನು ಬೆಂಗಳೂರಿನಲ್ಲಿ ಪ್ರಾಯೋಗಿಕವಾಗಿ ಬಳಸಲಾಗುತ್ತಿದೆ. ಶುಕ್ರವಾರ ಎಚ್‌ಎಸ್‌ಆರ್ ಲೇಔಟ್‌ನಲ್ಲಿ ಯಂತ್ರದ ಪ್ರಾತ್ಯಕ್ಷಿಕೆ ವೀಕ್ಷಿಸಿದ ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ ಮುಖ್ಯ ಆಯುಕ್ತ ಮಹೇಶ್ವರ್ ರಾವ್, ಪ್ರಯೋಗದಲ್ಲಿ ನಿರೀಕ್ಷಿತ ಫಲಿತಾಂಶ ದೊರೆತರೆ ರಾಜಕಾಲುವೆಗಳ ಸ್ವಚ್ಛತೆಗೆ ಯಂತ್ರವನ್ನು ಬಳಸುವಂತೆ ಅಧಿಕಾರಿಗಳಿಗೆ ಸೂಚಿಸಿದರು.
ಸುಮಾರು 6 ಅಡಿ ಅಗಲ ಮತ್ತು 30 ಅಡಿ ಉದ್ದದ ಕಾಲುವೆಯ ಭಾಗದಲ್ಲಿ 2 ಅಡಿಗೂ ಹೆಚ್ಚು ಹೂಳು ತುಂಬಿತ್ತು. ಗುರುವಾರ ಸುಮಾರು ಆರು ಗಂಟೆ ಕಾರ್ಯಾಚರಣೆ ನಡೆಸಿ ಆ ಭಾಗದ ಹೂಳನ್ನು ಸಂಪೂರ್ಣ ತೆರವುಗೊಳಿಸಲಾಗಿದೆ ಎಂದು ಅಧಿಕಾರಿಗಳು ತಿಳಿಸಿದರು. ಪ್ರವಾಹದ ಅಪಾಯ ತಗ್ಗಿಸಲು ಎಚ್‌ಎಸ್‌ಆರ್ ಲೇಔಟ್‌ನ 7ನೇ ಸೆಕ್ಟರ್, 17ನೇ ಕ್ರಾಸ್ ಮತ್ತು ಸುತ್ತಮುತ್ತ ಹೂಳು ತೆಗೆಯಬೇಕಾದ ಭಾಗಗಳನ್ನು ಗುರುತಿಸಿ ಸ್ವಚ್ಛಗೊಳಿಸಲು ರಾವ್ ಸೂಚಿಸಿದರು.
ರೊಬೊಟಿಕ್ ಯಂತ್ರ ಹೂಳು ತೆಗೆಯುವುದು ಹೇಗೆ?
ಆರ್ಯನ್ ಸಂಸ್ಥೆ ತಯಾರಿಸಿರುವ ಈ ಯಂತ್ರ ಮುಚ್ಚಿದ ರಾಜಕಾಲುವೆಯೊಳಗೆ ಸುಮಾರು 30 ಮೀಟರ್‌ವರೆಗೆ ಸ್ವಚ್ಛಗೊಳಿಸಬಲ್ಲದು ಎಂದು ಪ್ರಾಧಿಕಾರ ತಿಳಿಸಿದೆ. ಸಿಬ್ಬಂದಿ ಯಂತ್ರವನ್ನು ಕಾಲುವೆಯೊಳಗೆ ಇಳಿಸಿ, ವೈರ್‌ಲೆಸ್ ರಿಮೋಟ್ ಮೂಲಕ ಚಲಾಯಿಸುತ್ತಾರೆ. ಯಂತ್ರ ಹೂಳನ್ನು ಸಡಿಲಗೊಳಿಸಿ ವ್ಯಾಕ್ಯೂಮ್ ಪೈಪ್ ಮೂಲಕ ಹೀರಿಕೊಳ್ಳುತ್ತದೆ. 6,000 ಲೀಟರ್ ಕೆಸರು ಮತ್ತು 2,000 ಲೀಟರ್ ನೀರನ್ನು ಪ್ರತ್ಯೇಕವಾಗಿ ಸಂಗ್ರಹಿಸುವ ಸಾಮರ್ಥ್ಯ ಇದಕ್ಕಿದೆ.
ಯಂತ್ರದೊಂದಿಗೆ ಕೆಲಸ ಮಾಡುವ ಸಿಬ್ಬಂದಿಗೆ ಅಗತ್ಯ ಸುರಕ್ಷತಾ ಕ್ರಮಗಳನ್ನು ಪಾಲಿಸುವಂತೆ ರಾವ್ ಸೂಚಿಸಿದರು. ಸ್ಥಳೀಯ ಶಾಸಕ ಸತೀಶ್ ರೆಡ್ಡಿ, ಬೆಂಗಳೂರು ದಕ್ಷಿಣ ನಗರ ಪಾಲಿಕೆ ಆಯುಕ್ತ ಕೆ.ಎನ್. ರಮೇಶ್ ಹಾಗೂ ಮುಖ್ಯ ಎಂಜಿನಿಯರ್‌ಗಳಾದ ಬಸವರಾಜ್ ಕಬಾಡೆ ಮತ್ತು ಮಾಲತಿ ಪರಿಶೀಲನೆಯಲ್ಲಿ ಭಾಗವಹಿಸಿದ್ದರು.
ಸಿಲ್ಕ್ ಬೋರ್ಡ್ ಮಾರ್ಗಕ್ಕೆ ಪೈಪ್ ಚರಂಡಿ
ಮಳೆಗಾಲದಲ್ಲಿ ಸಿಲ್ಕ್ ಬೋರ್ಡ್ ಜಂಕ್ಷನ್‌ನಿಂದ ಎಚ್‌ಎಸ್‌ಆರ್ ಲೇಔಟ್‌ವರೆಗಿನ ಮಾರ್ಗದಲ್ಲಿ ನೀರು ನಿಲ್ಲುವುದನ್ನು ತಡೆಯಲು, ಉದ್ದೇಶಿತ ಮಳೆನೀರು ಚರಂಡಿ ಕಾಮಗಾರಿಯಲ್ಲಿ ಬಾಕ್ಸ್ ಚರಂಡಿಯ ಬದಲು 3 ಮೀಟರ್ ವ್ಯಾಸದ ಪೈಪ್ ಅಳವಡಿಸುವಂತೆ ರಾವ್ ಪ್ರತ್ಯೇಕವಾಗಿ ಸೂಚಿಸಿದರು.
