ವಿದ್ಯಾಗಣಪತಿ ಮಹೋತ್ಸವದ ಸನ್ಮಾನ ಸಮಾರಂಭ. ಚಿತ್ರ: ಒದಗಿಸಲಾಗಿದೆ.
ಬೆಂಗಳೂರು: ವಿಧಾನಸಭೆ ಕಾರ್ಯದರ್ಶಿ ಎಂ.ಕೆ. ವಿಶಾಲಾಕ್ಷಿ ಮತ್ತು ಗಾಯಕಿ ಅರ್ಚನ ಉಡುಪ ಸೇರಿದಂತೆ ವಿವಿಧ ಕ್ಷೇತ್ರಗಳ ಸಾಧಕರನ್ನು ಅಖಿಲ ಕರ್ನಾಟಕ ಬ್ರಾಹ್ಮಣ ಮಹಾಸಭಾದ ಗಾಯತ್ರಿ ಭವನದಲ್ಲಿ ನಡೆದ ಎರಡು ದಿನಗಳ ಶ್ರೀ ವಿದ್ಯಾಗಣಪತಿ ಮಹೋತ್ಸವದಲ್ಲಿ ಸನ್ಮಾನಿಸಲಾಯಿತು.
ಮಹೋತ್ಸವದ ಅಂಗವಾಗಿ ವಿಶೇಷ ಪೂಜೆ, ಮಹಾಮಂಗಳಾರತಿ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ನಡೆದವು. ಮಹಾಸಭಾ ಅಧ್ಯಕ್ಷ ಎಸ್. ರಘುನಾಥ್ ವಿಶೇಷ ಪೂಜೆ ಸಲ್ಲಿಸಿ ಸಾಧಕರನ್ನು ಗೌರವಿಸಿದರು.
ಕಲಾವಿದರಿಗೆ ಕಡಿಮೆ ವೆಚ್ಚದಲ್ಲಿ ಸಭಾಂಗಣ
ಕಲೆ, ಸಾಹಿತ್ಯ, ಸಂಗೀತ ಮತ್ತು ಸಂಸ್ಕೃತಿಯನ್ನು ಉಳಿಸಲು ಮಹಾಸಭಾ ಸಹಕಾರ ಹಾಗೂ ಪ್ರೋತ್ಸಾಹ ನೀಡುತ್ತಿದೆ ಎಂದು ರಘುನಾಥ್ ಹೇಳಿದರು. ಗಣೇಶ ಮಹೋತ್ಸವದಲ್ಲಿ ಸಂಗೀತ ಸೇವೆ ಮತ್ತು ಸಾಂಸ್ಕೃತಿಕ ಕಾರ್ಯಕ್ರಮಗಳ ಜೊತೆಗೆ ನಾಡಿಗೆ ಸೇವೆ ಸಲ್ಲಿಸಿದ ಗಣ್ಯರನ್ನು ಗೌರವಿಸಲಾಗುತ್ತಿದೆ ಎಂದು ತಿಳಿಸಿದರು.
ಮಹಾಸಭಾದಲ್ಲಿ ಸುಸಜ್ಜಿತ ಸಭಾಂಗಣ ನಿರ್ಮಿಸಲಾಗಿದ್ದು, ಕಲಾವಿದರಿಗೆ ಅತ್ಯಂತ ಕಡಿಮೆ ವೆಚ್ಚದಲ್ಲಿ ಅದನ್ನು ಒದಗಿಸಲಾಗುತ್ತಿದೆ. ಪ್ರತಿ ತಿಂಗಳ ಕೊನೆಯ ಶುಕ್ರವಾರ ಸಾಧಕರ ಸನ್ಮಾನ ಮತ್ತು ಕಲಾವಿದರಿಗೆ ಸಂಗೀತ ಸೇವೆಯ ಅವಕಾಶ ಕಲ್ಪಿಸಲಾಗಿದೆ ಎಂದು ಅವರು ವಿವರಿಸಿದರು.
ಪಕ್ಷಭೇದವಿಲ್ಲದೆ ಸಾಂವಿಧಾನಿಕ ಕೆಲಸ: ವಿಶಾಲಾಕ್ಷಿ
ಆಡಳಿತ ಪಕ್ಷ ಮತ್ತು ವಿರೋಧ ಪಕ್ಷಗಳ ನಡುವೆ ಭೇದ ಮಾಡದೆ ಸಾಂವಿಧಾನಿಕ ಕೆಲಸ ನಿರ್ವಹಿಸುವುದಾಗಿ ವಿಶಾಲಾಕ್ಷಿ ಹೇಳಿದರು. ವಿಧಾನಸಭೆಯ ಮೊದಲ ಮಹಿಳಾ ಕಾರ್ಯದರ್ಶಿಯಾಗಿರುವುದನ್ನು ಉಲ್ಲೇಖಿಸಿದ ಅವರು, ಆಡಳಿತದ ಬಗ್ಗೆ ಮಾತನಾಡುವುದು ಸುಲಭವಾದರೂ ಅದನ್ನು ನಡೆಸುವಾಗ ಹಲವು ಸಮಸ್ಯೆಗಳು ಎದುರಾಗುತ್ತವೆ ಎಂದು ತಿಳಿಸಿದರು.
ತಮ್ಮ ಶಿಕ್ಷಣ ಮತ್ತು ಆಡಳಿತ ಸೇವೆಗೆ ಕುಟುಂಬದ ಸಹಕಾರ ದೊರೆತಿದೆ. ಮಂತ್ರಾಲಯದ ಗುರುರಾಯರ ಕೃಪೆ ಹಾಗೂ ಪ್ರೇರಣೆಯಿಂದ ಸಾಧನೆ ಸಾಧ್ಯವಾಯಿತು ಎಂದು ಅವರು ಹೇಳಿದರು.
ಸನ್ಮಾನಿತ ಸಾಧಕರು
ಎಚ್.ಜಿ. ಅಮೃತವರ್ಷಿಣಿ, ಬಿ.ಎನ್. ನಾಗರಾಜ್, ಭೀಮಸೇನಾಚಾರ್ಯ ಅತನೂರು, ಬಿ.ಎಸ್. ಅನಂತ ಕೃಷ್ಣ ಭಟ್, ಕೆ.ಎಸ್. ಅರುಣ್ ಕುಮಾರ್ ಆಚಾರ್ಯ, ಫಾಲಚಂದ್ರ ಶಾಸ್ತ್ರೀ, ಬಿ.ಆರ್. ವೆಂಕಟೇಶಾಚಾರ್, ಅಡ್ಡಗದ್ದೆ ಕೃಷ್ಣಮೂರ್ತಿ ಭಟ್ ಮತ್ತು ಪ್ರಭಾಕರ್ ಶಾಸ್ತ್ರೀ ಅವರನ್ನು ಗೌರವಿಸಲಾಯಿತು.
ಅರ್ಚನ ಉಡುಪ, ಎಂ.ಕೆ. ವಿಶಾಲಾಕ್ಷಿ, ಶ್ರೀಕಾಂತಮ್ ನಾಗೇಂದ್ರ ಶಾಸ್ತ್ರೀ, ರೈಸ್ ಗ್ರೈನ್ ವೆಂಕಟೇಶ್, ಸುಮಾ ಕೃಷ್ಣಮೂರ್ತಿ, ಎನ್. ರಾಜ್ ಕಮಲ್, ಎಸ್.ಎನ್. ಸ್ವಾಮಿ ಮತ್ತು ಲಕ್ಷ್ಮೀ ರೇಖಾ ಅರುಣ್ ಅವರನ್ನೂ ಸನ್ಮಾನಿಸಲಾಯಿತು.
ಮಹಾಸಭಾದ ಹಿರಿಯ ಉಪಾಧ್ಯಕ್ಷ ಆರ್. ಲಕ್ಷ್ಮೀಕಾಂತ್, ಖಜಾಂಚಿ ಸುಬ್ಬಣ್ಣ, ಬ್ರಾಹ್ಮಣ ಅಭಿವೃದ್ಧಿ ಮಂಡಳಿ ಅಧ್ಯಕ್ಷ ಅಸಗೋಡು ಜಯಸಿಂಹ, ಬಿಜೆಪಿ ಮುಖಂಡ ಪ್ರಹ್ಲಾದ್ ಬಾಬು, ದತ್ತಾತ್ರಿ ಮತ್ತು ರಾಮ್ ಪ್ರಸಾದ್ ಉಪಸ್ಥಿತರಿದ್ದರು.
