ಮುಂಗಾರು ಪೂರ್ವ ಮಳೆಗೆ ಬೆಂಗಳೂರು ಸಿದ್ಧತೆ ಪ್ರಶ್ನಾರ್ಥಕ: ಮರ ತೆರವು ವಿಳಂಬ, ಜಲಾವೃತ ಸಮಸ್ಯೆ ಮುಂದುವರಿಕೆ

ಬೆಂಗಳೂರು: ಮುಂಗಾರು ಮಳೆಗೆ ಪೂರ್ಣ ಸಿದ್ಧತೆ ಮಾಡಿಕೊಂಡಿದ್ದೇವೆ ಎಂದು ಹೇಳಿದ್ದರೂ, ಮುಂಗಾರು ಪೂರ್ವ ಮಳೆಯೇ ನಗರ ಪಾಲಿಕೆಯ ಸಿದ್ಧತೆಯನ್ನು ಪ್ರಶ್ನಾರ್ಥಕವಾಗಿಸಿದೆ. ಬಿದ್ದ ಮರಗಳ ತೆರವು ವಿಳಂಬ ಹಾಗೂ ಜಲಾವೃತ ಸಮಸ್ಯೆಗಳು ಸಾರ್ವಜನಿಕರನ್ನು ಸಂಕಷ್ಟಕ್ಕೆ ದೂಡಿವೆ.

ಬುಧವಾರ ಸುರಿದ ಭಾರೀ ಮಳೆ ಮತ್ತು ಬಿರುಗಾಳಿಯಿಂದ ನಗರದೆಲ್ಲೆಡೆ ಮರಗಳು, ಕೊಂಬೆಗಳು ಧರೆಗುರುಳಿದ್ದು, ರಸ್ತೆ ಸಂಚಾರಕ್ಕೆ ಅಡ್ಡಿಯಾಗಿತ್ತು. ಮಳೆ ನಿಂತು ಎರಡು ದಿನ ಕಳೆದರೂ ಹಲವೆಡೆ ಮರ ತೆರವು ಕಾರ್ಯ ಇನ್ನೂ ಪೂರ್ಣಗೊಂಡಿಲ್ಲ.

ಇದರ ನಡುವೆ ಗುರುವಾರ ಸಂಜೆ ಮತ್ತೆ ಮಳೆ ಸುರಿದಿದ್ದು, ಜನರಿಗೆ ಇನ್ನಷ್ಟು ತೊಂದರೆ ಉಂಟಾಗಿದೆ. ಸಿಟಿ ಮಾರ್ಕೆಟ್, ಮೆಜೆಸ್ಟಿಕ್, ಶಾಂತಿನಗರ, ಜಯನಗರ, ಜೆಪಿ ನಗರ, ಬನಶಂಕರಿ, ಹೆಬ್ಬಾಳ, ಯಲಹಂಕ, ರಾಜಾಜಿನಗರ, ವಿಜಯನಗರ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಮಳೆ ದಾಖಲಾಗಿದೆ.

ಬನ್ನೇರುಘಟ್ಟ ರಸ್ತೆ, ಗೊಟ್ಟಿಗೆರೆ, ಪುಟ್ಟೇನಹಳ್ಳಿ ಪ್ರದೇಶಗಳಲ್ಲಿ ಭಾರೀ ಜಲಾವೃತ ಉಂಟಾಗಿ, ವಾಹನ ಸವಾರರು, ವಿಶೇಷವಾಗಿ ಬೈಕ್ ಹಾಗೂ ಆಟೋ ಚಾಲಕರು ಪರದಾಡಿದ್ದಾರೆ. ಪುಟ್ಟೇನಹಳ್ಳಿಯ ಬಿಕೆ ಸರ್ಕಲ್ ಸಂಪೂರ್ಣ ನೀರಿನಿಂದ ತುಂಬಿ ಸಂಚಾರ ಸ್ಥಗಿತಗೊಂಡಿತ್ತು.

ರಾಜಾಜಿನಗರ, ಜಯನಗರ ಸೇರಿದಂತೆ ಹಲವು ಪ್ರದೇಶಗಳಲ್ಲಿ 48 ಗಂಟೆಗಳಾದರೂ ಮರಗಳು ತೆರವಾಗದೆ ರಸ್ತೆ ಮತ್ತು ಫುಟ್ಪಾತ್‌ಗಳು ಬಂದ್ ಆಗಿವೆ. ಕೆಲವು ಕಡೆಗಳಲ್ಲಿ ಸಂಚಾರಿ ಪೊಲೀಸರು ತಾವೇ ಮುಂದಾಗಿ ಮರ ತೆರವು ಕಾರ್ಯ ಕೈಗೊಂಡಿದ್ದಾರೆ.

ಕೆಆರ್ ಸರ್ಕಲ್ ಅಂಡರ್‌ಪಾಸ್ ಮಳೆಯಿಂದ ಜಲಾವೃತಗೊಂಡಿದ್ದು, ಎರಡು ದಿನಗಳಾದರೂ ಸಂಪೂರ್ಣವಾಗಿ ಸಂಚಾರಕ್ಕೆ ಮುಕ್ತವಾಗಿಲ್ಲ. ಕೆಸರು ಮತ್ತು ಎಲೆಗಳ ರಾಶಿಯಿಂದ ನೀರು ತೆರವು ಕಾರ್ಯ ನಿಧಾನಗತಿಯಲ್ಲಿ ನಡೆಯುತ್ತಿದೆ.

ಫ್ರೀಡಂ ಪಾರ್ಕ್, ಗಾಂಧಿನಗರ, ಆರ್‌ಪಿಸಿ ಲೇಔಟ್, ಹಂಪಿ ನಗರ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ಬಿದ್ದ ಮರಗಳು ಇನ್ನೂ ತೆರವಾಗದೆ ಜನರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಈ ಕುರಿತು ಪ್ರತಿಕ್ರಿಯೆ ನೀಡಿದ ಬೆಂಗಳೂರು ಅಭಿವೃದ್ಧಿ ಸಚಿವ ಡಿ.ಕೆ. ಶಿವಕುಮಾರ್, ಸುಮಾರು 448 ಅಪಾಯಕಾರಿ ಮರಗಳನ್ನು ಗುರುತಿಸಲಾಗಿದ್ದು, ಅವುಗಳನ್ನು ಕತ್ತರಿಸಲು ಹಾಗೂ ತೆರವುಗೊಳಿಸಲು ಸೂಚನೆ ನೀಡಲಾಗಿದೆ ಎಂದು ತಿಳಿಸಿದ್ದಾರೆ.

ವಿಧಾನಸೌಧ ಮತ್ತು ಶಾಸಕರ ಭವನ ಸಮೀಪದಲ್ಲಿಯೂ ಮರಗಳು ಬಿದ್ದಿದ್ದರೂ ಸಮಯಕ್ಕೆ ತೆರವು ಮಾಡದಿರುವುದು ಸಾರ್ವಜನಿಕರಲ್ಲಿ ಅಸಮಾಧಾನಕ್ಕೆ ಕಾರಣವಾಗಿದೆ. “ಇಂತಹ ಪ್ರಮುಖ ಪ್ರದೇಶಗಳಲ್ಲೇ ಹೀಗೆ ಆಗಿದ್ದರೆ, ಸಾಮಾನ್ಯ ಪ್ರದೇಶಗಳ ಪರಿಸ್ಥಿತಿ ಹೇಗೆ?” ಎಂಬ ಪ್ರಶ್ನೆ ನಾಗರಿಕರಿಂದ ಕೇಳಿಬರುತ್ತಿದೆ.

ಮುಂದಿನ ದಿನಗಳಲ್ಲಿ ಇನ್ನಷ್ಟು ಮಳೆಯ ಸಾಧ್ಯತೆ ಇರುವ ಹಿನ್ನೆಲೆ, ಅಧಿಕಾರಿಗಳು ತಕ್ಷಣ ಕ್ರಮ ಕೈಗೊಂಡು ಸಮನ್ವಯತೆಯಿಂದ ಸಮಸ್ಯೆಗಳನ್ನು ಬಗೆಹರಿಸಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.