ನವೆಂಬರ್ 24ರಿಂದ ಡಿಸೆಂಬರ್ 8ರವರೆಗೆ ನಡೆಯಲಿರುವ ಎನ್ಸಿಸಿ ಸಾಗರಯಾನ ಅಭಿಯಾನದ ಪೋಸ್ಟರ್; ಪಿಐಬಿ ರಕ್ಷಣಾ ವಿಭಾಗ ಹಂಚಿಕೊಂಡದ್ದು. ಚಿತ್ರ: ಲಭ್ಯವಾದದ್ದು
ಬೆಂಗಳೂರು: ಕರ್ನಾಟಕ ಮತ್ತು ಗೋವಾದಾದ್ಯಂತದ 72 ರಾಷ್ಟ್ರೀಯ ಕೆಡೆಟ್ ಕಾರ್ಪ್ಸ್ (ಎನ್ಸಿಸಿ) ಕೆಡೆಟ್ಗಳು ನವೆಂಬರ್ 24ರಿಂದ ಡಿಸೆಂಬರ್ 8ರವರೆಗೆ ಕಾರವಾರದಿಂದ ಗೋವಾವರೆಗೆ 15 ದಿನಗಳ ಸಾಗರಯಾನ ಅಭಿಯಾನ ಕೈಗೊಳ್ಳಲಿದ್ದಾರೆ ಎಂದು ಭಾರತೀಯ ವಾರ್ತಾ ಶಾಖೆಯ (ಪಿಐಬಿ) ರಕ್ಷಣಾ ವಿಭಾಗದ ಪ್ರಕಟಣೆ ತಿಳಿಸಿದೆ. ಆರಂಭಿಕ ನದಿ ತರಬೇತಿ ಮತ್ತು ಮುಕ್ತ ಸಮುದ್ರದ ಕರಾವಳಿ ಯಾನ ಸೇರಿ ಅಭಿಯಾನ ಒಟ್ಟು 220 ಕಿ.ಮೀ ದೂರ ಕ್ರಮಿಸಲಿದೆ.
ಎನ್ಸಿಸಿ ನಿರ್ದೇಶನಾಲಯ ಕರ್ನಾಟಕ ಮತ್ತು ಗೋವಾ ಆಯೋಜಿಸಿರುವ ಈ ಅಭಿಯಾನವನ್ನು ಬೆಳಗಾವಿಯ ಎನ್ಸಿಸಿ ಗ್ರೂಪ್ ಹೆಡ್ಕ್ವಾರ್ಟರ್ಸ್ನ ಆಶ್ರಯದಲ್ಲಿ ಕಾರವಾರದ 8 ಕರ್ನಾಟಕ ನೇವಲ್ ಯೂನಿಟ್ ಎನ್ಸಿಸಿ ನಿರ್ವಹಿಸುತ್ತಿದೆ ಎಂದು ಪ್ರಕಟಣೆ ತಿಳಿಸಿದೆ. ಘಟಕದ ಕಮಾಂಡಿಂಗ್ ಆಫೀಸರ್ ನೇತೃತ್ವ ವಹಿಸಲಿದ್ದು, ಅವರಿಗೆ ಎನ್ಸಿಸಿ ನಿರ್ದೇಶನಾಲಯ ಕರ್ನಾಟಕ ಮತ್ತು ಗೋವಾದ ಇಬ್ಬರು ಭಾರತೀಯ ನೌಕಾಪಡೆ ಅಧಿಕಾರಿಗಳು ಹಾಗೂ 12 ಅನುಭವಿ ನಾವಿಕರು ನೆರವಾಗಲಿದ್ದಾರೆ.
ಅಭಿಯಾನ ಮೂರು ಸಾಂಪ್ರದಾಯಿಕ ಡಿಕೆ ವೇಲರ್ ದೋಣಿಗಳಲ್ಲಿ ಎರಡು ಹಂತಗಳಲ್ಲಿ ನಡೆಯಲಿದೆ. ಮೊದಲ ಹಂತದಲ್ಲಿ ಕೆಡೆಟ್ಗಳು ಕಾರವಾರದ ಕಾಳಿ ನದಿಯ ಶಾಂತ ನೀರಿನಲ್ಲಿ ದೋಣಿ ಎಳೆಯುವ (ಬೋಟ್-ಪುಲ್ಲಿಂಗ್) ಮತ್ತು ನೌಕಾಯಾನ ತರಬೇತಿ ಪಡೆಯಲಿದ್ದಾರೆ. ಇದು ಗೋವಾಕ್ಕೆ ಹೋಗಿ ಬರುವ ಕರಾವಳಿ ಹಂತಕ್ಕಾಗಿ ಮುಕ್ತ ಸಮುದ್ರಕ್ಕೆ ಇಳಿಯುವ ಮೊದಲು ಗಾಳಿಯ ದಿಕ್ಕು, ಉಬ್ಬರವಿಳಿತದ ಬದಲಾವಣೆ ಮತ್ತು ನೌಕೆ ನಿರ್ವಹಣೆಗೆ ಹೊಂದಿಕೊಳ್ಳಲು ಅವರಿಗೆ ನೆರವಾಗಲಿದೆ.
ದೈಹಿಕ ಸಹಿಷ್ಣುತೆಯನ್ನು ಪರೀಕ್ಷಿಸುವುದು ಹಾಗೂ ಸಾಹಸ, ತಂಡ ಸ್ಫೂರ್ತಿ ಮತ್ತು ಸೌಹಾರ್ದತೆ ಬೆಳೆಸುವುದರ ಜೊತೆಗೆ ಅಭಿಯಾನಕ್ಕೆ ಸಾಮಾಜಿಕ ಮತ್ತು ಪರಿಸರ ಜಾಗೃತಿಯ ಉದ್ದೇಶವೂ ಇದೆ ಎಂದು ಪ್ರಕಟಣೆ ತಿಳಿಸಿದೆ. ಕಾರವಾರ–ಗೋವಾ ಮಾರ್ಗದ ವಿವಿಧ ಕರಾವಳಿ ನಿಲುಗಡೆಗಳಲ್ಲಿ ಕಡಲ ಸಂರಕ್ಷಣೆ ಮತ್ತು ಪ್ಲಾಸ್ಟಿಕ್ ಮುಕ್ತ ಕಡಲತೀರಗಳಿಗೆ ಉತ್ತೇಜನ ನೀಡಲು ಕೆಡೆಟ್ಗಳು ಬೀಚ್ ಮತ್ತು ಕರಾವಳಿ ಸ್ವಚ್ಛತಾ ಅಭಿಯಾನ ನಡೆಸಲಿದ್ದಾರೆ.
ಜೊತೆಗೆ ಸ್ಥಳೀಯ ಸಮುದಾಯಗಳೊಂದಿಗೆ ಸಂವಾದ ನಡೆಸಿ ಕೇಂದ್ರ ಸರ್ಕಾರದ ಪ್ರಮುಖ ಉಪಕ್ರಮಗಳ ಕುರಿತು ಜಾಗೃತಿ ಮೂಡಿಸಲಿದ್ದಾರೆ. ಇವುಗಳಲ್ಲಿ ‘ಏಕ್ ಪೇಡ್ ಮಾ ಕೆ ನಾಮ್’ ಅಡಿ ಪರಿಸರ ಸಂರಕ್ಷಣೆ, ‘ಟಿಬಿ ಮುಕ್ತ ಭಾರತ ಅಭಿಯಾನ’ ಮೂಲಕ ಕ್ಷಯರೋಗ ನಿರ್ಮೂಲನೆ ಹಾಗೂ ‘ನಶಾ ಮುಕ್ತ ಭಾರತ ಅಭಿಯಾನ’ ಅಡಿ ಮಾದಕ ದ್ರವ್ಯ ವ್ಯಸನದ ವಿರುದ್ಧ ಯುವ ಶಿಕ್ಷಣ ಸೇರಿವೆ.
ಎನ್ಸಿಸಿ ಅಧಿಕಾರಿಗಳ ಪ್ರಕಾರ, ತರಗತಿಯ ಶಿಸ್ತನ್ನು ನೈಜ ಸಾಗರ ಸವಾಲುಗಳೊಂದಿಗೆ ಜೋಡಿಸುವುದು ಮತ್ತು ಎರಡೂ ರಾಜ್ಯಗಳ ಯುವಕರಲ್ಲಿ ನಾಯಕತ್ವ, ಸ್ಥಿತಿಸ್ಥಾಪಕತ್ವ ಹಾಗೂ ರಾಷ್ಟ್ರೀಯ ಕರ್ತವ್ಯದ ಭಾವನೆ ಬೆಳೆಸುವುದು ಅಭಿಯಾನದ ಗುರಿಯಾಗಿದೆ.
