ಬೆಂಗಳೂರಿನ ತರಬೇತಿ ಕಮಾಂಡ್ ಪ್ರಧಾನ ಕಚೇರಿಯಲ್ಲಿ ನವೆಂಬರ್ 17ರಂದು ಭಾರತೀಯ ವಾಯುಪಡೆಯ ಸಂಚಾರಿ ಪ್ರಚಾರ ವಾಹನಕ್ಕೆ ಚಾಲನೆ ನೀಡುವ ಸಂದರ್ಭದಲ್ಲಿ ರಿಬ್ಬನ್ ಕತ್ತರಿಸುತ್ತಿರುವುದು; ಮಾಧ್ಯಮ ಗುಂಪಿನಲ್ಲಿ ಹಂಚಿಕೊಂಡ ಚಿತ್ರ. ಚಿತ್ರ: ಲಭ್ಯವಾದದ್ದು
ಬೆಂಗಳೂರು: ಅಗ್ನಿವೀರವಾಯು ಮತ್ತು ಏರ್ಮನ್ ವೃಂದಗಳ ಮೇಲೆ ವಿಶೇಷ ಗಮನ ಹರಿಸಿ ಭಾರತೀಯ ವಾಯುಪಡೆಯಲ್ಲಿನ ವೃತ್ತಿ ಅವಕಾಶಗಳನ್ನು ಪ್ರಚಾರ ಮಾಡಲು ವಾಯುಪಡೆಯ ತರಬೇತಿ ಕಮಾಂಡ್ ನವೆಂಬರ್ 17ರಂದು ಸಂಚಾರಿ ಪ್ರಚಾರ ವಾಹನಕ್ಕೆ ಚಾಲನೆ ನೀಡಿತು ಎಂದು ಭಾರತೀಯ ವಾರ್ತಾ ಶಾಖೆಯ (ಪಿಐಬಿ) ರಕ್ಷಣಾ ವಿಭಾಗದ ಪ್ರಕಟಣೆ ತಿಳಿಸಿದೆ.
ತರಬೇತಿ ಕಮಾಂಡ್ ಪ್ರಧಾನ ಕಚೇರಿಯ ಆಡಳಿತ ವಿಭಾಗದ ಹಿರಿಯ ಅಧಿಕಾರಿ ಏರ್ ವೈಸ್ ಮಾರ್ಷಲ್ ಜಿ. ಆನಂದ್ ಮತ್ತು ಕೇಂದ್ರೀಯ ಏರ್ಮನ್ ಆಯ್ಕೆ ಮಂಡಳಿಯ (ಸಿಎಎಸ್ಬಿ) ಅಧ್ಯಕ್ಷ ಏರ್ ಕಮೋಡೋರ್ ಎನ್.ಕೆ. ಚಬ್ಬಾ ಅವರು ಬೆಂಗಳೂರಿನ ತರಬೇತಿ ಕಮಾಂಡ್ ಪ್ರಧಾನ ಕಚೇರಿಯಿಂದ ಬೆಳಿಗ್ಗೆ 08:45ಕ್ಕೆ ವಾಹನಕ್ಕೆ ಹಸಿರು ನಿಶಾನೆ ತೋರಿದರು ಎಂದು ಪ್ರಕಟಣೆ ತಿಳಿಸಿದೆ. ಭಾರತೀಯ ವಾಯುಪಡೆಯಲ್ಲಿನ ವೃತ್ತಿ ಅವಕಾಶಗಳ ಬಗ್ಗೆ ಜಾಗೃತಿ ಮೂಡಿಸುವುದು ಈ ಉಪಕ್ರಮದ ಉದ್ದೇಶ.
ವಾಹನ ಏಳು ದಿನಗಳ ಕಾಲ ಕರ್ನಾಟಕದಾದ್ಯಂತ ಸಂಚರಿಸಲಿದ್ದು, ವಿವಿಧ ಜಿಲ್ಲೆಗಳ ಯುವಜನರನ್ನು ತಲುಪಲು ದಿನಕ್ಕೆ ಸುಮಾರು 60 ಕಿ.ಮೀ ಕ್ರಮಿಸಲಿದೆ. ಮಾರ್ಗ ರಾಮನಗರ, ಮಂಡ್ಯ, ಮೈಸೂರು, ಪಿರಿಯಾಪಟ್ಟಣ, ಮಡಿಕೇರಿ ಮತ್ತು ಸುಳ್ಯ ಮೂಲಕ ಸಾಗಿ ನವೆಂಬರ್ 23ರಂದು ಬಂಟ್ವಾಳದಲ್ಲಿ ಕೊನೆಗೊಳ್ಳಲಿದೆ.
ಯುವಜನರೊಂದಿಗೆ ಪರಿಣಾಮಕಾರಿಯಾಗಿ ಸಂವಾದ ನಡೆಸಲು ತಂಡ ವಿವಿಧ ಶಿಕ್ಷಣ ಸಂಸ್ಥೆಗಳಲ್ಲಿ ಸಂವಾದ ಅವಧಿಗಳು ಮತ್ತು ಆಟಗಳನ್ನು ಆಯೋಜಿಸಲಿದೆ. ನಿಗದಿತ ನಿಲುಗಡೆಗಳು: ಬಿಡದಿ (ನ.17), ಚನ್ನಪಟ್ಟಣ (ನ.18), ಶ್ರೀರಂಗಪಟ್ಟಣ (ನ.19), ಪಿರಿಯಾಪಟ್ಟಣ (ನ.20), ಕುಶಾಲನಗರ (ನ.21), ಸುಳ್ಯ (ನ.22), ಪುತ್ತೂರು ಮತ್ತು ಬಂಟ್ವಾಳ (ನ.23).
ಚಾಲನೆ ಸಮಾರಂಭದಲ್ಲಿ ವಿದ್ಯಾರ್ಥಿಗಳನ್ನು ಉದ್ದೇಶಿಸಿ ಮಾತನಾಡಿದ ಏರ್ ವೈಸ್ ಮಾರ್ಷಲ್ ಆನಂದ್ ಅವರು, ಭಾರತೀಯ ವಾಯುಪಡೆ ಒದಗಿಸುವ ಸಾಹಸಮಯ ಮತ್ತು ದೇಶಪ್ರೇಮದ ಜೀವನಶೈಲಿಯ ಬಗ್ಗೆ ಮಾತನಾಡಿ, ಸವಾಲನ್ನು ಸ್ವೀಕರಿಸಿ ರಾಷ್ಟ್ರ ಸೇವೆಯ ಗಣನೀಯ ವೃತ್ತಿಯನ್ನು ಪರಿಗಣಿಸುವಂತೆ ಯುವಜನರನ್ನು ಪ್ರೋತ್ಸಾಹಿಸಿದರು ಎಂದು ಪ್ರಕಟಣೆ ತಿಳಿಸಿದೆ.
