ಬೆಂಗಳೂರಿನಲ್ಲಿ ನಡೆದ ಬೆಂಗಳೂರು ಟೆಕ್ ಸಮ್ಮಿಟ್ 2026ರಲ್ಲಿ ನಡೆದ ಸಂವಾದ. ಚಿತ್ರ: ಲಭ್ಯವಾದದ್ದು
ಬೆಂಗಳೂರು: ಬರ ನಿರ್ವಹಣೆ, ನೀರಿನ ನಿರ್ವಹಣೆ, ಕೀಟಬಾಧೆ ಪತ್ತೆ ಹಾಗೂ ನಿರ್ವಹಣೆ, ಇಳುವರಿ ಅಂದಾಜು ಮತ್ತು ಸ್ಥಳೀಯ ಮಳೆ ಮುನ್ಸೂಚನೆ ಸೇರಿದಂತೆ ಕೃಷಿ ಚಟುವಟಿಕೆಯ ವಿವಿಧ ವಿಷಯಗಳಲ್ಲಿ ಕೃತಕ ಬುದ್ಧಿಮತ್ತೆ ಸೇರಿದಂತೆ ಆಧುನಿಕ ತಂತ್ರಜ್ಞಾನ ಕ್ರಾಂತಿಕಾರಕ ಬದಲಾವಣೆ ತರಲಿದೆ ಎಂದು ಬೆಂಗಳೂರು ಟೆಕ್ ಸಮ್ಮಿಟ್ನ ಕೃಷಿ ಗೋಷ್ಠಿಯಲ್ಲಿ ಗುರುವಾರ ತಜ್ಞರು ಹೇಳಿದರು ಎಂದು ಪ್ರಕಟಣೆ ತಿಳಿಸಿದೆ.
ರಾಷ್ಟ್ರೀಯ ಕೃಷಿ ಮತ್ತು ಗ್ರಾಮೀಣಾಭಿವೃದ್ಧಿ ಬ್ಯಾಂಕ್ (ನಬಾರ್ಡ್) ಉಪ ವ್ಯವಸ್ಥಾಪಕ ನಿರ್ದೇಶಕ ಗೋವರ್ಧನ್ ರಾವತ್, ‘ಭಾರತ್ ವಿಸ್ತಾರ್’ ಯೋಜನೆಯ ಮೂಲಕ ಕೇಂದ್ರ ಸರ್ಕಾರ ಕೃಷಿ ಕುರಿತ ಪೋರ್ಟಲ್ಗಳು ಹಾಗೂ ಭಾರತೀಯ ಕೃಷಿ ಸಂಶೋಧನಾ ಪರಿಷತ್ತು (ಐಸಿಎಆರ್) ಸಲಹೆಗಾರರನ್ನು ಒಂದೇ ವೇದಿಕೆಯಡಿ ತಂದಿದೆ ಎಂದರು. ಕೃಷಿ ಕುರಿತ ಪ್ರಶ್ನೆಗಳು ಮತ್ತು ಸಂದೇಹಗಳಿಗೆ ಎ.ಐ ಚಾಟ್ಬಾಟ್ ಮೂಲಕ ನಿಖರ ಉತ್ತರ ನೀಡುವ ಕಿಸಾನ್-ಇ-ಮಿತ್ರ ಸ್ಥಾಪಿಸಲಾಗಿದ್ದು, ಇದು 11 ಭಾರತೀಯ ಭಾಷೆಗಳಲ್ಲಿ ಉತ್ತರಿಸಬಲ್ಲದು; ದಿನಕ್ಕೆ ಸುಮಾರು 8,000 ಉತ್ತರಗಳಂತೆ ಇದುವರೆಗೆ 93 ಲಕ್ಷ ಕೋರಿಕೆಗಳಿಗೆ ಉತ್ತರ ನೀಡಿದೆ ಎಂದು ಅವರು ತಿಳಿಸಿದರು.
ಬೆಂಗಳೂರು ಕೃಷಿ ವಿಶ್ವವಿದ್ಯಾಲಯದ ಪ್ರಾಧ್ಯಾಪಕ ಡಾ. ಎಂ.ಎಸ್. ಶೇಷಶಾಯಿ, ಕೃಷಿಗೆ ಶುದ್ಧ ನೀರಿನ ಲಭ್ಯತೆ ಗಣನೀಯವಾಗಿ ಇಳಿಯುತ್ತಿದ್ದು, ಕೈಗಾರಿಕೆ ಸೇರಿದಂತೆ ಇತರೆ ವಲಯಗಳಲ್ಲಿ ನೀರಿನ ಬಳಕೆ ಹೆಚ್ಚುತ್ತಿದೆ ಎಂದರು. ಕೃಷ್ಣರಾಜ ಸಾಗರ ಅಣೆಕಟ್ಟಿನ ಕಳೆದ 80 ವರ್ಷಗಳ ದತ್ತಾಂಶ ನೋಡಿದರೆ ನೀರು ಸಂಗ್ರಹ ಸಾಮರ್ಥ್ಯ ಭಾರಿ ಇಳಿದಿದ್ದು, ಪ್ರತಿ ಹನಿ ನೀರಿನಿಂದ ಹೆಚ್ಚು ಇಳುವರಿ ಪಡೆಯಲು ತಂತ್ರಜ್ಞಾನದ ನೆರವು ಅಗತ್ಯ ಎಂದು ಹೇಳಿದರು.
‘ಸಿಮಿಟ್’ ಸಂಸ್ಥೆಯ ಪ್ರಾದೇಶಿಕ ನಿರ್ದೇಶಕ ಡಾ. ಬಿ.ಎಂ. ಪ್ರಸನ್ನ, ವಿವಿಧ ದತ್ತಾಂಶ ಸಂಗ್ರಹಣೆಯಲ್ಲಿ ಎ.ಐ ಹೆಚ್ಚಿನ ನೆರವು ನೀಡುತ್ತಿದೆ; ಆದರೆ ಲಭ್ಯ ದತ್ತಾಂಶಗಳನ್ನು ನಿರ್ಧಾರಗಳಲ್ಲಿ ಹೇಗೆ ಬಳಸುತ್ತೇವೆ ಮತ್ತು ಹೆಚ್ಚಿನ ಇಳುವರಿಗೆ ಹೇಗೆ ಉಪಯೋಗಿಸುತ್ತೇವೆ ಎಂಬುದೇ ಸವಾಲು ಎಂದರು.
‘ಫಸಲ್’ ಸಂಸ್ಥೆಯ ಸಿಇಒ ಶೈಲೇಂದ್ರ ತಿವಾರಿ, ಭಾರತ ಸುಮಾರು 165 ರಾಷ್ಟ್ರಗಳ ಒಟ್ಟು ಪ್ರದೇಶದಷ್ಟು ಕೃಷಿಭೂಮಿ ಹೊಂದಿದ್ದು, ಸಮರ್ಪಕ ಕೃಷಿ ಪದ್ಧತಿ ಅಳವಡಿಸಿಕೊಂಡರೆ ಇಡೀ ಜಗತ್ತಿನ ಆಹಾರ ಬೇಡಿಕೆ ಪೂರೈಸುವ ಸಾಮರ್ಥ್ಯ ಹೊಂದಿದೆ ಎಂದರು. ದೇಶದ ತೋಟಗಾರಿಕೆ ವಲಯದ ರಫ್ತು ಸಾಮರ್ಥ್ಯವನ್ನು ಇನ್ನೂ 15 ಪಟ್ಟು ಹೆಚ್ಚಿಸುವ ಅವಕಾಶವಿದೆ ಮತ್ತು ಭಾರತದ ಕೃಷಿ ಸಮಸ್ಯೆಗಳನ್ನು ಬಗೆಹರಿಸಲು ಕಳೆದ ಏಳೆಂಟು ವರ್ಷಗಳಲ್ಲಿ ಉತ್ತಮ ಕಾರ್ಯಗಳಾಗುತ್ತಿವೆ ಎಂದು ಅವರು ಹೇಳಿದರು.
ಡಾ. ಕೆ.ಕೆ. ನಾರಾಯಣನ್ ಸಂವಾದ ನಿರ್ವಹಿಸಿದರು.
ಇದಕ್ಕೂ ಮುನ್ನ, 24 ವಿಸಿ ಸಂಸ್ಥೆಗಳಿಂದ ₹1,050 ಕೋಟಿ ಡೀಪ್ಟೆಕ್ ಹೂಡಿಕೆ ಘೋಷಣೆಯೊಂದಿಗೆ ಬೆಂಗಳೂರು ಟೆಕ್ ಸಮಿಟ್ 2026 ಸಮಾರೋಪಗೊಂಡಿತ್ತು.
