ಬೆಂಗಳೂರಿನಲ್ಲಿ ನಡೆದ ಬೆಂಗಳೂರು ಟೆಕ್ ಸಮ್ಮಿಟ್ 2026ರ ಗೋಷ್ಠಿಯಲ್ಲಿ ಭಾಗವಹಿಸಿದವರು. ಚಿತ್ರ: ಲಭ್ಯವಾದದ್ದು
ಬೆಂಗಳೂರು: ವಿದ್ಯುತ್ ಚಾಲಿತ ವಾಹನ (ಇವಿ) ಕ್ಷೇತ್ರದಲ್ಲಿ ಸ್ವದೇಶಿ ತಂತ್ರಜ್ಞಾನ, ಸುಧಾರಿತ ಬ್ಯಾಟರಿ ವಿನ್ಯಾಸ ಮತ್ತು ವೇಗದ ಚಾರ್ಜಿಂಗ್ ವ್ಯವಸ್ಥೆಗಳು ಹೊಸ ಸಾಧ್ಯತೆಗಳನ್ನು ತೆರೆದಿಡುತ್ತಿವೆ; ಆದರೆ ಬಂಡವಾಳ ಹೂಡಿಕೆಗೆ ಅವಕಾಶಗಳಿದ್ದರೂ ಕೌಶಲಭರಿತ ಮಾನವ ಸಂಪನ್ಮೂಲದ ಕೊರತೆ ಮತ್ತು ಪೂರೈಕೆ ಸರಪಳಿಯ ಸವಾಲುಗಳು ಉದ್ಯಮದ ಬೆಳವಣಿಗೆಗೆ ಅಡ್ಡಿಯಾಗಿವೆ ಎಂದು ತಜ್ಞರು ಬೆಂಗಳೂರು ಟೆಕ್ ಸಮ್ಮಿಟ್ನಲ್ಲಿ ಗುರುವಾರ ಅಭಿಪ್ರಾಯಪಟ್ಟರು ಎಂದು ಪ್ರಕಟಣೆ ತಿಳಿಸಿದೆ.
‘ಬ್ಯಾಟರಿ ಮತ್ತು ಇಂಧನ ವ್ಯವಸ್ಥೆಗಳು’ ಕುರಿತ ಸಂವಾದದಲ್ಲಿ ಭಾರತದ ಇವಿ ಮತ್ತು ಬ್ಯಾಟರಿ ತಂತ್ರಜ್ಞಾನ ಕ್ಷೇತ್ರ ಎದುರಿಸುತ್ತಿರುವ ಸವಾಲು, ನಾವೀನ್ಯತೆ ಹಾಗೂ ಭವಿಷ್ಯದ ಸಾಧ್ಯತೆಗಳ ಬಗ್ಗೆ ಚರ್ಚಿಸಲಾಯಿತು.
ಬ್ಯಾಟರಿ ತಯಾರಿಕೆಯಲ್ಲಿ ತೊಡಗಿರುವ ‘ಎಟರ್ನಲ್ ಎನರ್ಜಿ’ ಸಂಸ್ಥೆಯ ಅಪೂರ್ವ್, ಸಾಂಪ್ರದಾಯಿಕ ಉತ್ಪಾದನಾ ವಿಧಾನಗಳನ್ನು ಬದಿಗೊತ್ತಿ ಮೂಲ ತತ್ವಗಳ ಆಧಾರದಲ್ಲಿ 3ಡಿ ವಿನ್ಯಾಸ ಹಾಗೂ ಸ್ವಂತ ಯಂತ್ರೋಪಕರಣಗಳನ್ನು ಅಭಿವೃದ್ಧಿಪಡಿಸಿದ್ದನ್ನು ವಿವರಿಸಿದರು. ಇದರಿಂದ 32 ಹಂತಗಳಿದ್ದ ಉತ್ಪಾದನಾ ಪ್ರಕ್ರಿಯೆಯನ್ನು ಕೇವಲ ಎಂಟು ಹಂತಗಳಿಗೆ ಇಳಿಸಲು ಸಾಧ್ಯವಾಗಿದೆ ಎಂದು ತಿಳಿಸಿದರು.
‘ಎಕ್ಸ್ಪೋನೆಂಟ್’ ಸಂಸ್ಥೆಯ ಆಯುಷ್, ವಾಣಿಜ್ಯ ವಾಹನಗಳನ್ನು ಕೇವಲ 15 ನಿಮಿಷಗಳಲ್ಲಿ ಶೂನ್ಯದಿಂದ ಶೇಕಡಾ 100ರಷ್ಟು ಚಾರ್ಜ್ ಮಾಡುವ ತಂತ್ರಜ್ಞಾನವನ್ನು ಪರಿಚಯಿಸಿದರು. ಬ್ಯಾಟರಿಯಲ್ಲಿ ಕೂಲಿಂಗ್ ವ್ಯವಸ್ಥೆ ಅಳವಡಿಸುವ ಬದಲು ಚಾರ್ಜರ್ನಲ್ಲೇ ಅಳವಡಿಸುವ ಮೂಲಕ ವೆಚ್ಚ ತಗ್ಗಿಸಲಾಗಿದ್ದು, ಆಟೋರಿಕ್ಷಾದಿಂದ ಬಸ್ವರೆಗೆ ವಿವಿಧ ವಾಹನಗಳಿಗೆ ವೇಗದ ಚಾರ್ಜಿಂಗ್ ಸೌಲಭ್ಯ ಒದಗಿಸಲಾಗುತ್ತಿದೆ ಎಂದು ಅವರು ವಿವರಿಸಿದರು.
‘ಜಿಯೋ ಪ್ಲಾಟ್ಫಾರ್ಮ್ಸ್’ನ ಅನುಜ್, ದೇಶದಾದ್ಯಂತ ಚಾರ್ಜಿಂಗ್ ಜಾಲ ವಿಸ್ತರಿಸುವ ತಮ್ಮ ಸಂಸ್ಥೆಯ ಗುರಿಯನ್ನು ವಿವರಿಸಿದರು. ಫ್ಲೀಟ್ ನಿರ್ವಹಣಾ ಸಂಸ್ಥೆಗಳು ಮತ್ತು ಖಾಸಗಿ ಸಹಭಾಗಿತ್ವದ ಮೂಲಕ ವಿಶ್ವಾಸಾರ್ಹ ಚಾರ್ಜಿಂಗ್ ಮೂಲಸೌಕರ್ಯ ನಿರ್ಮಿಸುವುದು ಇವಿ ಬಳಕೆಗೆ ಮತ್ತಷ್ಟು ಉತ್ತೇಜನ ನೀಡಲಿದೆ ಎಂದು ಅವರು ಅಭಿಪ್ರಾಯಪಟ್ಟರು.
ಸ್ವದೇಶಿ ತಂತ್ರಜ್ಞಾನ ಅಭಿವೃದ್ಧಿ, ಉತ್ಪಾದನಾ ಪ್ರಕ್ರಿಯೆಯ ಸರಳೀಕರಣ ಮತ್ತು ವೇಗದ ಚಾರ್ಜಿಂಗ್ನಲ್ಲಿನ ಆವಿಷ್ಕಾರಗಳು ಭಾರತದ ಇವಿ ವಲಯದ ಬೆಳವಣಿಗೆಗೆ ಹೊಸ ದಿಕ್ಕು ನೀಡುತ್ತಿವೆ ಎಂಬ ಅಭಿಪ್ರಾಯ ಸಂವಾದದಲ್ಲಿ ವ್ಯಕ್ತವಾಯಿತು. ವಿಷನ್ ಅಸ್ತ್ರಾ ಸಮೂಹದ ಸ್ಥಾಪಕ ಯೆದು ಜಾತವೇದನ್ ಸಂವಾದ ನಿರ್ವಹಿಸಿದರು.
