BWSSBಯ “ಐದು ಸ್ತಂಭ” ಜಲ ಮಾದರಿಗೆ ಜಾಗತಿಕ ಮೆಚ್ಚುಗೆ; ಮ್ಯಾಡ್ರಿಡ್ ಶೃಂಗಸಭೆಯಲ್ಲಿ ವಿಶ್ವದ ಟಾಪ್-5 ನೀರು ಸರಬರಾಜು ಸಂಸ್ಥೆಗಳಲ್ಲಿ ಸ್ಥಾನ

ಮ್ಯಾಡ್ರಿಡ್/ಬೆಂಗಳೂರು: ಭಾರತದ ನಗರ ಜಲ ನಿರ್ವಹಣೆಗೆ ಜಾಗತಿಕ ಮಟ್ಟದಲ್ಲಿ ಮಹತ್ವದ ಮಾನ್ಯತೆ ದೊರೆತಿದ್ದು, ಸ್ಪೇನ್‌ನ ಮ್ಯಾಡ್ರಿಡ್‌ನಲ್ಲಿ ನಡೆಯುತ್ತಿರುವ ಪ್ರತಿಷ್ಠಿತ ಗ್ಲೋಬಲ್ ವಾಟರ್ ಸಮಿಟ್ 2026ರಲ್ಲಿ ಬೆಂಗಳೂರು ಜಲ ಸರಬರಾಜು ಮತ್ತು ಒಳಚರಂಡಿ ಮಂಡಳಿ (BWSSB) ವಿಶ್ವದ ಟಾಪ್-5 ಜಲ ಸಂಸ್ಥೆಗಳ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿದೆ.

ಮೂರು ಪ್ರಮುಖ ಜಾಗತಿಕ ವಿಭಾಗಗಳಲ್ಲಿ ಸ್ಥಾನ ಪಡೆದ ಏಕೈಕ ಭಾರತೀಯ ಜಲ ಸಂಸ್ಥೆಯಾಗಿ BWSSB ಇತಿಹಾಸ ನಿರ್ಮಿಸಿದ್ದು, ಬೆಂಗಳೂರಿನ ಸುಸ್ಥಿರ ಮತ್ತು ತಂತ್ರಜ್ಞಾನ ಆಧಾರಿತ ಜಲ ನಿರ್ವಹಣಾ ಮಾದರಿಗೆ ಜಾಗತಿಕ ಮಟ್ಟದಲ್ಲಿ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ.

BWSSBಯ “ಐದು ಸ್ತಂಭ” ಜಲ ಮಾದರಿಗೆ ಜಾಗತಿಕ ಮೆಚ್ಚುಗೆ

BWSSBಯ “Five Pillars” ಅಂದರೆ “ಐದು ಸ್ತಂಭ” ಜಲ ನಿರ್ವಹಣಾ ತಂತ್ರಕ್ಕೆ ಶೃಂಗಸಭೆಯಲ್ಲಿ ವಿಶೇಷ ಪ್ರಶಂಸೆ ದೊರೆಯಿತು.

ಈ ಮಾದರಿ ಕೆಳಕಂಡ ಅಂಶಗಳ ಮೇಲೆ ಕೇಂದ್ರೀಕೃತವಾಗಿದೆ:

• ಜಲ ಸಂರಕ್ಷಣೆ
• ತ್ಯಾಜ್ಯ ನೀರಿನ ಮರುಬಳಕೆ
• ಮರುಶುದ್ಧೀಕರಿಸಿದ ನೀರಿನ ಉಪಯೋಗ
• ಸುಸ್ಥಿರ ನಗರ ಜಲ ಆಡಳಿತ
• ದೀರ್ಘಕಾಲಿಕ ಜಲ ಭದ್ರತೆ

ಈ ಸಮಗ್ರ ಜಲ ನಿರ್ವಹಣಾ ಮಾದರಿಯನ್ನು ವಿಶ್ವಸಂಸ್ಥೆಯ Sustainable Development Goal-6 (SDG-6) — “ಎಲ್ಲರಿಗೂ ಶುದ್ಧ ನೀರು ಮತ್ತು ಸ್ವಚ್ಛತೆ” ಗುರಿ ಸಾಧನೆಗೆ ನೀಡಿದ ಕೊಡುಗೆಗಾಗಿ ಜಾಗತಿಕ ಮಟ್ಟದಲ್ಲಿ ಗುರುತಿಸಲಾಯಿತು.

ಈ ವಿಭಾಗದಲ್ಲಿ BWSSB ಜೊತೆಗೆ ಕೆಳಕಂಡ ಜಾಗತಿಕ ಜಲ ಸಂಸ್ಥೆಗಳು ಸ್ಥಾನ ಪಡೆದವು:

• ಆಗ್ವಾಸ್ ನುವಾಸ್ – ಚಿಲಿ
• ಇಂಡಾ ವಾಟರ್ ಕನ್ಸೋರ್ಟಿಯಂ – ಮಲೇಷ್ಯಾ
• SANASA – ಬ್ರೆಜಿಲ್
• ಸನೆಪಾರ್ ಆಫ್ ಪರಾನಾ – ಬ್ರೆಜಿಲ್

ವಿಶ್ವದ ಟಾಪ್ ಯುಟಿಲಿಟಿ ವಿಭಾಗದಲ್ಲೂ BWSSB

ಜಲ ಕ್ಷೇತ್ರದ ಅತ್ಯಂತ ಪ್ರತಿಷ್ಠಿತ “Utility of the Year” ವಿಭಾಗದಲ್ಲಿಯೂ BWSSB ವಿಶ್ವದ ಟಾಪ್-5 ಸಂಸ್ಥೆಗಳ ಪಟ್ಟಿಯಲ್ಲಿ ಸ್ಥಾನ ಪಡೆದುಕೊಂಡಿದೆ.

ಕಳೆದ ಮೂರು ವರ್ಷಗಳಲ್ಲಿ:

• ನಗರ ಜಲ ಸರಬರಾಜು
• ಒಳಚರಂಡಿ ನಿರ್ವಹಣೆ
• ತಂತ್ರಜ್ಞಾನ ಅಳವಡಿಕೆ
• ಮೂಲಸೌಕರ್ಯ ವಿಸ್ತರಣೆ
• ಸುಸ್ಥಿರ ಆಡಳಿತ ವ್ಯವಸ್ಥೆ

ಕ್ಷೇತ್ರಗಳಲ್ಲಿ ತೋರಿದ ಸಾಧನೆ ಆಧಾರವಾಗಿ ಈ ಮಾನ್ಯತೆ ಲಭಿಸಿದೆ.

ಈ ವಿಭಾಗದಲ್ಲಿ BWSSB ಜೊತೆ ಕೆಳಕಂಡ ಜಾಗತಿಕ ಸಂಸ್ಥೆಗಳೂ ಸ್ಥಾನ ಪಡೆದಿದ್ದವು:

• ಮೌಲ್ಟನ್ ನಿಗ್ವೆಲ್ ವಾಟರ್ ಡಿಸ್ಟ್ರಿಕ್ಟ್, ದಕ್ಷಿಣ ಕ್ಯಾಲಿಫೋರ್ನಿಯಾ
• ಸಾಬೆಸ್ಪ್, ಸಾವೊ ಪಾಲೊ
• ನ್ಯಾಷನಲ್ ವಾಟರ್ ಕಂಪನಿ (NWC), ಸೌದಿ ಅರೇಬಿಯಾ

ಈ ಸಾಧನೆಯನ್ನು ಭಾರತದ ನಗರ ಮೂಲಸೌಕರ್ಯ ಕ್ಷೇತ್ರಕ್ಕೆ ಮಹತ್ವದ ಗೌರವವೆಂದು ಪರಿಗಣಿಸಲಾಗಿದೆ.

ಕಾವೇರಿ ಹಂತ-5 ಯೋಜನೆಗೂ ಜಾಗತಿಕ ಮಾನ್ಯತೆ

ಬೆಂಗಳೂರು ನಗರಕ್ಕೆ ಹೆಚ್ಚುತ್ತಿರುವ ಕುಡಿಯುವ ನೀರಿನ ಬೇಡಿಕೆಯನ್ನು ಪೂರೈಸಲು ಜಾರಿಗೊಳಿಸಲಾಗಿರುವ BWSSBಯ ಪ್ರಮುಖ “ಕಾವೇರಿ ಹಂತ-5” ಕುಡಿಯುವ ನೀರಿನ ಯೋಜನೆಗೂ ಜಾಗತಿಕ ಮಟ್ಟದಲ್ಲಿ ಮಾನ್ಯತೆ ದೊರೆತಿದೆ.

“Water Project of the Year” ವಿಭಾಗದಲ್ಲಿ ಈ ಯೋಜನೆ ವಿಶ್ವದ ಟಾಪ್-5 ಯೋಜನೆಗಳ ಪಟ್ಟಿಗೆ ಸೇರಿದೆ.

ಈ ವಿಭಾಗದಲ್ಲಿ ಕೆಳಕಂಡ ಅಂತರಾಷ್ಟ್ರೀಯ ಯೋಜನೆಗಳ ಜೊತೆ ಕಾವೇರಿ ಯೋಜನೆ ಸ್ಪರ್ಧಿಸಿತು:

• ಹೈಕೌ ಜಿಯಾಂಗ್‌ಡಾಂಗ್ ವಾಟರ್ ಟ್ರೀಟ್‌ಮೆಂಟ್ ಪ್ಲಾಂಟ್ – ಚೀನಾ
• ಅಡ್ವಾನ್ಸ್ಡ್ ಅಲ್ಟ್ರಾ ಫಿಲ್ಟ್ರೇಶನ್ ಪ್ಲಾಂಟ್, ಸೂರತ್ – ಭಾರತ
• ಅಪರ್ ವಾವಾ ಬಲ್ಕ್ ವಾಟರ್ ಪ್ರಾಜೆಕ್ಟ್ – ಫಿಲಿಪೈನ್ಸ್
• ಝ್ರೆಂಜಾನಿನ್ ವಾಟರ್ ಟ್ರೀಟ್‌ಮೆಂಟ್ ಪ್ಲಾಂಟ್ – ಸರ್ಬಿಯಾ

ಈ ಮಾನ್ಯತೆ ಬೆಂಗಳೂರು ನಗರವನ್ನು ಜಾಗತಿಕ ಮಟ್ಟದ ನಗರ ಜಲ ನಿರ್ವಹಣೆಯ ಮಾದರಿಯಾಗಿ ಗುರುತಿಸಿದೆ.

ಜಾಗತಿಕ ತಜ್ಞರ ಗಮನ ಸೆಳೆದ ಬೆಂಗಳೂರು ಜಲ ಆಡಳಿತ

ಶೃಂಗಸಭೆಯಲ್ಲಿ BWSSB ಪರವಾಗಿ ಭಾಗವಹಿಸಿದ್ದ ಅಧ್ಯಕ್ಷ ಡಾ. ರಾಮ ಪ್ರಸಾತ್ ಮನೋಹರ್, IAS ಅವರು ಜಾಗತಿಕ ಜಲ ತಜ್ಞರು, ನೀತಿ ನಿರ್ಧಾರಕರು ಹಾಗೂ ವಿವಿಧ ರಾಷ್ಟ್ರಗಳ ಜಲ ಸಂಸ್ಥೆಗಳ ಮುಖ್ಯಸ್ಥರೊಂದಿಗೆ ಚರ್ಚೆ ನಡೆಸಿದರು.

ವೇಗವಾಗಿ ಬೆಳೆಯುತ್ತಿರುವ ಮಹಾನಗರದ ಸವಾಲುಗಳ ನಡುವೆಯೂ ಬೆಂಗಳೂರು ಅನುಸರಿಸುತ್ತಿರುವ ತಂತ್ರಜ್ಞಾನ ಆಧಾರಿತ ಮತ್ತು ಸುಸ್ಥಿರ ಜಲ ನಿರ್ವಹಣಾ ಕ್ರಮಗಳನ್ನು ಅಂತರಾಷ್ಟ್ರೀಯ ಪ್ರತಿನಿಧಿಗಳು ಮೆಚ್ಚುಗೆ ವ್ಯಕ್ತಪಡಿಸಿದರು.

“ಬ್ರ್ಯಾಂಡ್ ಬೆಂಗಳೂರು”ಗೆ ಜಾಗತಿಕ ಮನ್ನಣೆ

ಈ ಸಾಧನೆ ಕುರಿತು ಮಾತನಾಡಿದ BWSSB ಅಧ್ಯಕ್ಷ ಡಾ. ರಾಮ ಪ್ರಸಾತ್ ಮನೋಹರ್ ಅವರು, ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಉಪ ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ನೇತೃತ್ವದಲ್ಲಿ “ಬ್ರ್ಯಾಂಡ್ ಬೆಂಗಳೂರು” ಪರಿಕಲ್ಪನೆಯಡಿ ಜಾರಿಗೆ ತರಲಾಗುತ್ತಿರುವ ಸುಸ್ಥಿರ ಜಲ ನಿರ್ವಹಣಾ ಕಾರ್ಯಕ್ರಮಗಳಿಗೆ ಜಾಗತಿಕ ಮಟ್ಟದಲ್ಲಿ ಮಾನ್ಯತೆ ದೊರೆತಿದೆ ಎಂದು ಹೇಳಿದರು.

“ಬೆಂಗಳೂರು ಜಲ ಭದ್ರತೆ ಹಾಗೂ ಸುಸ್ಥಿರ ಅಭಿವೃದ್ಧಿಗೆ ಬದ್ಧವಾಗಿರುವ ಜಾಗತಿಕ ನಗರವಾಗಿ ಹೊರಹೊಮ್ಮುತ್ತಿರುವುದಕ್ಕೆ ಈ ಮಾನ್ಯತೆ ಸಾಕ್ಷಿಯಾಗಿದೆ. ನಾಗರಿಕರಿಗೆ ವಿಶ್ವಮಟ್ಟದ ಸೇವೆ ಒದಗಿಸಲು BWSSB ಬದ್ಧವಾಗಿದೆ,” ಎಂದು ಅವರು ತಿಳಿಸಿದರು.