ಕಸದ ವಾಹನವನ್ನು ಪರಿಶೀಲಿಸುತ್ತಿರುವ ಅಧಿಕಾರಿಗಳು. ಫೋಟೋ: ಜಿಬಿಎ (ಹೊಸ ಘನತ್ಯಾಜ್ಯ ನಿರ್ವಹಣೆ ಟೆಂಡರ್ ಸಭೆಯ ಪ್ರಕಟಣೆಯೊಂದಿಗೆ ಬಿಡುಗಡೆ)
ಬೆಂಗಳೂರು: ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ (ಜಿಬಿಎ) ಹೊಸ ಘನತ್ಯಾಜ್ಯ ನಿರ್ವಹಣೆ ಟೆಂಡರ್‌ನ 30 ಪ್ಯಾಕೇಜ್‌ಗಳನ್ನು ಮುಂದಿನ ಎರಡೂವರೆ ತಿಂಗಳಲ್ಲಿ ಜಾರಿಗೊಳಿಸಲಾಗುವುದು; ಪ್ರತಿ ಕಸದ ವಾಹನದ ಮೇಲೂ ನಾಗರಿಕರ ಪ್ರತಿಕ್ರಿಯೆಗಾಗಿ ಕ್ಯೂಆರ್ ಕೋಡ್ ಇರಲಿದೆ ಎಂದು ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಅವರ ಅಧ್ಯಕ್ಷತೆಯಲ್ಲಿ ಬುಧವಾರ ನಡೆದ ಸಭೆಯಲ್ಲಿ ತೀರ್ಮಾನಿಸಲಾಯಿತು.
ಅಧಿಕಾರಿಗಳು, ಗುತ್ತಿಗೆದಾರರು ಹಾಗೂ ಸ್ವಯಂಸೇವಾ ಸಂಸ್ಥೆಗಳ ಪ್ರತಿನಿಧಿಗಳನ್ನು ಉದ್ದೇಶಿಸಿ ಮಾತನಾಡಿದ ಸಚಿವರು, ಬೆಂಗಳೂರಿನ ನೈರ್ಮಲ್ಯ ಮತ್ತು ಸ್ವಚ್ಛತೆ ಕಾಪಾಡುವಲ್ಲಿ ಜವಾಬ್ದಾರಿಯುತವಾಗಿ ಕೆಲಸ ಮಾಡಲು ಕಟ್ಟುನಿಟ್ಟಿನ ನಿರ್ದೇಶನ ನೀಡಿದರು; ನಗರಕ್ಕೆ ಅಂಟಿದ ಕಳಂಕ ತೊಡೆದುಹಾಕಲು ಒಟ್ಟಾಗಿ ಶ್ರಮಿಸುವಂತೆ ಕರೆ ನೀಡಿದರು ಎಂದು ಜಿಬಿಎ ಪ್ರಕಟಣೆ ತಿಳಿಸಿದೆ.
“ಕಸದ ವಿಚಾರದಲ್ಲಿ ನಾವು ತಲೆ ತಗ್ಗಿಸುವ ಪರಿಸ್ಥಿತಿಯಿದ್ದು, ಜನರು ನಮ್ಮನ್ನು ನೋಡುವ ದೃಷ್ಟಿ ಬದಲಾಗಿದೆ. ಸರಿಪಡಿಸಿಕೊಳ್ಳಲು ದೊರೆತಿರುವ ಈ ಅವಕಾಶವನ್ನು ಬಳಸಿಕೊಳ್ಳದಿದ್ದರೆ ಸಾರ್ವಜನಿಕರ ಆಕ್ರೋಶ ಎದುರಿಸಬೇಕಾಗುತ್ತದೆ” ಎಂದು ಸಚಿವರು ಎಚ್ಚರಿಸಿದರು.
ಹಂತ ಹಂತದ ಜಾರಿ
ಮೊದಲ ಹಂತದಲ್ಲಿ 4, ಎರಡನೇ ಹಂತದಲ್ಲಿ 7 ಹಾಗೂ ಮುಂದಿನ ತಿಂಗಳು ಮೂರನೇ ಹಂತದಲ್ಲಿ 7 ಪ್ಯಾಕೇಜ್‌ಗಳು ಜಾರಿಗೆ ಬರಲಿವೆ ಎಂದು ಪ್ರಕಟಣೆ ಹೇಳಿದೆ. ಬೆಂಗಳೂರು ಘನತ್ಯಾಜ್ಯ ನಿರ್ವಹಣೆ ನಿಯಮಿತದ (ಬಿಎಸ್‌ಡಬ್ಲ್ಯೂಎಂಎಲ್) ಸಿಇಒ ಕರೀಗೌಡ ಅವರು, 33 ಪ್ಯಾಕೇಜ್‌ಗಳಡಿ 5,431 ವಾಹನಗಳೊಂದಿಗೆ 7 ವರ್ಷಗಳ ಅವಧಿಗೆ ಗುತ್ತಿಗೆ ನೀಡಲಾಗುತ್ತಿದೆ ಎಂದು ಸಭೆಗೆ ತಿಳಿಸಿದರು.
ಘನತ್ಯಾಜ್ಯ ನಿರ್ವಹಣಾ ನಿಯಮಾವಳಿ ಪ್ರಕಾರ ಶೇ 100ರಷ್ಟು ತ್ಯಾಜ್ಯ ವಿಂಗಡಣೆ ಕಡ್ಡಾಯ. ಆರ್‌ಎಫ್‌ಐಡಿ ಮತ್ತು ಫೇಸ್ ರೆಕಗ್ನಿಷನ್ ಮೂಲಕ ಹಾಜರಾತಿ ನಿರ್ವಹಿಸಲಾಗುತ್ತಿದ್ದು, ಐಸಿಸಿಸಿ ಮೂಲಕ ಲೈವ್ ಡೇಟಾ ಮಾನಿಟರ್ ಮಾಡಲಾಗುತ್ತದೆ. ಸರಿಯಾಗಿ ಸೇವೆ ನೀಡದಿದ್ದಲ್ಲಿ ವ್ಯವಸ್ಥೆಯಲ್ಲೇ ಕಪ್ಪುಪಟ್ಟಿಗೆ ಸೇರ್ಪಡೆ ಹಾಗೂ ದಂಡ ವಿಧಿಸಲಾಗುವುದು ಎಂದು ಅವರು ಪ್ರಾತ್ಯಕ್ಷಿಕೆ ಮೂಲಕ ವಿವರಿಸಿದರು.
ಅಧಿಕಾರಿಗಳಿಗೆ ನಿರ್ದೇಶನ
ಸಚಿವರು ನೀಡಿದ ನಿರ್ದೇಶನಗಳು:
- ಬಿಲ್ ಜನರೇಷನ್ ವ್ಯವಸ್ಥೆ ಸಂಪೂರ್ಣ ಆಟೋಮೇಷನ್ ಆಗಬೇಕು.
- ಪೌರಕಾರ್ಮಿಕರು, ಹೆಲ್ಪರ್, ಚಾಲಕರು ಹಾಗೂ ವಾಹನಗಳ ಹಾಜರಾತಿಯನ್ನು ಒಂದೇ ತಂತ್ರಾಂಶದಲ್ಲಿ ಸಂಯೋಜಿಸಬೇಕು.
- ವಾಹನಗಳ ಫೋಟೋ, ಜಿಪಿಎಸ್ ಟ್ರ್ಯಾಕಿಂಗ್ ಹಾಗೂ ನಿಗದಿತ 7 ರಸ್ತೆಗಳ ಸಂಚಾರ ಮಾಹಿತಿ ಸರಿಯಾಗಿ ನಿರ್ವಹಿಸಿದರೆ ಶೇ 90ರಷ್ಟು ಸಮಸ್ಯೆ ನಿವಾರಣೆಯಾಗಲಿದೆ.
- ಪ್ರತಿ ಕಸದ ವಾಹನದ ಮೇಲೂ ಕ್ಯೂಆರ್ ಕೋಡ್ ಇರಬೇಕು; ಸಾರ್ವಜನಿಕರು ನೇರವಾಗಿ ಅಭಿಪ್ರಾಯ ಮತ್ತು ದೂರು ದಾಖಲಿಸಲು ತಂತ್ರಾಂಶವನ್ನು ಇಂಟಿಗ್ರೇಟ್ ಮಾಡಬೇಕು.
- ಕಸದ ವಾಹನಗಳು ಕಡ್ಡಾಯವಾಗಿ ಮನೆ-ಮನೆಗೆ ತೆರಳಬೇಕು; ಸಣ್ಣ ಹೋಟೆಲ್, ಅಂಗಡಿ ಹಾಗೂ ಬೇಕರಿಗಳ ಕಸವೂ ಪಾಲಿಕೆ ವಾಹನಕ್ಕೇ ತಲುಪುವಂತೆ ಅಧಿಕಾರಿಗಳು ಪರಿಶೀಲಿಸಿ ಎಚ್ಚರಿಕೆ ನೀಡಬೇಕು.
- ಯಾವ ಮನೆ ಅಥವಾ ಅಂಗಡಿಯವರು ರಸ್ತೆಗೆ ಕಸ ಎಸೆಯುತ್ತಿದ್ದಾರೆ ಎಂಬುದು ಕಸದ ಗಾಡಿ ಸಿಬ್ಬಂದಿಗೆ ತಿಳಿದಿರುತ್ತದೆ; ಅಂಥವರನ್ನು ಗುರುತಿಸಿ ಅರಿವು ಮೂಡಿಸಿದರೆ ಬ್ಲ್ಯಾಕ್ ಸ್ಪಾಟ್‌ಗಳನ್ನು ಸಂಪೂರ್ಣ ತಡೆಯಬಹುದು ಎಂದು ಸಚಿವರು ಹೇಳಿದರು.
- ರಸ್ತೆಗೆ ಕಸ ಎಸೆಯದಂತೆ ವ್ಯಾಪಕ ಅರಿವು ಕಾರ್ಯಕ್ರಮ ಕೈಗೊಳ್ಳಬೇಕು.
“ಬೆಂಗಳೂರು ನಮಗೆ ಅನ್ನ ನೀಡಿದೆ. ಹೀಗಾಗಿ ನಮ್ಮೂರಿನ ಮೇಲಿರುವ ಕಳಂಕವನ್ನು ತೊಡೆದುಹಾಕುವ ಜವಾಬ್ದಾರಿ ನಮ್ಮೆಲ್ಲರ ಮೇಲಿದೆ” ಎಂದ ಸಚಿವರು, ಅಧಿಕಾರಿಗಳು ತಮ್ಮ ಪಾತ್ರವನ್ನು ಸರಿಯಾಗಿ ನಿರ್ವಹಿಸಿ ಎಲ್ಲರೂ ಸ್ವಚ್ಛತಾ ಕಾರ್ಯದಲ್ಲಿ ತೊಡಗಿಕೊಳ್ಳಬೇಕು ಎಂದು ಕರೆ ನೀಡಿದರು.
ಮುಖ್ಯ ಆಯುಕ್ತ ಮಹೇಶ್ವರ್ ರಾವ್, ನಗರ ಪಾಲಿಕೆ ಆಯುಕ್ತರಾದ ರಮೇಶ್ ಡಿ.ಎಸ್., ಪೊಮ್ಮಲ ಸುನೀಲ್ ಕುಮಾರ್, ರಮೇಶ್ ಕೆ.ಎನ್., ಅಪರ ಆಯುಕ್ತರಾದ ಕವಿತ ರಾಜಾರಾಮ್, ಲೋಖಂಡೆ ಸ್ನೇಹಲ್ ಸುಧಾಕರ್, ವೆಂಕಟ ಚಲಪತಿ ಸೇರಿದಂತೆ ಜಂಟಿ ಆಯುಕ್ತರು, ಹಿರಿಯ ಅಧಿಕಾರಿಗಳು, ಗುತ್ತಿಗೆದಾರರು ಹಾಗೂ ಸ್ವಯಂಸೇವಕರು ಸಭೆಯಲ್ಲಿ ಉಪಸ್ಥಿತರಿದ್ದರು.
ಸಂಬಂಧಿತ:
