ಬೆಂಗಳೂರು: ನಗರದ ನಾಲ್ಕು ವಿಧಾನಸಭಾ ಕ್ಷೇತ್ರಗಳಲ್ಲಿ ಕಸ ಸಂಗ್ರಹಣೆಯ ಹೊಸ ಟೆಂಡರ್‌ಗಳು ನವೆಂಬರ್ ಅಂತ್ಯದೊಳಗೆ ಕಾರ್ಯಾರಂಭ ಮಾಡಲಿವೆ. ಗೋವಿಂದರಾಜನಗರ, ಮಹಾಲಕ್ಷ್ಮಿ ಲೇಔಟ್, ವಿಜಯನಗರ ಮತ್ತು ಚಾಮರಾಜಪೇಟೆ ಕ್ಷೇತ್ರಗಳಲ್ಲಿ ಮನೆಮನೆ ಪ್ರಾಥಮಿಕ ಕಸ ಸಂಗ್ರಹಣೆಯ ಹೊಸ ವ್ಯವಸ್ಥೆ ಯಾವುದೇ ಅಡಚಣೆಯಿಲ್ಲದೆ ಆರಂಭವಾಗುವಂತೆ ಎಲ್ಲ ಸಿದ್ಧತೆಗಳನ್ನು ಪೂರ್ಣಗೊಳಿಸಲು ಗ್ರೇಟರ್ ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ. ಚಿಕ್ಕಪೇಟೆ ಕ್ಷೇತ್ರದಲ್ಲಿ ಡಿಸೆಂಬರ್‌ನಲ್ಲಿ ಹೊಸ ಟೆಂಡರ್ ಕಾರ್ಯಾರಂಭ ಮಾಡುವ ನಿರೀಕ್ಷೆಯಿದೆ.
ಪ್ರಾಥಮಿಕ ಕಸ ಸಂಗ್ರಹಣೆಯ ಹೊಸ ಟೆಂಡರ್‌ಗಳ ಅನುಷ್ಠಾನ ಕುರಿತು ನವೆಂಬರ್ 7ರಂದು ವಿಕಾಸಸೌಧದಲ್ಲಿ ಪರಿಶೀಲನಾ ಸಭೆ ನಡೆಸಿದ ಸಚಿವರು, ಕಟ್ಟುನಿಟ್ಟಿನ ಮೇಲ್ವಿಚಾರಣೆ, ಜಿಪಿಎಸ್ ಆಧಾರಿತ ವಾಹನ ಪತ್ತೆ ಮತ್ತು ಪಾರದರ್ಶಕ ಪಾವತಿ ವ್ಯವಸ್ಥೆಯೊಂದಿಗೆ ಹೊಸ ವ್ಯವಸ್ಥೆ ಜಾರಿಯಾಗಬೇಕು ಎಂದರು. ಜಿಪಿಎಸ್ ದತ್ತಾಂಶದ ಮೂಲಕ ದೃಢಪಟ್ಟ ಸೇವೆಗೆ ಮಾತ್ರ ಗುತ್ತಿಗೆದಾರರಿಗೆ ಹಣ ಪಾವತಿಸಲಾಗುತ್ತದೆ; ಕಡ್ಡಾಯ ಜಿಪಿಎಸ್ ಇಲ್ಲದೆ ಸಂಚರಿಸುವ ವಾಹನಗಳಿಗೆ ದಂಡ ವಿಧಿಸಲಾಗುತ್ತದೆ.
ಕಸ ಸಂಗ್ರಹಣೆಗೆ ಬಳಸುವ ಪ್ರತಿಯೊಂದು ವಾಹನಕ್ಕೂ ಜಿಪಿಎಸ್ ಅಳವಡಿಕೆ ಕಡ್ಡಾಯಗೊಳಿಸುವಂತೆ ಸಚಿವರು ಸೂಚಿಸಿದರು. ಜಿಪಿಎಸ್ ಕಾರ್ಯನಿರ್ವಹಿಸದ ವಾಹನಗಳು ಆ ದಿನದ ಬಿಲ್ಲಿಂಗ್‌ಗೆ ಅರ್ಹವಾಗುವುದಿಲ್ಲ ಮತ್ತು ನಿಯಮ ಉಲ್ಲಂಘಿಸುವ ಗುತ್ತಿಗೆದಾರರಿಗೆ ದಂಡ ವಿಧಿಸಲಾಗುತ್ತದೆ. ಕೈಯಿಂದ ಸಲ್ಲಿಸುವ ಕ್ಲೇಮ್‌ಗಳ ಬದಲು ವಾಹನಗಳ ನೈಜ ಕಾರ್ಯಾಚರಣೆಗೆ ನೇರವಾಗಿ ಪಾವತಿಯನ್ನು ಜೋಡಿಸುವ ಸಿಸ್ಟಮ್ ಆಧಾರಿತ ಬಿಲ್ಲಿಂಗ್ ವ್ಯವಸ್ಥೆ ಜಾರಿಗೆ ಬರಲಿದ್ದು, ನಿಯಮ ಪಾಲನೆಯ ಮೇಲೆ ನಿಗಾ ಇಡುವಂತೆ ನಗರ ಪಾಲಿಕೆ ಅಧಿಕಾರಿಗಳಿಗೆ ಸೂಚಿಸಲಾಗಿದೆ.
ಈಗಾಗಲೇ ಸಿದ್ಧವಾಗಿರುವ ಹೊಸ ತಂತ್ರಾಂಶದ ಕುರಿತು ಗುತ್ತಿಗೆದಾರರು ಮತ್ತು ಇಲಾಖಾ ಸಿಬ್ಬಂದಿಗೆ ವಿವರವಾದ ಪ್ರಾತ್ಯಕ್ಷಿಕೆ ನೀಡುವಂತೆಯೂ ಅಧಿಕಾರಿಗಳಿಗೆ ಸೂಚಿಸಲಾಯಿತು. ಹೊಸ ವ್ಯವಸ್ಥೆಯ ಜಾರಿಯ ಮೇಲ್ವಿಚಾರಣೆ ಹಾಗೂ ಎಲ್ಲ ಭಾಗೀದಾರರ ನಡುವಿನ ಸಮನ್ವಯದ ಹೊಣೆ ನಗರ ಪಾಲಿಕೆ ಆಯುಕ್ತರದ್ದಾಗಿರುತ್ತದೆ.
ನಾಲ್ಕು ಪ್ಯಾಕೇಜ್‌ಗಳ ಗುತ್ತಿಗೆ ಪಡೆದವರು ಈಗಾಗಲೇ ವಾಹನಗಳನ್ನು ಖರೀದಿಸಿದ್ದಾರೆ. ಅಗತ್ಯ ಫ್ಯಾಬ್ರಿಕೇಷನ್ ಕೆಲಸವನ್ನು ಶೀಘ್ರ ಮುಗಿಸಿ ನವೆಂಬರ್‌ನೊಳಗೆ ವಾಹನಗಳನ್ನು ಸೇವೆಗೆ ಇಳಿಸುವಂತೆ ಸಚಿವರು ಸೂಚಿಸಿದರು. ಪ್ರತಿಯೊಂದು ವಾಹನಕ್ಕೂ ಜಿಪಿಎಸ್ ಇರಬೇಕು ಹಾಗೂ ಅದರ ಕಾರ್ಯಾಚರಣೆಯನ್ನು ವಾಹನ್ (VAHAN) ಪೋರ್ಟಲ್ ಮತ್ತು ಇನ್‌ವಾಯ್ಸಿಂಗ್ ವ್ಯವಸ್ಥೆಯ ಮೂಲಕ ಪರಿಶೀಲಿಸಬೇಕು.
ಎಲ್ಲ ವಾಹನಗಳಿಗೂ ಏಕರೂಪದ ವಿನ್ಯಾಸ, ಬ್ರ್ಯಾಂಡಿಂಗ್ ಮತ್ತು ಸ್ಟಿಕ್ಕರ್‌ಗಳು ಇರಬೇಕು; ಕಾರ್ಯಾರಂಭಕ್ಕೂ ಮುನ್ನ ಪೌರಕಾರ್ಮಿಕರಿಗೆ ಹೊಸ ಸಮವಸ್ತ್ರ ನೀಡಬೇಕು ಎಂದು ಸಚಿವರು ಸೂಚಿಸಿದರು. ಹೊಸ ಟೆಂಡರ್‌ಗೆ ಬದಲಾವಣೆಯ ಸಂದರ್ಭದಲ್ಲಿ ದೈನಂದಿನ ಕಸ ಸಂಗ್ರಹಣೆಯಲ್ಲಿ ಯಾವುದೇ ಗೊಂದಲ ಅಥವಾ ಅಡಚಣೆ ಆಗಬಾರದು ಎಂದು ಅವರು ಹೇಳಿದರು.
ಕಸದ ಬ್ಲ್ಯಾಕ್ ಸ್ಪಾಟ್‌ಗಳ ನಿರ್ಮೂಲನೆಗೆ ನಿರಂತರ ಪ್ರಯತ್ನ ಬೇಕು ಎಂದ ಸಚಿವರು, ಮತ್ತೆ ಮತ್ತೆ ಕಸ ಸುರಿಯುವುದನ್ನು ತಡೆಯಲು ನವೀನ ಕ್ರಮಗಳನ್ನು ಕೈಗೊಳ್ಳುವಂತೆ ಹಾಗೂ ರಸ್ತೆಬದಿ ಕಸ ಸುರಿಯುವವರ ವಿರುದ್ಧ ಕಠಿಣ ಕ್ರಮ ಜರುಗಿಸುವಂತೆ ಸೂಚಿಸಿದರು. ಸಂಗ್ರಹವಾದ ಕಸವನ್ನು ತೆರವುಗೊಳಿಸುವುದಷ್ಟೇ ಅಲ್ಲ, ಬ್ಲ್ಯಾಕ್ ಸ್ಪಾಟ್‌ಗಳನ್ನೇ ಇಲ್ಲವಾಗಿಸುವುದು ಗುರಿಯಾಗಬೇಕು ಎಂದರು.
ಹೊಸ ಕಸ ಸಂಗ್ರಹಣಾ ವ್ಯವಸ್ಥೆ ಮತ್ತು ನಾಗರಿಕರ ಹೊಣೆಗಾರಿಕೆ ಕುರಿತು ನಿವಾಸಿಗಳಿಗೆ ಅರಿವು ಮೂಡಿಸಲು ಮಾಹಿತಿ, ಶಿಕ್ಷಣ ಮತ್ತು ಸಂವಹನ (ಐಇಸಿ) ಚಟುವಟಿಕೆಗಳನ್ನು ವ್ಯವಸ್ಥಿತವಾಗಿ ನಡೆಸಬೇಕು ಎಂದು ಸಚಿವರು ಒತ್ತಿ ಹೇಳಿದರು. ಮೊದಲ ದಿನದಿಂದಲೇ ನಿರೀಕ್ಷಿತ ಗುಣಮಟ್ಟದ ಸೇವೆ ದೊರೆಯುವಂತೆ ಎಲ್ಲ ಸಿದ್ಧತೆಗಳನ್ನು ಪೂರ್ಣಗೊಳಿಸುವಂತೆ ಗುತ್ತಿಗೆದಾರರು ಮತ್ತು ಅಧಿಕಾರಿಗಳಿಗೆ ಸೂಚಿಸಿದರು.
ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ತನ್ನ ವ್ಯಾಪ್ತಿಯಲ್ಲಿ ಪ್ರಾಥಮಿಕ ಘನತ್ಯಾಜ್ಯ ಸಂಗ್ರಹಣೆಗೆ 33 ಪ್ಯಾಕೇಜ್‌ಗಳನ್ನು ರೂಪಿಸಿದೆ. ಈ ಪೈಕಿ ಐದು ಪ್ಯಾಕೇಜ್‌ಗಳಿಗೆ ಕಾರ್ಯಾದೇಶ ಮತ್ತು 13 ಪ್ಯಾಕೇಜ್‌ಗಳಿಗೆ ಅಂಗೀಕಾರ ಪತ್ರ (ಎಲ್‌ಒಎ) ನೀಡಲಾಗಿದೆ. ಇನ್ನೂ 10 ಪ್ಯಾಕೇಜ್‌ಗಳ ಟೆಂಡರ್ ಪ್ರಕ್ರಿಯೆ ಪೂರ್ಣಗೊಂಡಿದ್ದು, ಪ್ರಸ್ತಾವನೆಗಳನ್ನು ಸರ್ಕಾರದ ಅನುಮೋದನೆಗೆ ಕಳುಹಿಸಲಾಗಿದೆ. ಉಳಿದ ಐದು ಪ್ಯಾಕೇಜ್‌ಗಳ ಪೈಕಿ ಒಂದು ಮೌಲ್ಯಮಾಪನ ಹಂತದಲ್ಲಿದೆ, ಎರಡು ಹೈಕೋರ್ಟ್‌ನಲ್ಲಿವೆ, ಒಂದು ಮೇಲ್ಮನವಿ ಹಂತದಲ್ಲಿದೆ ಹಾಗೂ ಕೊನೆಯ ಪ್ಯಾಕೇಜ್‌ನ ಟೆಂಡರ್ ಪ್ರಕ್ರಿಯೆಯನ್ನು ನ್ಯಾಯಾಲಯದ ಆದೇಶದ ನಂತರ ಕೈಗೊಳ್ಳಲಾಗುತ್ತದೆ.
ನಿಗದಿತ ಪರಿಶೀಲನಾ ಪಟ್ಟಿ ಬಳಸಿ ನಗರ ಪಾಲಿಕೆಗಳಲ್ಲಿ ಮನೆಮನೆ ಸಮೀಕ್ಷೆ ನಡೆಸಲಾಗಿದ್ದು, ಅದರ ಫಲಿತಾಂಶಗಳ ಆಧಾರದಲ್ಲಿ ಹೊಸ ಟೆಂಡರ್‌ಗಳನ್ನು ಜಾರಿಗೊಳಿಸಲಾಗುತ್ತಿದೆ ಎಂದು ಅಧಿಕಾರಿಗಳು ಸಚಿವರಿಗೆ ಮಾಹಿತಿ ನೀಡಿದರು.
ಸಭೆಯಲ್ಲಿ ಮುಖ್ಯ ಆಯುಕ್ತ ಮಹೇಶ್ವರ್ ರಾವ್, ಪೂರ್ವ ನಗರ ಪಾಲಿಕೆ ಆಯುಕ್ತ ಡಿ.ಎಸ್. ರಮೇಶ್, ಪೊಮ್ಮಲ ಸುನೀಲ್ ಕುಮಾರ್, ಶಿಲ್ಪಾ ನಾಗ್, ರಮೇಶ್ ಕೆ.ಎನ್., ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ನಿಯಮಿತದ ಸಿಇಒ ಕರೀಗೌಡ, ಹೆಚ್ಚುವರಿ ಆಯುಕ್ತೆ ಲೋಖಂಡೆ ಸ್ನೇಹಲ್ ಸುಧಾಕರ್ ಹಾಗೂ ಮುಖ್ಯ ಎಂಜಿನಿಯರ್‌ಗಳಾದ ಲೋಕೇಶ್ ಮತ್ತು ವೆಂಕಟಾಚಲಪತಿ ಉಪಸ್ಥಿತರಿದ್ದರು.
ಹೊಸ ಟೆಂಡರ್ ಅಡಿಯಲ್ಲಿ ಐದು ಕ್ಷೇತ್ರಗಳಲ್ಲಿ ಮನೆಮನೆ ಕಸ ಸಂಗ್ರಹಣೆ ಆರಂಭಿಸುವ ಯೋಜನೆಯನ್ನು ಜಿಬಿಎ ಈ ಹಿಂದೆ ಪ್ರಕಟಿಸಿತ್ತು.
