ಬೆಂಗಳೂರು ದಕ್ಷಿಣ ನಗರ ಪಾಲಿಕೆ ವ್ಯಾಪ್ತಿಯಲ್ಲಿ ನಡೆದ ವಾರ್ಡ್ ಒನ್ ಕಾಮಗಾರಿಯ ಮೊದಲು-ನಂತರದ ಚಿತ್ರಗಳು. ಚಿತ್ರ: ಬೆಂಗಳೂರು ದಕ್ಷಿಣ ನಗರ ಪಾಲಿಕೆ
ಬೆಂಗಳೂರು: ಬೆಂಗಳೂರು ದಕ್ಷಿಣ ನಗರ ಪಾಲಿಕೆಯ ‘ವಾರ್ಡ್ ಒನ್’ ಅಭಿಯಾನದ ಎರಡನೇ ವಾರದಲ್ಲಿ ಗುರುತಿಸಲಾಗಿದ್ದ 526 ಸಮಸ್ಯೆಗಳ ಪೈಕಿ 400 (ಶೇ 76) ಸಮಸ್ಯೆಗಳನ್ನು ಸ್ಥಳದಲ್ಲೇ ಇತ್ಯರ್ಥಪಡಿಸಲಾಗಿದೆ ಎಂದು ಪಾಲಿಕೆ ಆಯುಕ್ತ ಕೆ.ಎನ್. ರಮೇಶ್ ಶುಕ್ರವಾರ ತಿಳಿಸಿದ್ದಾರೆ.
ನವೆಂಬರ್ 1ರಂದು ಆರಂಭವಾದ ಈ ಅಭಿಯಾನದ ಎರಡನೇ ವಾರದಲ್ಲಿ ಆರು ವಿಭಾಗಗಳ ಅಂಜನಾಪುರ, ಹರಿನಗರ, ಕೋಣನಕುಂಟೆ, ಅಬ್ದುಲ್ ಕಲಾಂ ನಗರ, ಮಾರೇನಹಳ್ಳಿ ದಕ್ಷಿಣ, ಜಕ್ಕಸಂದ್ರ, ಪದ್ಮನಾಭನಗರ, ಕದಿರೇನಹಳ್ಳಿ, ಬೊಮ್ಮನಹಳ್ಳಿ, ಹೊಸಪಾಳ್ಯ ಮತ್ತು ಎಚ್‌ಎಸ್‌ಆರ್ ಲೇಔಟ್ ಸೇರಿ 11 ವಾರ್ಡ್‌ಗಳ ಒಟ್ಟು 28.64 ಕಿ.ಮೀ. ರಸ್ತೆಗಳಲ್ಲಿ ಸ್ವಚ್ಛತೆ ಮತ್ತು ಮೂಲಸೌಕರ್ಯ ಸುಧಾರಣೆ ಕಾಮಗಾರಿ ಕೈಗೊಳ್ಳಲಾಗಿದೆ. ಪಾಲಿಕೆಗೆ ನೇರವಾಗಿ ಸಂಬಂಧಿಸಿದ 462 ಸಮಸ್ಯೆಗಳ ಪೈಕಿ 374 (ಶೇ 81) ಇತ್ಯರ್ಥವಾಗಿವೆ.
ಎರಡನೇ ವಾರದ ಪ್ರಮುಖ ಕಾಮಗಾರಿಗಳ ಪ್ರಗತಿ ಹೀಗಿದೆ:
- ಕಟ್ಟಡ ತ್ಯಾಜ್ಯ: ಗುರುತಿಸಿದ 80 ಟನ್‌ನಲ್ಲಿ 75.09 ಟನ್ ತೆರವು (ಶೇ 94)
- ಕಸದ ಬ್ಲ್ಯಾಕ್‌ಸ್ಪಾಟ್: 45ರಲ್ಲಿ 41 ಸ್ವಚ್ಛ (ಶೇ 91)
- ಅನಧಿಕೃತ ಫ್ಲೆಕ್ಸ್, ಬ್ಯಾನರ್: 110ರಲ್ಲಿ 96 ತೆರವು (ಶೇ 87)
- ಪಾದಚಾರಿ ಮಾರ್ಗ ಒತ್ತುವರಿ: 70ರಲ್ಲಿ 61 ತೆರವು (ಶೇ 87)
- ಗುಂಡಿ ಮುಚ್ಚುವಿಕೆ: 96ರಲ್ಲಿ 80 (ಶೇ 83)
- ಮರದ ಕೊಂಬೆ ಕತ್ತರಿಸುವಿಕೆ: 26 ಮರಗಳಲ್ಲಿ 21 (ಶೇ 81)
- ಪಾದಚಾರಿ ಮಾರ್ಗ ದುರಸ್ತಿ: 4.18 ಕಿ.ಮೀ.ನಲ್ಲಿ 2.98 ಕಿ.ಮೀ. ಪೂರ್ಣ (ಶೇ 71)
- ಚರಂಡಿ ಸ್ಲ್ಯಾಬ್ ಅಳವಡಿಕೆ: 88ರಲ್ಲಿ 60 (ಶೇ 68)
- ರಸ್ತೆ ಬದಿ ಚರಂಡಿ ಹೂಳೆತ್ತುವಿಕೆ: 3.8 ಕಿ.ಮೀ.ನಲ್ಲಿ 2.5 ಕಿ.ಮೀ. (ಶೇ 66)
- ಕರ್ಬ್ ಸರಿಪಡಿಸುವಿಕೆ: 4.13 ಕಿ.ಮೀ.ನಲ್ಲಿ 2.72 ಕಿ.ಮೀ. ದುರಸ್ತಿ ಮತ್ತು ಬಣ್ಣ (ಶೇ 66)
- ರಾಜಕಾಲುವೆ ಹೂಳೆತ್ತುವಿಕೆ: 1.19 ಕಿ.ಮೀ.ನಲ್ಲಿ 0.75 ಕಿ.ಮೀ. (ಶೇ 63)
- ಜಂಕ್ಷನ್ ಸ್ವಚ್ಛತೆ: 24ರಲ್ಲಿ 13 ಸ್ವಚ್ಛ ಮತ್ತು ಸರಿಪಡಿಸಲಾಗಿದೆ (ಶೇ 54)
- ಕೈಬಿಟ್ಟ ವಾಹನ ತೆರವು: 2ರಲ್ಲಿ 1 (ಶೇ 50)
- ಬಸ್ ತಂಗುದಾಣ: ಗುರುತಿಸಿದ ಒಂದು ತಂಗುದಾಣ ಸಂಪೂರ್ಣ ಸ್ವಚ್ಛ (ಶೇ 100)
ಇತರ ಇಲಾಖೆಗಳ ಸಮನ್ವಯದ ಕಾಮಗಾರಿಗಳಲ್ಲಿ ಬೆಸ್ಕಾಂಗೆ ಸಂಬಂಧಿಸಿದ 13 ಸಮಸ್ಯೆಗಳ ಪೈಕಿ 7 (ಶೇ 54) ಇತ್ಯರ್ಥವಾಗಿವೆ; ಇವುಗಳಲ್ಲಿ ವಿದ್ಯುತ್ ಸಂಬಂಧಿತ 7ರಲ್ಲಿ 4 ಮತ್ತು ಅಡೆತಡೆಗೆ ಸಂಬಂಧಿಸಿದ 6ರಲ್ಲಿ 3 ಸೇರಿವೆ. ಜಲಮಂಡಳಿಯು 48 ಕಾಮಗಾರಿಗಳ ಪೈಕಿ 19ನ್ನು (ಶೇ 40) ಪೂರ್ಣಗೊಳಿಸಿದೆ: ನೀರು ಸೋರಿಕೆ ತಡೆಯ 11ರಲ್ಲಿ 6, ಚೇಂಬರ್ ಮಟ್ಟ ಸರಿಪಡಿಸುವಿಕೆಯ 19ರಲ್ಲಿ 7 ಮತ್ತು ರಸ್ತೆ ಪುನರ್‌ನಿರ್ಮಾಣದ 18ರಲ್ಲಿ 6. ಸಂಚಾರ ಪೊಲೀಸ್ ಇಲಾಖೆಯ ಮೂರು ಸೂಚನಾ ಫಲಕಗಳ ಸ್ಥಳಾಂತರ ನಡೆಯುತ್ತಿದ್ದು, ಬಿಎಂಆರ್‌ಸಿಎಲ್ ವ್ಯಾಪ್ತಿಯ ಎಲ್ಲ ಸಮಸ್ಯೆಗಳು ಇತ್ಯರ್ಥವಾಗಿವೆ.
ಎರಡನೇ ವಾರದ ಬಾಕಿ ಕಾಮಗಾರಿಗಳನ್ನು (ಚರಂಡಿ ಸ್ಲ್ಯಾಬ್, ಗುಂಡಿ, ಜಲಮಂಡಳಿ ಹಾಗೂ ಬೆಸ್ಕಾಂ ಸಂಬಂಧಿತ ಕಾಮಗಾರಿಗಳು) ಸಂಬಂಧಿತ ಇಲಾಖೆಗಳ ಸಮನ್ವಯದಿಂದ ಶೀಘ್ರ ಪೂರ್ಣಗೊಳಿಸುವಂತೆ ರಮೇಶ್ ಅವರು ಅಧಿಕಾರಿಗಳಿಗೆ ಸೂಚಿಸಿದರು. ಸ್ವಚ್ಛಗೊಳಿಸಿದ ಬ್ಲ್ಯಾಕ್‌ಸ್ಪಾಟ್‌ಗಳಲ್ಲಿ ಮತ್ತೆ ಕಸ ಸುರಿಯದಂತೆ ನಿರಂತರ ನಿಗಾ ವಹಿಸಲು ಮತ್ತು ಪಾರದರ್ಶಕತೆಗಾಗಿ ಜಿಯೋ-ಟ್ಯಾಗ್ ಮಾಡಿದ ಛಾಯಾಚಿತ್ರ ದಾಖಲೀಕರಣವನ್ನು ಮುಂದುವರಿಸಲು ಸಹ ಅವರು ಸೂಚಿಸಿದರು.
ಇದನ್ನೂ ಓದಿ:
