ತಪಾಸಣೆಯ ವೇಳೆ ಸಿಹಿತಿಂಡಿ ಪರಿಶೀಲಿಸುತ್ತಿರುವ ಆಹಾರ ಸುರಕ್ಷತಾ ಅಧಿಕಾರಿ. ಚಿತ್ರ: ಎಫ್‌ಎಸ್‌ಎಸ್‌ಎಐ
ನವದೆಹಲಿ: ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ 2026ರ ಸೆಪ್ಟೆಂಬರ್ 1ರಿಂದ ನವೆಂಬರ್ 5ರವರೆಗೆ ನಡೆಸಿದ ದೇಶವ್ಯಾಪಿ ಕಾರ್ಯಾಚರಣೆಯಲ್ಲಿ 56,431 ಆಹಾರ ಸಂಸ್ಥೆಗಳನ್ನು ತಪಾಸಣೆ ಮಾಡಲಾಗಿದ್ದು, 10,047 ಸುಧಾರಣಾ ನೋಟಿಸ್‌ಗಳನ್ನು ನೀಡಲಾಗಿದೆ ಹಾಗೂ 1,133 ಆಹಾರ ಪರವಾನಗಿಗಳನ್ನು ಅಮಾನತುಗೊಳಿಸಲಾಗಿದೆ ಎಂದು ಭಾರತೀಯ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (ಎಫ್‌ಎಸ್‌ಎಸ್‌ಎಐ) ತಿಳಿಸಿದೆ.
ರಾಜ್ಯ ಆಹಾರ ಸುರಕ್ಷತಾ ಪ್ರಾಧಿಕಾರಗಳ ಸಹಯೋಗದಲ್ಲಿ ನಡೆಸಿದ ಈ ಹಬ್ಬದ ಋತುವಿನ ತಪಾಸಣೆಗಳು ಕಳಪೆ ಗುಣಮಟ್ಟದ ಪದ್ಧತಿಗಳನ್ನು ಗುರಿಯಾಗಿಸಿಕೊಂಡಿದ್ದು, ಆಹಾರ ವಲಯದಾದ್ಯಂತ ಸುರಕ್ಷತಾ ಮಾನದಂಡಗಳನ್ನು ಕಾಪಾಡುವ ಉದ್ದೇಶ ಹೊಂದಿದ್ದವು ಎಂದು ಪ್ರಾಧಿಕಾರ ಹೇಳಿದೆ.
ಪರವಾನಗಿ ಅಮಾನತಿನ ಜೊತೆಗೆ 52 ಪರವಾನಗಿಗಳನ್ನು ರದ್ದುಗೊಳಿಸಲಾಗಿದ್ದು, 314 ಸಂಸ್ಥೆಗಳಿಗೆ ಬೀಗ ಹಾಕಲಾಗಿದೆ ಎಂದು ಎಫ್‌ಎಸ್‌ಎಸ್‌ಎಐ ಬಿಡುಗಡೆ ಮಾಡಿರುವ ಅಂಕಿಅಂಶಗಳು ತಿಳಿಸುತ್ತವೆ.
ಕಾರ್ಯಾಚರಣೆಯ ವೇಳೆ ಆಹಾರ ಸುರಕ್ಷತಾ ಅಧಿಕಾರಿಗಳು 43,939 ಮಾದರಿಗಳನ್ನು ಸಂಗ್ರಹಿಸಿದ್ದಾರೆ. ಇವುಗಳಲ್ಲಿ 23,648 ಮಾದರಿಗಳನ್ನು ವಿಶ್ಲೇಷಿಸಲಾಗಿದ್ದು, 2,273 ಮಾದರಿಗಳು ಮಾನದಂಡಗಳಿಗೆ ಅನುಗುಣವಾಗಿಲ್ಲ ಎಂದು ಕಂಡುಬಂದಿದೆ ಹಾಗೂ 410 ಪ್ರಕರಣಗಳಲ್ಲಿ ಕಾನೂನು ಕ್ರಮ ಆರಂಭಿಸಲಾಗಿದೆ ಎಂದು ಎಫ್‌ಎಸ್‌ಎಸ್‌ಎಐ ಹೇಳಿದೆ.
ಅಂದಾಜು ₹81.80 ಕೋಟಿ ಮೌಲ್ಯದ 3,279.57 ಮೆಟ್ರಿಕ್ ಟನ್ ಆಹಾರ ಉತ್ಪನ್ನಗಳನ್ನು ಅಧಿಕಾರಿಗಳು ವಶಪಡಿಸಿಕೊಂಡಿದ್ದಾರೆ. ನಿಷೇಧಿತ ಮತ್ತು ಮಾನದಂಡಗಳಿಗೆ ಅನುಗುಣವಲ್ಲದ ಆಹಾರ ಉತ್ಪನ್ನಗಳ ವಿರುದ್ಧದ ಕ್ರಮ ಇದಾಗಿದೆ ಎಂದು ಎಫ್‌ಎಸ್‌ಎಸ್‌ಎಐ ಬಣ್ಣಿಸಿದೆ.
ವಶಪಡಿಸಿಕೊಂಡ ಉತ್ಪನ್ನಗಳಲ್ಲಿ ದಿನನಿತ್ಯದ ಅಗತ್ಯ ವಸ್ತುಗಳಿಂದ ಹಿಡಿದು ಹಬ್ಬದ ತಿನಿಸುಗಳವರೆಗೆ ಎಣ್ಣೆ, ಹಾಲು ಮತ್ತು ಪನೀರ್; ಸಿಹಿತಿಂಡಿ, ಖೋವಾ ಮತ್ತು ತುಪ್ಪ; ಬೇಕರಿ ಉತ್ಪನ್ನಗಳು ಮತ್ತು ಚಾಕೊಲೇಟ್‌ಗಳು; ಐಸ್‌ಕ್ರೀಮ್ ಮತ್ತು ನಮ್ಕೀನ್; ಪ್ಯಾಕ್ ಮಾಡಿದ ಆಹಾರ ಮತ್ತು ಹಬ್ಬದ ಉಡುಗೊರೆ ಬುಟ್ಟಿಗಳು ಸೇರಿವೆ.
ಈ ಅಂಕಿಅಂಶಗಳ ರಾಜ್ಯವಾರು ವಿವರಗಳನ್ನು ಎಫ್‌ಎಸ್‌ಎಸ್‌ಎಐ ಬಿಡುಗಡೆ ಮಾಡಿಲ್ಲ. ನಿಗದಿತ ಆಹಾರ ಸುರಕ್ಷತಾ ಮಾನದಂಡಗಳ ಪಾಲನೆ ಹೆಚ್ಚಿಸಲು ರಾಜ್ಯ ಆಹಾರ ಸುರಕ್ಷತಾ ಪ್ರಾಧಿಕಾರಗಳೊಂದಿಗೆ ಕೆಲಸ ಮುಂದುವರಿಸಲಾಗುವುದು ಎಂದು ಅದು ತಿಳಿಸಿದೆ.
