ಗುಂಜೂರು–ದೊಮ್ಮಸಂದ್ರ ರಸ್ತೆ: ಆರು ಪಥಕ್ಕೆ ಕಾಯದೆ ನಾಲ್ಕು ಪಥ ಪೂರ್ಣಗೊಳಿಸಲು ಆಯುಕ್ತರ ಸೂಚನೆ

ಬೆಂಗಳೂರು: ಗುಂಜೂರು–ದೊಮ್ಮಸಂದ್ರ ರಸ್ತೆಯ ಆರು ಪಥದ ಅಭಿವೃದ್ಧಿಗಾಗಿ ಕಾಯದೆ, ಲಭ್ಯವಿರುವ ಜಾಗದಲ್ಲಿ ನಾಲ್ಕು ಪಥದ ರಸ್ತೆ ಕಾಮಗಾರಿಯನ್ನು ತಕ್ಷಣ ಪೂರ್ಣಗೊಳಿಸುವಂತೆ ಬೆಂಗಳೂರು ಪೂರ್ವ ನಗರ ಪಾಲಿಕೆ ಆಯುಕ್ತ ಡಿ.ಎಸ್. ರಮೇಶ್ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ.

ಎರಡು ಕಿಲೋಮೀಟರ್ ಉದ್ದದ ಈ ರಸ್ತೆಯಲ್ಲಿ ದೊಮ್ಮಸಂದ್ರ ಭಾಗ ಸೇರಿದಂತೆ ಸುಮಾರು 1.4 ಕಿಲೋಮೀಟರ್ ಕಾಮಗಾರಿ ಪೂರ್ಣಗೊಂಡಿದೆ. ಉಳಿದ 600 ಮೀಟರ್ ಪ್ರದೇಶದಲ್ಲಿ ಭೂಸ್ವಾಧೀನ ಮತ್ತು ಅಭಿವೃದ್ಧಿ ಹಕ್ಕುಗಳ ವರ್ಗಾವಣೆ (ಟಿಡಿಆರ್) ಸಮಸ್ಯೆಗಳಿಂದ ಕಾಮಗಾರಿ ಬಾಕಿ ಉಳಿದಿದೆ.

ಗುಂಜೂರು–ದೊಮ್ಮಸಂದ್ರ–ವರ್ತೂರು ರಸ್ತೆ ಅಗಲೀಕರಣದ ಪ್ರಗತಿ ಪರಿಶೀಲನಾ ಸಭೆಯಲ್ಲಿ, ಬಾಕಿ ಇರುವ ಪ್ರದೇಶದಲ್ಲಿ ಅಕ್ಟೋಬರ್ 8ರೊಳಗೆ ಹೊಸ ಸರ್ವೇ ನಡೆಸುವಂತೆ ರಮೇಶ್ ನಿರ್ದೇಶಿಸಿದರು. ಸರ್ಕಾರಿ ಮತ್ತು ಖಾಸಗಿ ಸ್ವತ್ತುಗಳ ಗಡಿಗಳನ್ನು ಸ್ಥಳದಲ್ಲೇ ಕಂಬಗಳು ಅಥವಾ ಕೆಂಪು ಗುರುತುಗಳ ಮೂಲಕ ಸ್ಪಷ್ಟವಾಗಿ ಗುರುತಿಸಬೇಕು. ಪ್ರತಿ 10ರಿಂದ 20 ಮೀಟರ್ ಅಂತರದಲ್ಲಿ ಗುರುತುಗಳನ್ನು ಅಳವಡಿಸುವಂತೆ ತಿಳಿಸಿದರು.

ರಾಜ್ಯ ಹೆದ್ದಾರಿ 35ರ ಭಾಗವಾಗಿರುವ ದೊಮ್ಮಸಂದ್ರ–ಗುಂಜೂರು ನಡುವಿನ 2 ಕಿಲೋಮೀಟರ್ ಹಾಗೂ ಗುಂಜೂರು–ವರ್ತೂರು ನಡುವಿನ 1.9 ಕಿಲೋಮೀಟರ್ ರಸ್ತೆ ಅಗಲೀಕರಣ ಕಾಮಗಾರಿಗಳನ್ನು ಸಭೆಯಲ್ಲಿ ಪರಿಶೀಲಿಸಲಾಯಿತು. ಪರಿಷ್ಕೃತ ಮಹಾಯೋಜನೆ 2015ರ ಅನ್ವಯ ರಸ್ತೆಯನ್ನು 50 ಮೀಟರ್ ಅಗಲಕ್ಕೆ ಅಭಿವೃದ್ಧಿಪಡಿಸುವ ಗುರಿಯಿದೆ.

ಭೂಸ್ವಾಧೀನ ಮತ್ತು ಪರಿಹಾರ ಪಾವತಿಗೆ ವೇಗ

143 ಆಸ್ತಿಗಳಿಗೆ ಸಂಬಂಧಿಸಿದ ಟಿಡಿಆರ್ ಅಧಿಸೂಚನೆ ಹಿಂಪಡೆಯಲಾಗಿರುವ ಹಿನ್ನೆಲೆಯಲ್ಲಿ, ಅಧಿಕೃತ ಪ್ರತಿಯನ್ನು ಪರಿಶೀಲಿಸಿ ಮುಂದಿನ ಕ್ರಮ ಕೈಗೊಳ್ಳುವಂತೆ ಅಧಿಕಾರಿಗಳಿಗೆ ಸೂಚಿಸಲಾಯಿತು.

ವರ್ತೂರು ಸೇತುವೆ ಭಾಗದ 20 ಆಸ್ತಿಗಳ ಪೈಕಿ ಆರು ಆಸ್ತಿಗಳಿಗೆ ಟಿಡಿಆರ್ ನೀಡಲಾಗಿದೆ. ಒಂಬತ್ತು ಆಸ್ತಿಗಳ ಪ್ರಕ್ರಿಯೆ ಪ್ರಗತಿಯಲ್ಲಿದೆ. ಉಳಿದ ಆಸ್ತಿ ಮಾಲೀಕರೊಂದಿಗೆ ಸಭೆ ನಡೆಸಿ ಪ್ರಕ್ರಿಯೆ ಪೂರ್ಣಗೊಳಿಸಲು ಹಾಗೂ ಬಾಕಿ ಇರುವ ಅಭಿವೃದ್ಧಿ ಹಕ್ಕುಗಳ ಪ್ರಮಾಣಪತ್ರಗಳ (Form-C/DRC) ವಿತರಣೆಯನ್ನು ತ್ವರಿತಗೊಳಿಸಲು ಆಯುಕ್ತರು ನಿರ್ದೇಶಿಸಿದರು.

ಸ್ವತ್ತು ಸಂಖ್ಯೆ 34ಕ್ಕೆ ಸಂಬಂಧಿಸಿದಂತೆ 2013ರ ಭೂಸ್ವಾಧೀನ ಕಾಯ್ದೆಯಡಿ ಪರಿಹಾರ ಮೊತ್ತವನ್ನು ನ್ಯಾಯಾಲಯದಲ್ಲಿ ಠೇವಣಿ ಮಾಡಲಾಗಿದೆ. ಅಗತ್ಯ ಕಾನೂನು ಪ್ರಕ್ರಿಯೆ ಪೂರ್ಣಗೊಳಿಸಿ ಪೊಲೀಸ್ ಭದ್ರತೆಯೊಂದಿಗೆ ಜಾಗದ ಸ್ವಾಧೀನ ಪಡೆಯಲು ಕ್ರಮ ಕೈಗೊಳ್ಳುವಂತೆ ಸೂಚಿಸಲಾಯಿತು.

ವಿನಾಯಕ ಥಿಯೇಟರ್‌ನಿಂದ ವಿಶಾಲ್ ಮಾರ್ಟ್‌ವರೆಗಿನ 65 ಆಸ್ತಿಗಳ ಪೈಕಿ 35 ಆಸ್ತಿಗಳಿಗೆ ಪಾವತಿ ಪೂರ್ಣಗೊಂಡಿದೆ. ಉಳಿದ 30 ಆಸ್ತಿಗಳ ಪಾವತಿ ಪ್ರಕ್ರಿಯೆಯನ್ನು ತ್ವರಿತಗೊಳಿಸುವಂತೆ ರಮೇಶ್ ತಿಳಿಸಿದರು.

ಪಾದಚಾರಿ ಮಾರ್ಗ, ಚರಂಡಿ ಮತ್ತು ವಿದ್ಯುತ್ ಕಂಬ ಸ್ಥಳಾಂತರ

ರಸ್ತೆ ಕಾಮಗಾರಿಗೆ ಅಡಚಣೆಯಾಗಿರುವ ತಾತ್ಕಾಲಿಕ ಚರಂಡಿಗಳನ್ನು ಮುಖ್ಯ ಚರಂಡಿಗೆ ಸಂಪರ್ಕಿಸಿ ತೆರವುಗೊಳಿಸಬೇಕು. ಚರಂಡಿ ಮೇಲ್ಭಾಗದಲ್ಲಿ ಕನಿಷ್ಠ ಎರಡು ಮೀಟರ್ ಅಗಲದ ಪಾದಚಾರಿ ಮಾರ್ಗ ಕಲ್ಪಿಸುವಂತೆ ಅಧಿಕಾರಿಗಳಿಗೆ ಸೂಚಿಸಲಾಯಿತು.

ಬಾಕಿ ಇರುವ ವಿದ್ಯುತ್ ಕಂಬಗಳು ಮತ್ತು ಒಂದು ಟ್ರಾನ್ಸ್‌ಫಾರ್ಮರ್ ಅನ್ನು ನಾಲ್ಕು ದಿನಗಳೊಳಗೆ ಸ್ಥಳಾಂತರಿಸುವಂತೆ ಬೆಸ್ಕಾಂಗೆ ನಿರ್ದೇಶನ ನೀಡಲಾಯಿತು.

ಬೆಳ್ಳಂದೂರು ಅಮಾನಿಕೆರೆ ಬಳಿ ರಸ್ತೆ ಹಾಗೂ ರ‍್ಯಾಂಪ್/ವಯಾಡಕ್ಟ್ ಕಾಮಗಾರಿಗೆ ಅಡಚಣೆಯಾಗಿರುವ ಹೆಚ್‌ಪಿ ಪೆಟ್ರೋಲ್ ಬಂಕ್‌ನ ಟ್ರೇಡ್ ಲೈಸೆನ್ಸ್, ಕಟ್ಟಡ ಪರವಾನಗಿ ಮತ್ತು ಒಸಿ ಸೇರಿದಂತೆ ಅಗತ್ಯ ದಾಖಲೆಗಳನ್ನು ತಕ್ಷಣ ಪರಿಶೀಲಿಸುವಂತೆ ಆಯುಕ್ತರು ಸೂಚಿಸಿದರು. ನಿಯಮ ಉಲ್ಲಂಘನೆ ಕಂಡುಬಂದರೆ ಅನ್ವಯಿಸುವ ನಿಯಮಗಳ ಪ್ರಕಾರ ಕ್ರಮ ಕೈಗೊಳ್ಳಬೇಕು ಎಂದು ತಿಳಿಸಿದರು.

ವರ್ತೂರು ಕಾಮಗಾರಿಗೆ ವಿಶೇಷ ಕಾರ್ಯಪಡೆ

ವರ್ತೂರು ರಸ್ತೆ ಅಭಿವೃದ್ಧಿ ಮತ್ತು ಎಲಿವೇಟೆಡ್ ಕಾರಿಡಾರ್ ಕಾಮಗಾರಿಗಳನ್ನು ತ್ವರಿತಗೊಳಿಸಲು, ಇಲಾಖೆಗಳ ನಡುವೆ ಸಮನ್ವಯ ಸಾಧಿಸಲು ಹಾಗೂ ಸಂಚಾರ ಸಮಸ್ಯೆಗಳಿಗೆ ಪರಿಹಾರ ಕಲ್ಪಿಸಲು ಆಯುಕ್ತರ ಅಧ್ಯಕ್ಷತೆಯಲ್ಲಿ ವಿಶೇಷ ಕಾರ್ಯಪಡೆ ರಚಿಸಲಾಗಿದೆ.

ಕಾರ್ಯಪಡೆಯಲ್ಲಿ ಅಪರ ಆಯುಕ್ತರು, ಸಂಚಾರ ವಿಭಾಗದ ಉಪ ಪೊಲೀಸ್ ಆಯುಕ್ತರು, ಮುಖ್ಯ ಅಭಿಯಂತರರು ಮತ್ತು ಕೆಆರ್‌ಡಿಸಿಎಲ್, ಬೆಸ್ಕಾಂ ಹಾಗೂ ಕಂದಾಯ ಇಲಾಖೆಯ ಅಧಿಕಾರಿಗಳಿದ್ದಾರೆ.

ಭೂಸ್ವಾಧೀನವನ್ನು ತ್ವರಿತಗೊಳಿಸುವುದು, ಕಾಮಗಾರಿ ಪ್ರಗತಿ ಪರಿಶೀಲಿಸುವುದು, ತಾಂತ್ರಿಕ ಮತ್ತು ಭೌತಿಕ ಅಡಚಣೆಗಳನ್ನು ಗುರುತಿಸುವುದು, ವಿದ್ಯುತ್ ಕಂಬ ಸ್ಥಳಾಂತರ ಹಾಗೂ ಸಂಚಾರ ನಿರ್ವಹಣೆಗೆ ಸಮನ್ವಯ ಸಾಧಿಸುವುದು ಕಾರ್ಯಪಡೆಯ ಜವಾಬ್ದಾರಿಗಳಾಗಿವೆ. ನಿಯಮಿತ ಸಭೆ ನಡೆಸಿ ನಿರ್ಧಾರಗಳ ಅನುಷ್ಠಾನ, ಪ್ರಗತಿ ಮತ್ತು ಬಾಕಿ ವಿಷಯಗಳ ಬಗ್ಗೆ ವರದಿ ಸಲ್ಲಿಸಲಿದೆ.

ಅಪರ ಆಯುಕ್ತೆ (ಅಭಿವೃದ್ಧಿ) ಲೋಖಂಡೆ ಸ್ನೇಹಲ್ ಸುಧಾಕರ್, ಮುಖ್ಯ ಅಭಿಯಂತರರು ಮತ್ತು ಸಂಬಂಧಿತ ಇಲಾಖೆಗಳ ಅಧಿಕಾರಿಗಳು ಸಭೆಯಲ್ಲಿ ಭಾಗವಹಿಸಿದ್ದರು.

ಗುಂಜೂರು–ವರ್ತೂರು ರಸ್ತೆ ಕುರಿತು ಹಿಂದಿನ ವರದಿಗಳು

ಕೃಷ್ಣ ಬೈರೇಗೌಡ: ಭೂಸ್ವಾಧೀನಕ್ಕೂ ಮೊದಲು ದೊಮ್ಮಸಂದ್ರ–ವರ್ತೂರು ಮಾರ್ಗದ ಲಭ್ಯ ಜಾಗದಲ್ಲಿ ರಸ್ತೆ ಸರಿಪಡಿಸಿ

ವರ್ತೂರು–ಗುಂಜೂರು ರಸ್ತೆಯಲ್ಲಿ ಶಾಲಾ ಬಸ್‌ಗಳು ಹೊರಡುವ ವೇಳೆ ಭಾರಿ ವಾಹನಗಳ ಸಂಚಾರಕ್ಕೆ ನಿರ್ಬಂಧ

ವೈಟ್‌ಫೀಲ್ಡ್, ನಲ್ಲೂರಹಳ್ಳಿ, ಗುಂಜೂರು, ಚಿಕ್ಕಬೆಳ್ಳಂದೂರು ಮತ್ತು ಮುಳ್ಳೂರು ರಸ್ತೆ ಕಾಮಗಾರಿ: ಭೂಸ್ವಾಧೀನ, ಟಿಡಿಆರ್ ಪ್ರಕ್ರಿಯೆ ಚುರುಕುಗೊಳಿಸಲು ಡಿ.ಎಸ್. ರಮೇಶ್ ಸೂಚನೆ

ವರ್ತೂರು ಕೋಡಿ ಮೇಲ್ಸೇತುವೆ ಅನುಮತಿಗಳ ವರದಿ ಕೇಳಿದ ಮಹೇಶ್ವರ್ ರಾವ್; ಜಲಾವೃತ, ರಸ್ತೆ ಗುಂಡಿ ಸಮಸ್ಯೆ ಪರಿಹಾರಕ್ಕೆ ಸೂಚನೆ