ಹಾಸನಾಂಬ ಜಾತ್ರೆಗೆ ಗ್ರಾಮೀಣ ಸೊಗಡು: ಹಳ್ಳಿಕಾರ್ ರಾಸು, ರಂಗೋಲಿ, ಎತ್ತಿನ ಗಾಡಿ ಓಟ

ಹಾಸನ: ಹಾಸನಾಂಬ ದೇವಿಯ ವಾರ್ಷಿಕ ಜಾತ್ರೆಗೆ ಬರುವ ಭಕ್ತರಿಗೆ ಈ ಬಾರಿ ದರ್ಶನದ ಜತೆಗೆ ಗ್ರಾಮೀಣ ಸಂಸ್ಕೃತಿಯ ಪರಿಚಯವೂ ಸಿಗಲಿದೆ. ಹಳ್ಳಿಕಾರ್ ರಾಸುಗಳ ಪ್ರದರ್ಶನ, ಎತ್ತಿನ ಗಾಡಿ ಮತ್ತು ಹೋರಿಗಳ ಓಟ, ಬೃಹತ್ ರಂಗೋಲಿ ಸ್ಪರ್ಧೆ ಹಾಗೂ ಜಾನಪದ ಕಾರ್ಯಕ್ರಮಗಳನ್ನು ಜಾತ್ರೆಯ ಅಂಗವಾಗಿ ಆಯೋಜಿಸಲು ಯೋಜಿಸಲಾಗಿದೆ.

ಅಕ್ಟೋಬರ್ 4ರಂದು ಜಿಲ್ಲಾಧಿಕಾರಿಗಳ ಕಚೇರಿಯಲ್ಲಿ ವಿಶೇಷ ಉತ್ಸವಗಳ ಪೋಸ್ಟರ್ ಬಿಡುಗಡೆ ಮಾಡಿದ ಕೆ. ಎಂ. ಶಿವಲಿಂಗೇಗೌಡ, ಸ್ಥಳೀಯ ಸಂಪ್ರದಾಯಗಳನ್ನು ಪುನರುಜ್ಜೀವನಗೊಳಿಸಿ ಹೆಚ್ಚಿನ ಜನರಿಗೆ ಪರಿಚಯಿಸುವುದು ಕಾರ್ಯಕ್ರಮಗಳ ಉದ್ದೇಶ ಎಂದು ಹೇಳಿದರು. ಜಿಲ್ಲೆಯ ತಾಲೂಕು, ಹೋಬಳಿ ಮತ್ತು ಗ್ರಾಮಗಳಲ್ಲೂ ಪ್ರಚಾರ ಕೈಗೊಳ್ಳಲು ಸೂಚಿಸಿದರು.

ದರ್ಶನ ಆರಂಭದ ದಿನದಿಂದ ರಂಗೋಲಿ ಸ್ಪರ್ಧೆ

ದೇವಾಲಯದ ಗರ್ಭಗುಡಿ ಬಾಗಿಲು ತೆರೆದು ವಾರ್ಷಿಕ ದರ್ಶನ ಆರಂಭವಾಗುವ ದಿನದಿಂದ ಬೃಹತ್ ರಂಗೋಲಿ ಸ್ಪರ್ಧೆ ನಡೆಯಲಿದೆ ಎಂದು ಅವರು ತಿಳಿಸಿದರು. ನಗರ ಹಾಗೂ ಗ್ರಾಮೀಣ ಭಾಗದ ಮಹಿಳೆಯರು ಮತ್ತು ಸಾರ್ವಜನಿಕರು ಸ್ಥಳದಲ್ಲೇ ನೋಂದಾಯಿಸಿಕೊಂಡು ಭಾಗವಹಿಸಬಹುದು. ವಿಜೇತರಿಗೆ ಬಹುಮಾನ ನೀಡಲಾಗುವುದು ಎಂದರು.

ರೈತರು ಸಾಕಿರುವ ದೇಸಿ ಹಳ್ಳಿಕಾರ್ ರಾಸುಗಳು ಹಾಗೂ ಜೋಡೆತ್ತುಗಳ ಪ್ರತಿನಿತ್ಯದ ಪ್ರದರ್ಶನವೂ ಇರಲಿದೆ. ರೈತರಿಗೆ ಗೌರವದ ವೇದಿಕೆ ಒದಗಿಸಿ, ಪ್ರತಿದಿನ ಉತ್ತಮ ರಾಸುಗಳಿಗೆ ಬಹುಮಾನ ನೀಡಲಾಗುವುದು ಎಂದು ಶಿವಲಿಂಗೇಗೌಡ ಹೇಳಿದರು. ಕುರಿ, ಮೇಕೆ ಹಾಗೂ ಸಾಕು ನಾಯಿಗಳ ಪ್ರದರ್ಶನವನ್ನೂ ಆಯೋಜಿಸಲಾಗಿದೆ.

ಬಾಣಾವರ ಸೇರಿದಂತೆ ಗ್ರಾಮೀಣ ಪ್ರದೇಶಗಳಲ್ಲಿ ಜನಪ್ರಿಯವಾಗಿರುವ ಎತ್ತಿನ ಗಾಡಿ ಮತ್ತು ಹೋರಿಗಳ ಓಟವನ್ನು ಜಾತ್ರೆಯ ಆಕರ್ಷಣೆಗಳಾಗಿ ಸೇರಿಸಲಾಗಿದೆ. ಕಲಾ ಚಿತ್ತಾರ ಹಾಗೂ ಜಾನಪದ ಉತ್ಸವಗಳೂ ನಡೆಯಲಿವೆ.

ಹಾಸನಾಂಬ ಕಪ್ ಕ್ರಿಕೆಟ್, ಕಬಡ್ಡಿ

ಜಿಲ್ಲಾ ಕ್ರೀಡಾಂಗಣದಲ್ಲಿ ಹಾಸನಾಂಬ ಕಪ್ ಕ್ರಿಕೆಟ್ ಪಂದ್ಯಾವಳಿ ಹಾಗೂ ಕಬಡ್ಡಿ ಸ್ಪರ್ಧೆಗಳು ನಡೆಯಲಿವೆ. ಉತ್ತಮ ಸಾಧನೆ ಮಾಡಿದ ತಂಡಗಳಿಗೆ ನಗದು ಪುರಸ್ಕಾರ ಮತ್ತು ಟ್ರೋಫಿ ನೀಡಲಾಗುವುದು. ಪಾರಂಪರಿಕ ಆಟಗಳನ್ನು ಉತ್ತೇಜಿಸುವುದಕ್ಕೂ ಆದ್ಯತೆ ನೀಡಲಾಗಿದೆ ಎಂದು ಅವರು ತಿಳಿಸಿದರು.

ಕುಡಿಯುವ ನೀರು, ಸರತಿ ಸಾಲು, ಪಾರ್ಕಿಂಗ್‌ಗೆ ಸೂಚನೆ

ಬಳಿಕ ನಡೆದ ಜಿಲ್ಲಾ ಮಟ್ಟದ ಕರ್ನಾಟಕ ಅಭಿವೃದ್ಧಿ ಕಾರ್ಯಕ್ರಮಗಳ ಪ್ರಗತಿ ಪರಿಶೀಲನಾ ಸಭೆಯಲ್ಲಿ, ಭಕ್ತರ ಆಗಮನಕ್ಕೆ ತಕ್ಕಂತೆ ಕುಡಿಯುವ ನೀರು, ಸ್ವಚ್ಛತೆ, ನಿರಂತರ ವಿದ್ಯುತ್, ದಾಸೋಹ, ಶೌಚಾಲಯ, ಸರತಿ ಸಾಲು, ವಾಹನ ನಿಲುಗಡೆ ಹಾಗೂ ಪೊಲೀಸ್ ಭದ್ರತೆಯಲ್ಲಿ ಲೋಪವಾಗದಂತೆ ನೋಡಿಕೊಳ್ಳಲು ಅಧಿಕಾರಿಗಳಿಗೆ ಸೂಚಿಸಿದರು.

ಗ್ಯಾರಂಟಿ ಮತ್ತು ಕೃಷಿ ಯೋಜನೆಗಳ ಪ್ರಗತಿಯನ್ನೂ ಸಭೆ ಪರಿಶೀಲಿಸಿತು. ಸಬ್ಸಿಡಿ ಸ್ಪ್ರಿಂಕ್ಲರ್ ಸೆಟ್‌ಗಳ ದುರ್ಬಳಕೆ ತಡೆಯಲು ಹಾಗೂ ನೀರಿನ ಆಸರೆಯಿರುವ ರೈತರಿಗೆ ಆದ್ಯತೆ ನೀಡಲು ಶಿವಲಿಂಗೇಗೌಡ ಸೂಚಿಸಿದರು. ಕೃಷಿ ಭಾಗ್ಯ ಯೋಜನೆಯಡಿ 272 ಕೃಷಿ ಹೊಂಡಗಳ ಗುರಿಯಲ್ಲಿ 198 ಪೂರ್ಣಗೊಂಡಿದ್ದು, ವಸುಧಾಮೃತ ಯೋಜನೆಯಡಿ ತೆಂಗಿನ ತೋಟಗಳಿಗೆ ಹಸಿರೆಲೆ ಗೊಬ್ಬರದ ಬೀಜಗಳ ವಿತರಣೆ ಶೇ 100ರಷ್ಟು ಆಗಿದೆ ಎಂದು ಅಧಿಕಾರಿಗಳು ತಿಳಿಸಿದರು.

ಸಂಸದ ಶ್ರೇಯಸ್ ಎಂ. ಪಟೇಲ್, ಜಿಲ್ಲಾಧಿಕಾರಿ ಲತಾಕುಮಾರಿ, ಹಿರಿಯ ಜಿಲ್ಲಾ ಅಧಿಕಾರಿಗಳು ಹಾಗೂ ಸ್ಥಳೀಯ ಜನಪ್ರತಿನಿಧಿಗಳು ಉಪಸ್ಥಿತರಿದ್ದರು.