ಜೂನ್ 30ರಿಂದ ರಾಜ್ಯಾದ್ಯಂತ ಎಸ್‌ಐಆರ್-2026 ಮತದಾರರ ಪಟ್ಟಿ ಪರಿಷ್ಕರಣೆ ಆರಂಭ; ಮನೆ ಮನೆಗೆ ಭೇಟಿ ನೀಡಲಿರುವ ಬಿಎಲ್‌ಒಗಳು

ಬೆಂಗಳೂರು, ಜೂನ್ 29: ಕರ್ನಾಟಕ ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿ (CEO Karnataka) ವಿಶೇಷ ತೀವ್ರ ಪರಿಷ್ಕರಣೆ (Special Intensive Revision – SIR) 2026 ಕಾರ್ಯಕ್ರಮದ ವೇಳಾಪಟ್ಟಿ ಹಾಗೂ ಮಾರ್ಗಸೂಚಿಗಳನ್ನು ಪ್ರಕಟಿಸಿದ್ದು, ಜೂನ್ 30, 2026ರಿಂದ ಜುಲೈ 29ರವರೆಗೆ ರಾಜ್ಯಾದ್ಯಂತ ಬೂತ್ ಮಟ್ಟದ ಅಧಿಕಾರಿಗಳು (BLO) ಮನೆ ಮನೆಗೆ ಭೇಟಿ ನೀಡಿ ಮತದಾರರ ಪರಿಶೀಲನೆ ನಡೆಸಲಿದ್ದಾರೆ.

ಎಸ್‌ಐಆರ್-2026ರ ಪ್ರಮುಖ ಉದ್ದೇಶವು ಪ್ರತಿಯೊಬ್ಬ ಅರ್ಹ ನಾಗರಿಕರನ್ನು ಮತದಾರರ ಪಟ್ಟಿಗೆ ಸೇರ್ಪಡೆಗೊಳಿಸುವುದು ಹಾಗೂ ಮತದಾರರ ಪಟ್ಟಿಯನ್ನು ನಿಖರ ಮತ್ತು ನವೀಕೃತವಾಗಿಡುವುದಾಗಿದೆ.

ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿ ಸಾರ್ವಜನಿಕರಿಗೆ ತಮ್ಮ ಹೆಸರು ಮತದಾರರ ಪಟ್ಟಿಯಲ್ಲಿ ಇದೆಯೇ ಎಂಬುದನ್ನು ಪರಿಶೀಲಿಸಿ, ಪರಿಷ್ಕರಣೆ ಪ್ರಕ್ರಿಯೆಯಲ್ಲಿ ಸಕ್ರಿಯವಾಗಿ ಭಾಗವಹಿಸುವಂತೆ ಮನವಿ ಮಾಡಿದೆ.

ಎಸ್‌ಐಆರ್-2026 ವೇಳಾಪಟ್ಟಿ

ಬಿಎಲ್‌ಒಗಳು ಏನು ಮಾಡುತ್ತಾರೆ?

ಮನೆ ಮನೆಗೆ ಭೇಟಿ ನೀಡುವ ವೇಳೆ ಬಿಎಲ್‌ಒಗಳು:

• ಜೂನ್ 16, 2026ರ ಮತದಾರರ ಪಟ್ಟಿಯಲ್ಲಿದ್ದ ಮತದಾರರಿಗೆ ಎಣಿಕೆ (Enumeration) ಫಾರ್ಮ್ ವಿತರಿಸುತ್ತಾರೆ.
• ಜೂನ್ 30ರಿಂದ ಜುಲೈ 29ರವರೆಗೆ ಮನೆಗಳಿಗೆ ಭೇಟಿ ನೀಡುತ್ತಾರೆ.
• ಪ್ರತಿ ಮತದಾರರಿಗೆ ಎರಡು ಪ್ರತಿಗಳ ಫಾರ್ಮ್ ನೀಡುತ್ತಾರೆ.
• ಫಾರ್ಮ್ ಭರ್ತಿ ಮಾಡಲು ಸಹಾಯ ಮಾಡುತ್ತಾರೆ.
• ಭರ್ತಿ ಮಾಡಿದ ಫಾರ್ಮ್ ಸ್ವೀಕರಿಸಿ ರಶೀದಿ ನೀಡುತ್ತಾರೆ.

ಮತದಾರರು ಮಾಡಬೇಕಾದದ್ದು

ಚುನಾವಣಾ ಇಲಾಖೆ ಮತದಾರರಿಗೆ ಈ ಕೆಳಗಿನ ಸೂಚನೆಗಳನ್ನು ನೀಡಿದೆ:

• ಬಿಎಲ್‌ಒ ನೀಡುವ ಎರಡೂ ಫಾರ್ಮ್‌ಗಳನ್ನು ಭರ್ತಿ ಮಾಡಬೇಕು.
• ಇಚ್ಛೆಯಿದ್ದರೆ ಇತ್ತೀಚಿನ ಬಣ್ಣದ ಪಾಸ್‌ಪೋರ್ಟ್ ಗಾತ್ರದ ಭಾವಚಿತ್ರ ಅಂಟಿಸಬಹುದು (ಕಡ್ಡಾಯವಲ್ಲ).
• ಫಾರ್ಮ್ ಭರ್ತಿ ಅಥವಾ ಆನ್‌ಲೈನ್ ಅಪ್‌ಲೋಡ್ ಮಾಡಲು ಸಹಾಯ ಬೇಕಿದ್ದರೆ ಬಿಎಲ್‌ಒ ಅವರನ್ನು ಸಂಪರ್ಕಿಸಬಹುದು.
• ಭರ್ತಿ ಮಾಡಿದ ಫಾರ್ಮ್‌ಗಳನ್ನು ಬಿಎಲ್‌ಒಗೆ ನೀಡಿ ರಶೀದಿ ಪಡೆಯಬೇಕು.

ಮತದಾರರಾಗಲು ಅರ್ಹತೆ

ಭಾರತ ಸಂವಿಧಾನದ ಅನುಚ್ಛೇದ 326 ಪ್ರಕಾರ:

• ಭಾರತೀಯ ಪ್ರಜೆಯಾಗಿರಬೇಕು.
• ಕನಿಷ್ಠ 18 ವರ್ಷ ವಯಸ್ಸು ಪೂರ್ಣಗೊಂಡಿರಬೇಕು.
• ಸಂಬಂಧಿತ ಕ್ಷೇತ್ರದಲ್ಲಿ ಸಾಮಾನ್ಯ ನಿವಾಸಿಯಾಗಿರಬೇಕು.
• ಯಾವುದೇ ಕಾನೂನು ಅನ್ವಯ ಅನರ್ಹರಾಗಿರಬಾರದು.

ಕರಡು ಮತದಾರರ ಪಟ್ಟಿಯಲ್ಲಿ ಹೆಸರು ಪರಿಶೀಲಿಸುವುದು ಹೇಗೆ?

ಮತದಾರರು ತಮ್ಮ ಹೆಸರನ್ನು ಈ ಕೆಳಗಿನ ಮೂಲಕ ಪರಿಶೀಲಿಸಬಹುದು:

• ಬಿಎಲ್‌ಒ ಬಳಿಯಿರುವ ಮತದಾರರ ಪಟ್ಟಿ.
• ಇಸಿನೆಟ್ (ECINET) ಮೊಬೈಲ್ ಆ್ಯಪ್.
• voters.eci.gov.in ವೆಬ್‌ಸೈಟ್.
• ಕರ್ನಾಟಕ ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿ ಹಾಗೂ ಜಿಲ್ಲಾ ಚುನಾವಣಾಧಿಕಾರಿಗಳ ವೆಬ್‌ಸೈಟ್.

ಹೆಸರು ಇಲ್ಲದಿದ್ದರೆ ಏನು ಮಾಡಬೇಕು?

ಕರಡು ಮತದಾರರ ಪಟ್ಟಿಯಲ್ಲಿ ಹೆಸರು ಇಲ್ಲದಿದ್ದರೆ:

• ಫಾರ್ಮ್-6 ಭರ್ತಿ ಮಾಡಿ ಅಗತ್ಯ ಘೋಷಣೆಯೊಂದಿಗೆ ಸಲ್ಲಿಸಬೇಕು.
• ಬಿಎಲ್‌ಒ ಮೂಲಕ ಅಥವಾ
• voters.eci.gov.in ವೆಬ್‌ಸೈಟ್‌ನಲ್ಲಿ ಅಥವಾ
• ECINET ಮೊಬೈಲ್ ಆ್ಯಪ್ ಮೂಲಕ ಅರ್ಜಿ ಸಲ್ಲಿಸಬಹುದು.

ಲಭ್ಯವಿರುವ ಅರ್ಜಿ ನಮೂನೆಗಳು

• ಫಾರ್ಮ್-6 – ಹೊಸ ಮತದಾರರ ನೋಂದಣಿ
• ಫಾರ್ಮ್-6A – ವಿದೇಶದಲ್ಲಿ ನೆಲೆಸಿರುವ ಭಾರತೀಯ ಮತದಾರರ ನೋಂದಣಿ
• ಫಾರ್ಮ್-7 – ಮತದಾರರ ಪಟ್ಟಿಯಿಂದ ಹೆಸರು ಅಳಿಸುವಿಕೆ
• ಫಾರ್ಮ್-8 – ವಿಳಾಸ ಬದಲಾವಣೆ, ವಿವರ ತಿದ್ದುಪಡಿ, ಹೊಸ ಮತದಾರರ ಗುರುತಿನ ಚೀಟಿ (EPIC) ಅಥವಾ ವಿಶೇಷ ಗುರುತು ನಮೂದು

ಸಲ್ಲಿಸಬಹುದಾದ ದಾಖಲೆಗಳು

ಸೂಚಕ (Indicative) ದಾಖಲೆಗಳ ಪಟ್ಟಿಯಲ್ಲಿ:

• ಸರ್ಕಾರಿ ಗುರುತಿನ ಚೀಟಿ ಅಥವಾ ಪಿಂಚಣಿ ಪಾವತಿ ಆದೇಶ
• ಸರ್ಕಾರಿ/ಸ್ಥಳೀಯ ಸಂಸ್ಥೆಗಳ ಪ್ರಮಾಣಪತ್ರಗಳು
• ಜನನ ಪ್ರಮಾಣಪತ್ರ
• ಪಾಸ್‌ಪೋರ್ಟ್
• ಎಸ್‌ಎಸ್‌ಎಲ್‌ಸಿ/ಶೈಕ್ಷಣಿಕ ಪ್ರಮಾಣಪತ್ರ
• ಶಾಶ್ವತ ನಿವಾಸ ಪ್ರಮಾಣಪತ್ರ
• ಅರಣ್ಯ ಹಕ್ಕು ಪತ್ರ
• ಒಬಿಸಿ/ಎಸ್‌ಸಿ/ಎಸ್‌ಟಿ ಅಥವಾ ಇತರೆ ಜಾತಿ ಪ್ರಮಾಣಪತ್ರ
• ರಾಷ್ಟ್ರೀಯ ನಾಗರಿಕರ ನೋಂದಣಿ ದಾಖಲೆ (ಅನ್ವಯಿಸಿದಲ್ಲಿ)
• ಸರ್ಕಾರಿ ಕುಟುಂಬ ನೋಂದಣಿ
• ಸರ್ಕಾರಿ ಜಮೀನು ಅಥವಾ ಮನೆ ಹಂಚಿಕೆ ಪ್ರಮಾಣಪತ್ರ

ಚುನಾವಣಾ ಇಲಾಖೆ ಈ ದಾಖಲೆಗಳ ಪಟ್ಟಿ ಸೂಚಕವಾಗಿದ್ದು, ಅಂತಿಮ ಪಟ್ಟಿಯಲ್ಲ ಎಂದು ಸ್ಪಷ್ಟಪಡಿಸಿದೆ.

ಮೇಲ್ಮನವಿ ಅವಕಾಶ

ಚುನಾವಣಾ ನೋಂದಣಿ ಅಧಿಕಾರಿ (ERO) ತೀರ್ಮಾನದ ವಿರುದ್ಧ ಅಸಮಾಧಾನ ಇದ್ದರೆ ಜನಪ್ರತಿನಿಧಿಗಳ ಕಾಯ್ದೆ, 1950ರ ಸೆಕ್ಷನ್ 24ರ ಅನ್ವಯ ಜಿಲ್ಲಾ ಚುನಾವಣಾಧಿಕಾರಿ/ಜಿಲ್ಲಾಧಿಕಾರಿಗಳ ಬಳಿ ಮೇಲ್ಮನವಿ ಸಲ್ಲಿಸಬಹುದು.

ಹೆಚ್ಚಿನ ಮಾಹಿತಿಗೆ

• ಮುಖ್ಯ ಚುನಾವಣಾಧಿಕಾರಿಗಳ ವೆಬ್‌ಸೈಟ್: https://ceo.karnataka.gov.in
• ಮತದಾರರ ಪೋರ್ಟಲ್: https://voters.eci.gov.in
• ECINET ಮೊಬೈಲ್ ಆ್ಯಪ್
• ಟೋಲ್ ಫ್ರೀ ಸಹಾಯವಾಣಿ: 1950

ರಾಜ್ಯದ ಎಲ್ಲಾ ಅರ್ಹ ಮತದಾರರು ಬಿಎಲ್‌ಒಗಳಿಗೆ ಸಹಕರಿಸಿ, ತಮ್ಮ ಮತದಾರರ ವಿವರಗಳನ್ನು ಪರಿಶೀಲಿಸಿ, ಅಕ್ಟೋಬರ್ 7, 2026ರಂದು ಪ್ರಕಟವಾಗಲಿರುವ ಅಂತಿಮ ಮತದಾರರ ಪಟ್ಟಿಯಲ್ಲಿ ತಮ್ಮ ಹೆಸರು ಖಚಿತಪಡಿಸಿಕೊಳ್ಳುವಂತೆ ಮುಖ್ಯ ಚುನಾವಣಾಧಿಕಾರಿಗಳ ಕಚೇರಿ ಮನವಿ ಮಾಡಿದೆ.