ಲೋಕಾಯುಕ್ತರ ಮಧ್ಯಪ್ರವೇಶದ ಬಳಿಕ ತೆರವುಗೊಳಿಸುವ ಮುನ್ನ ಶೆಟ್ಟಿಹಳ್ಳಿ ವಾರ್ಡ್‌ನ ಕಮ್ಮಗೊಂಡನಹಳ್ಳಿಯಲ್ಲಿ ಸಂಗ್ರಹವಾಗಿದ್ದ ಕಸ. ಫೋಟೊ: ಕರ್ನಾಟಕ ಲೋಕಾಯುಕ್ತ
ಬೆಂಗಳೂರು: ಕರ್ನಾಟಕ ಲೋಕಾಯುಕ್ತ ನ್ಯಾಯಮೂರ್ತಿ ಬಿ.ಎಸ್. ಪಾಟೀಲ್ ಅವರ ಮಧ್ಯಪ್ರವೇಶದಿಂದ ವಾರ್ಡ್ ಸಂಖ್ಯೆ 12ರ (ಶೆಟ್ಟಿಹಳ್ಳಿ ವಾರ್ಡ್) ಕಮ್ಮಗೊಂಡನಹಳ್ಳಿ ಭಾಗದಲ್ಲಿ ಸಂಗ್ರಹವಾಗಿದ್ದ ಸುಮಾರು 80 ಟನ್ ಕಸವನ್ನು ಒಂದೇ ದಿನದಲ್ಲಿ ತೆರವುಗೊಳಿಸಲಾಗಿದೆ ಎಂದು ಲೋಕಾಯುಕ್ತ ಸಂಸ್ಥೆ ಬಿಡುಗಡೆ ಮಾಡಿದ ಪತ್ರಿಕಾ ಪ್ರಕಟಣೆ ತಿಳಿಸಿದೆ.
ನವೆಂಬರ್ 13ರ ರಾತ್ರಿ ವಾರ್ಡ್‌ನ ವಿವಿಧೆಡೆ ಕಸ ತೆರವುಗೊಳಿಸದಿರುವ ಕುರಿತು ಲೋಕಾಯುಕ್ತರಿಗೆ ದೂರುಗಳು ಬಂದಿದ್ದವು. ಸ್ಥಳ ಪರಿಶೀಲನೆ ನಡೆಸಿ ಫೋಟೊ ಸಹಿತ ವರದಿ ಸಲ್ಲಿಸುವಂತೆ ಅವರು ಲೋಕಾಯುಕ್ತ ಪೊಲೀಸ್ ಅಧಿಕಾರಿಗಳಿಗೆ ಸೂಚಿಸಿದ್ದರು.
ಪರಿಶೀಲನಾ ತಂಡ ಹಲವು ಕಡೆ ಕಸದ ರಾಶಿ ಪತ್ತೆ ಮಾಡಿ ದೂರುಗಳು ನಿಜವೆಂದು ದೃಢಪಡಿಸಿತು. ವರದಿ ಪರಿಶೀಲಿಸಿದ ಬಳಿಕ ಲೋಕಾಯುಕ್ತರು ಬೆಂಗಳೂರು ಉತ್ತರ ನಗರ ಪಾಲಿಕೆ (ಬಿಎನ್‌ಸಿಸಿ) ಮತ್ತು ಬೆಂಗಳೂರು ಘನತ್ಯಾಜ್ಯ ನಿರ್ವಹಣಾ ನಿಯಮಿತ (ಬಿಎಸ್‌ಡಬ್ಲ್ಯುಎಂಎಲ್) ಅಧಿಕಾರಿಗಳೊಂದಿಗೆ ನೇರವಾಗಿ ಮಾತನಾಡಿ ತಕ್ಷಣ ಕಸ ತೆರವುಗೊಳಿಸುವಂತೆ ಸೂಚಿಸಿದರು.
ಈ ನಿರ್ದೇಶನದಂತೆ ಬಿಎನ್‌ಸಿಸಿ ಅಧಿಕಾರಿಗಳು ನವೆಂಬರ್ 14ರಂದು ವಾರ್ಡ್‌ನಲ್ಲಿ ವಿಶೇಷ ಸ್ವಚ್ಛತಾ ಕಾರ್ಯಾಚರಣೆ ಕೈಗೊಂಡರು. ಹಳೆಯ ಗುತ್ತಿಗೆದಾರರನ್ನು ಬದಲಿಸಿ ಹೊಸ ಗುತ್ತಿಗೆದಾರರಿಗೆ ಹೊಣೆ ವಹಿಸಲಾಯಿತು; ಅವರು ಎರಡು ಕಾಂಪ್ಯಾಕ್ಟರ್, ನಾಲ್ಕು ಟಿಪ್ಪರ್ ಮತ್ತು ಒಂದು ಜೆಸಿಬಿ ಬಳಸಿ ಒಂದೇ ದಿನದಲ್ಲಿ ಸುಮಾರು 80 ಟನ್ ಕಸ ತೆರವುಗೊಳಿಸಿದರು.
ಇಂತಹ ಸಮಸ್ಯೆ ಮರುಕಳಿಸದಂತೆ ನಿಯಮಿತ ಮತ್ತು ವ್ಯವಸ್ಥಿತ ಕಸ ಸಂಗ್ರಹ ಹಾಗೂ ವಿಲೇವಾರಿ ಖಚಿತಪಡಿಸುವಂತೆ ಸಂಬಂಧಪಟ್ಟ ಅಧಿಕಾರಿಗಳಿಗೆ ಲೋಕಾಯುಕ್ತರು ಸೂಚಿಸಿದ್ದಾರೆ.
