ಬೆಂಗಳೂರು: ಹಲಸೂರಿನ ಕಾನ್ರಾಡ್ ಹೋಟೆಲ್‌ನ ಮೇಲ್ಛಾವಣಿಯ ಈಜುಕೊಳದಲ್ಲಿ ಶುಕ್ರವಾರ ಸಂಜೆ ಸಂಭವಿಸಿದ ಘಟನೆಯಲ್ಲಿ ಇಬ್ಬರು ವಿದೇಶಿಯರು ಮೃತಪಟ್ಟಿದ್ದು, ಮತ್ತಿಬ್ಬರು ಗಾಯಗೊಂಡಿದ್ದಾರೆ. ವಿದ್ಯುತ್ ಆಘಾತದಿಂದ ಘಟನೆ ನಡೆದಿರಬಹುದು ಎಂಬ ಶಂಕೆಯಿದೆ. ಆದರೆ ವೈದ್ಯಕೀಯ, ತಾಂತ್ರಿಕ ಹಾಗೂ ತಜ್ಞರ ವರದಿಗಳು ಬಂದ ಬಳಿಕವಷ್ಟೇ ನಿಖರ ಕಾರಣ ತಿಳಿಯಲಿದೆ ಎಂದು ನಗರ ಪೊಲೀಸ್ ಆಯುಕ್ತ ಸೀಮಂತ್ ಕುಮಾರ್ ಸಿಂಗ್ ತಿಳಿಸಿದ್ದಾರೆ.
ಪಂಚತಾರಾ ಹೋಟೆಲ್‌ನ ಮೂರನೇ ಹಂತದ ಟೆರೇಸ್‌ನಲ್ಲಿ ಈಜುಕೊಳವಿದೆ ಎಂದು ಸಿಂಗ್ ಹೇಳಿದರು. ಮೃತರಲ್ಲಿ ಒಬ್ಬರ ಸಂಗಾತಿಯಿಂದ ದೂರು ಪಡೆದಿರುವ ಪೊಲೀಸರು, ಆ ಪ್ರದೇಶವನ್ನು ಸುತ್ತುವರಿದು ಪ್ರವೇಶ ನಿರ್ಬಂಧಿಸಿ ತನಿಖೆ ನಡೆಸುತ್ತಿದ್ದಾರೆ.
ಮೃತರನ್ನು ಜರ್ಮನಿಯ ಅಲೆಕ್ಸಾಂಡರ್ ಮ್ಯಾಕ್ಸಿಮಿಲಿಯನ್ ಥೈಸ್ (57) ಹಾಗೂ ಸ್ಲೊವಾಕಿಯಾದ ಜುರಾಜ್ ಹೋರ್ವಾಟ್ (45) ಎಂದು ಪ್ರಾಥಮಿಕ ಮಾಹಿತಿಯಲ್ಲಿ ಗುರುತಿಸಲಾಗಿದೆ. ಗಾಯಗೊಂಡವರು ಅಮೆರಿಕದ ಮ್ಯಾಥ್ಯೂ ಡೆಸಾಂಟಿಸ್ (41) ಹಾಗೂ ಹೋಟೆಲ್‌ನಲ್ಲಿ ಜೀವರಕ್ಷಕ ಮತ್ತು ಈಜುಕೊಳದ ಸಿಬ್ಬಂದಿಯಾಗಿ ಕೆಲಸ ಮಾಡುತ್ತಿದ್ದ ರಾಹುಲ್ ತಿವಾರಿ (28) ಎಂದು ತಿಳಿದುಬಂದಿದೆ.
ಈಜುಕೊಳದಲ್ಲಿದ್ದ ಇಬ್ಬರಿಗೆ ನೆರವಾಗಲು ಹೋದ ಡೆಸಾಂಟಿಸ್ ಮತ್ತು ತಿವಾರಿಗೂ ವಿದ್ಯುತ್ ಆಘಾತ ತಗುಲಿದೆ ಎಂದು ಪ್ರಾಥಮಿಕ ಮಾಹಿತಿಗಳು ತಿಳಿಸಿವೆ. ನಾಲ್ವರನ್ನೂ ಮಣಿಪಾಲ್ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಥೈಸ್ ಆಸ್ಪತ್ರೆಗೆ ತಲುಪುವ ಮುನ್ನವೇ ಮೃತಪಟ್ಟರೆ, ಹೋರ್ವಾಟ್ ಚಿಕಿತ್ಸೆಯ ನಡುವೆಯೂ ಬದುಕುಳಿಯಲಿಲ್ಲ ಎಂದು ವರದಿಯಾಗಿದೆ. ಗಾಯಗೊಂಡ ಇಬ್ಬರು ಚಿಕಿತ್ಸೆ ಪಡೆಯುತ್ತಿದ್ದು, ಅಪಾಯದಿಂದ ಪಾರಾಗಿದ್ದಾರೆ ಎಂದು ತಿಳಿದುಬಂದಿದೆ.
ಥೈಸ್ ಲುಫ್ತಾನ್ಸಾ ಏರ್‌ಲೈನ್ಸ್‌ನ ಸಿಬ್ಬಂದಿಯಾಗಿದ್ದು, ಹೋರ್ವಾಟ್ ಐಬಿಎಂನಲ್ಲಿ ಯೋಜನಾ ವ್ಯವಸ್ಥಾಪಕರಾಗಿ ಕೆಲಸ ಮಾಡುತ್ತಿದ್ದರು ಎಂದು ವರದಿಯಾಗಿದೆ.
“ಪಂಚತಾರಾ ಹೋಟೆಲ್‌ನಲ್ಲಿ ಸಂಜೆ ದುರದೃಷ್ಟಕರ ಘಟನೆ ನಡೆದಿದೆ. ಮೂರನೇ ಹಂತದ ಟೆರೇಸ್‌ನಲ್ಲಿರುವ ಈಜುಕೊಳದಲ್ಲಿ ವಿದ್ಯುತ್ ಸೋರಿಕೆ ಉಂಟಾಗಿರುವ ಶಂಕೆಯಿದೆ. ಮೇಲ್ನೋಟಕ್ಕೆ ಇದು ವಿದ್ಯುತ್ ಆಘಾತದ ಪ್ರಕರಣದಂತೆ ಕಾಣುತ್ತದೆ. ಆದರೆ ಎಲ್ಲ ವೈದ್ಯಕೀಯ ವರದಿಗಳು, ತಾಂತ್ರಿಕ ಹಾಗೂ ತಜ್ಞರ ವರದಿಗಳು ಬರುವವರೆಗೆ ನಿಖರವಾಗಿ ಏನಾಗಿದೆ ಎಂದು ನಿರ್ಧರಿಸಲು ಸಾಧ್ಯವಿಲ್ಲ,” ಎಂದು ಸಿಂಗ್ ಹೇಳಿದರು.
“ಜರ್ಮನಿಯ ಒಬ್ಬರು ಮತ್ತು ಸ್ಲೊವಾಕಿಯಾದ ಒಬ್ಬರು ಸೇರಿದಂತೆ ಇಬ್ಬರು ವಿದೇಶಿಯರು ಪ್ರಾಣ ಕಳೆದುಕೊಂಡಿದ್ದಾರೆ. ಮೃತರಲ್ಲಿ ಒಬ್ಬರ ಸಂಗಾತಿಯಿಂದ ದೂರು ಪಡೆದಿದ್ದೇವೆ. ಇಬ್ಬರು ಗಾಯಗೊಂಡಿದ್ದಾರೆ. ನಮ್ಮ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಆ ಪ್ರದೇಶವನ್ನು ಸುತ್ತುವರಿದು ಪ್ರವೇಶ ನಿರ್ಬಂಧಿಸಿದ್ದೇವೆ. ಘಟನೆ ಹೇಗೆ ನಡೆಯಿತು ಎಂಬ ನಿಖರ ಕಾರಣವನ್ನು ಪತ್ತೆಹಚ್ಚುತ್ತಿದ್ದೇವೆ; ಸತ್ಯಾಂಶ ತಿಳಿಯಲಿದೆ,” ಎಂದು ಅವರು ಹೇಳಿದರು.
