ಬೆಂಗಳೂರಿನ ಬಿಐಇಸಿಯಲ್ಲಿ ಬುಧವಾರ ನಡೆದ ಬೆಂಗಳೂರು ಟೆಕ್ ಸಮಿಟ್ನಲ್ಲಿ ಬೆಂಗಳೂರು ಇನ್ನೋವೇಶನ್ ವರದಿ 2026ರ ಪ್ರತಿಗಳೊಂದಿಗೆ ಗಣ್ಯರು. ಚಿತ್ರ: ಎಲೆಕ್ಟ್ರಾನಿಕ್ಸ್, ಐಟಿ ಮತ್ತು ಬಿಟಿ ಇಲಾಖೆ
ಬೆಂಗಳೂರು: ಒಂದೇ ವಿನ್ಯಾಸದ ಮೂಲಕ ಹಲವು ಭಾರತೀಯ ಭಾಷೆಗಳನ್ನು ಬೆಂಬಲಿಸುವ ಸಾರ್ವತ್ರಿಕ ಹಾರ್ಡ್ವೇರ್ ಭಾರತೀಯ ಭಾಷಾ ಕೀಬೋರ್ಡ್ ಅನ್ನು ಕ-ನಾದ ಫೋನೆಟಿಕ್ಸ್ (Ka-Naada Phonetics) ಬೆಂಗಳೂರು ಟೆಕ್ ಸಮಿಟ್ನಲ್ಲಿ ಪರಿಚಯಿಸಿದೆ; ಭಾರತದ ಡಿಜಿಟಲ್ ಅಂತರವನ್ನು ಕಡಿಮೆ ಮಾಡಿ ಪ್ರಾದೇಶಿಕ ವಾಣಿಜ್ಯವನ್ನು ಆನ್ಲೈನ್ಗೆ ತರುವ ಉದ್ದೇಶದಿಂದ ಇದನ್ನು ರೂಪಿಸಲಾಗಿದೆ ಎಂದು ಸ್ಟಾರ್ಟ್ಅಪ್ ತಿಳಿಸಿದೆ. ಸಂಸ್ಥೆಯ ಮುಖ್ಯ ನಾವೀನ್ಯತೆ ಅಧಿಕಾರಿ ಡಾ. ಗುರು ಪ್ರಸಾದ್ ಇದನ್ನು ಸಮಿಟ್ನಲ್ಲಿ ಪ್ರಸ್ತುತಪಡಿಸಿದರು.
ಭಾರತದಲ್ಲಿ ಡಿಜಿಟಲ್ ಅಳವಡಿಕೆಗೆ ಭಾಷೆ ಬಹುಕಾಲದಿಂದ ದೊಡ್ಡ ಅಡೆತಡೆಯಾಗಿದೆ ಎಂದು ಕಂಪನಿ ತಿಳಿಸಿದೆ. ಬಳಕೆದಾರರು ತಮ್ಮ ಮಾತೃಭಾಷೆಯಲ್ಲಿ ಸುಲಭವಾಗಿ ಟೈಪ್ ಮಾಡಲು ಅವಕಾಶ ನೀಡುವ ಮೂಲಕ, ಸ್ಥಳೀಯ ಕುಶಲಕರ್ಮಿಗಳು ಮತ್ತು ಸಣ್ಣ ವ್ಯಾಪಾರಿಗಳಂತಹ ಪ್ರಾದೇಶಿಕ ವ್ಯಾಪಾರಿಗಳು ಕಂಪ್ಯೂಟರ್ ಬಳಸಲು, ಗ್ರಾಹಕರೊಂದಿಗೆ ವ್ಯವಹರಿಸಲು ಮತ್ತು ದೇಶದ ಯಾವುದೇ ಮೂಲೆಯಿಂದ ವಾಣಿಜ್ಯಕ್ಕಾಗಿ ಎಐ ಚಾಟ್ಬಾಟ್ಗಳನ್ನು ನಡೆಸಲು ಈ ಕೀಬೋರ್ಡ್ ನೆರವಾಗುತ್ತದೆ ಎಂದು ಅದು ಹೇಳಿದೆ.
ಹಾರ್ಡ್ವೇರ್ ಘಟಕಗಳಿಗೆ ಶೇ.100ರಷ್ಟು ಆಮದನ್ನು ಅವಲಂಬಿಸುವ ಭಾರತದ ಸಾಂಪ್ರದಾಯಿಕ ಅವಲಂಬನೆಯನ್ನು ಮೀರಿ, ಕೀಗಳ ಜೋಡಣೆಗೆ ವಿಶೇಷ ರೋಬೋಟಿಕ್ಸ್ ಬಳಸುವ ಮೂಲಕ ಸ್ವದೇಶಿ ಉತ್ಪಾದನೆಗೆ ಸ್ಟಾರ್ಟ್ಅಪ್ ನಾಂದಿ ಹಾಡಿದೆ ಎಂದು ಕಂಪನಿ ತಿಳಿಸಿದೆ. ಇದು ವಿಶೇಷ ಭಾರತೀಯ ಇನ್ಪುಟ್ ಸಾಧನಗಳಿಗೆ ಮೂಲಭೂತ ಸ್ವದೇಶಿ ಮೂಲಸೌಕರ್ಯವನ್ನು ಸೃಷ್ಟಿಸುತ್ತದೆ ಎಂದು ಅದು ಹೇಳಿದೆ.
ಸಮಿಟ್ನ ಪ್ರದರ್ಶನ ಸ್ಥಳದಲ್ಲಿ ನೇರವಾಗಿ ಪ್ರದರ್ಶಿಸಲಾದ ಈ ಕೀಬೋರ್ಡ್, ಸ್ವರ ಮತ್ತು ವ್ಯಂಜನಗಳನ್ನು ಬೆಸೆಯುವ ಫೋನೆಟಿಕ್ ವಿನ್ಯಾಸ ಹೊಂದಿದೆ. ಎರಡು ಸಾಲಿನ ಸರಳ ಕಮಾಂಡ್ ವ್ಯವಸ್ಥೆಯ ಮೂಲಕ ಬಳಕೆದಾರರು ಕೇಳುತ್ತಾ ಟೈಪ್ ಮಾಡುವ ಮೂಲಕವೇ ವಿವಿಧ ಭಾರತೀಯ ಭಾಷೆಗಳಲ್ಲಿ ಟೈಪ್ ಮಾಡಬಹುದು ಎಂದು ಕಂಪನಿ ಹೇಳಿದೆ.
ಸಮಿಟ್ನಲ್ಲಿ ಮೊದಲ ಬಾರಿಗೆ ಪ್ರದರ್ಶಿಸಿದ ಈ ಆವಿಷ್ಕಾರವನ್ನು ದೇಶಾದ್ಯಂತ ದೈನಂದಿನ ಬಳಕೆದಾರರಿಗೆ ತಲುಪಿಸಲು ಸ್ಟಾರ್ಟ್ಅಪ್ ನಿರ್ದಿಷ್ಟ ಸರ್ಕಾರಿ ನೆರವು, ಮಾರುಕಟ್ಟೆ ಬೆಂಬಲ ಮತ್ತು ತರಬೇತಿ ಮೂಲಸೌಕರ್ಯವನ್ನು ಕೋರುತ್ತಿದೆ.
ಇದೇ ಸಮಿಟ್ನಲ್ಲಿ ಎಸ್ಟಿಪಿಐ ನಿರ್ದೇಶಕ ರಾಕೇಶ್ ದುಬೆ, ಕ್ಲೌಡ್ ಕಂಪ್ಯೂಟಿಂಗ್ನಿಂದ 2ನೇ, 3ನೇ ಹಂತದ ನಗರಗಳಲ್ಲೂ ಸ್ಟಾರ್ಟ್ಅಪ್ಗಳಿಗೆ ಅವಕಾಶ ಎಂದಿದ್ದಾರೆ.
